Wara rma on wara naxe anarî komo reha ahwokaxapunhîrî komo rma, awarpanaw exihra n̂he naxe reha. Pahxa Seburon pono komo n̂iir̂akn̂e Kporin komo cehn̂axmu me. Ero wa xa marha n̂iir̂akn̂e Nahtari pono kom hara. Amn̂e tko Karireia pono komo tak nakronomesî Kaan, Xenciu komo ke tîchewnoyem kom ha, tuuna imo yecihtawno komo mîkyam nakronomesî. Xotaw Yepu mehxan komo.

2 On wara xatken̂e awarpanawnonhîrî komo, weeyu imo tak n̂een̂atken̂e okre. Kwaihtopo ka xakn̂e anarî komo yawarpamachonho me okwe. Enmaxapu wara tak naxe okre.

3 Ayanan komo mepamnoyakn̂e. N̂examro marha mahworekn̂e xa. Apoko nahwowaxe tînatîrî yenmekn̂e komo wara. Apoko nahwowaxe tînar̂mathîrî komo yemyawnonho yekamyatawno wara marha.

4 Mician komo mar̂mapekn̂e pahxa Ixaw Yana komo ya, ero wa xa marha yîpîmtawnonho warai tak makuhr̂apekn̂e tawsîn̂emînhîrî oko. Emetanmekn̂enhîrî komo watmantho marha makuhr̂apekn̂e okre.

5 Ero yimaw tak waapanhîrî pen tatho tak nasî wehto kamerî me hara. Ero wa xa marha nasî noro yipu pen komo ponontho, kamxukremtho. Iitono komo wehtorî me mak tak nasî.

6 Taa, rikomo tak n̂ewruyasî kyanan komo xîkrî rma. Kyanan ya Kaan nîmyasî yumumuru. Noro motawno wara tak nas amn̂e kayaritomo me ehtopo. On wara tak nas amn̂e Noro yetacitopo, Kir̂wanî ro Kakîhren̂e, Kaan, Karitî ro, Kporin komo Eroromerono, Ahwokara kiin̂e kayaritomo ha. Ero wara nasî Noro yetacitopo.

7 Kayaritomo me tak n̂ehtîkesî miyan komo poko rma. Etar̂mara ro mak tak naxe Noro maywen komo. Miya roro kayaritomo me nasî etowîn me ro mak. Tapi pen yekenho yakan me nasî kayaritomo me, noro pen yaponho pona n̂eremesî. Takîhso mak n̂iir̂asî tmaywen komo. Noro ponaro xa tak n̂ehtîkexe miyan komo rma yaaro mak en̂ekano rirî ke, takîhso ciino rirî ke marha. Etowîn me ro mak nasî kayaritomo me. Kayaritomo me Noro ciitopo poko n̂eserepokesî ro mak Kporin komo, kantoman̂e ro. Ero ke Noro rma ero wa n̂iir̂asî.

8 Taa, on wara wîîkes hara, Xako yepamtho komo yîwîrîmacho poko nîmtapotai Kporin komo. Ixaw Yana komo po n̂epîrkesî yîmtapotarî yîwîrîman̂e komo me.

9-10 Ero yipu n̂encexe Eprain pono komo ahnoro, Samaria pono komo meero. Cehcoyoponkaxmu komo mîkyam kica. On wara kan̂e komo mîkyam, Kawau amnonoxapu tak n̂exixkekn̂e okwe. Wara rma mîîmotho yekenho pona kîmîn cicir̂axe xa hara toopu enporixapu tak. Sikamoru yepu ka xakn̂e knatîthîrî. Ero pen nametken̂e okwe kwapathîrî. Ekenhîrî na tko cicir̂asî setru yepu hara, kan̂e komo mîkyam. Ero wa kexe.

11 On wara tko n̂examro n̂iir̂asî Kporin komo, Hesin komo karihcesî Kporin komo. Ixaw Yana komo yemetanmecho ponaro mak n̂examro n̂iir̂asî.

12 Ixaw Yana komo mehxa naxe Siriu komo. N̂examro mokyaxe Ixaw Yana komo waparî me. Ixaw Yana komo mkai naxe Piristew kom hara n̂examro waparî me marha okwe. Noro yipu komo tak naxe Ixaw Yana pen komo yermomn̂e wara, cemtayankaxmu wara okwe. Wara rma etîrwoxinkara rma nasî Kporin komo. Tapockantaxi rma wa nas Noro n̂examro wece.

13 Cetapan̂enhîrî yaka etîramara ro mak tko naxe okwe Ixaw Yana komo. Kporin komo mtapotarî yenta xera rma naxe okwe, kantoman̂e ro mtapotarî yenta xera.

14 Ero ke on wara tak Ixaw Yana komo n̂iir̂as amn̂e Kporin komo, yîpîmkoton̂e komo wara nasî, matîhkoton̂e komo wara marha. Kuum yarî warai marha nîhkocesî, tuuwa warai marha. Ero wara Ixaw Yana pen komo n̂iir̂asî ero kaamo po rma.

15 Poritomo komo naxe yîhtîpîrî warai me, antomano rin̂e me cehsom komo marha. Weronomano rin̂e komo reha naxe matkîrî warai me hara. Cemaro poko panatanmekno rin̂e komo mîkyam kica.

16 Anato mak moxam panatanmekyaxe okwe akîhren̂e komo. Ero ke n̂examro yanme rma tak waihyaxe okwe.

17 Ero ke Kporin komo nasî ahwora kar̂pamxan komo poko. Yîmîhnî komo pînîn yawra marha nasî, iin̂o waixapu komo pînîn yawra marha. Ahnoro rma naxe kir̂wan wara cesenposom me tohnaw ro mak kica. Kicicitho pokono me mak naxe okwe. Kicicitho poko tîmtapotaxmu me marha naxe miyan komo rma. Ero ke etîrwoxinkara rma nasî Kporin komo poko so. Tapockantaxi rma nasî n̂examro wece.

18 Wehto wara rma nasî kicicme ehtopo komo. Cekyekyem yakn̂in̂e wara nasî. Comota yakn̂in̂e wara marha nasî weewe yakn̂in̂e wara. Kahsî ro mak nawomyasî yîsîn.

19 Kporin komo rwonî rma nasî roowo yakn̂in̂e wara. Wehto kamerî wara rma naxe iitononhîrî pen komo oco. Takno komo pînîn yawra ro mak naxe okwe.

20 Kar̂me n̂etaknamexe tînahrî komo yahsîtome. Wara rma nîromanaxe. Poowa me n̂etaknamexe hara ceseresmachome so xa hara. Wara rma erepotara naxe okwe. Tapothîrî komo meero non̂exe okwe.

21 Eprain pono pen komo tonon̂e wara naxe Manases pono komo. Manases pono pen komo tonon̂e wara naxe Eprain yepamtho kom hara. N̂examro tak n̂etakronomexe Xuta pono pen komo waparî me hara okwe. Ero wa exiche so rma etîrwoxinkara nasî Kporin komo poko so. Tapockantaxi rma nasî n̂examro wece. Ero wara nasî.