On wara marha wîîkes awya so, cetwîrîmaxmu me naxe ro mak okwe kayaritomo komo, kicicitho poko antomano rin̂e komo kica. Ero wa xa marha naxe emetanmekno ritopo pokono mewren̂e kom hara, iyopo so antomano rin̂e kom ha.

2 Ero wara cesemetanmesom komo n̂emetanmetîkexe okwe. Cesemetanmeso rma re naxe oyanan komo, anarî komo. Miya xexa tko n̂examro pen n̂emetanmetîkexe kayaritomo komo tohnaw ro mak okwe. Iin̂o waixapu komo n̂emetanmekyaxe okwe, yîmîhnî komo yemyawnonho marha nowyaxe okwe.

3 Ero ke ahce wa thakwa mat amn̂e kicicme awehtoponhîrî komo yepetho yahsîtopo me tak enmayataw? Ahce wa matu meyeno komo tak mokyataw awewton pen komo yixkatîkaxi? Onok yaka tak memahciyatu akurunpetome so? Ahna ma re mînomyatu awemyawnonhîrî pen komo okwe?

4 Waapa nahsîtho komo chew thakwa mak maxe okwe. Anarimaw mîwaiyaxe twaihkaxmu pen komo yakro ro rma okwe. Ero wa nasî Kporin komo noro yipu komo poko. Wara rma etîrwoxinkara rma nas okwe. Tapockantaxi rma wa nasî noro yipu komo wece.

5 Taa, Asiriu pen komo marha naxe cetwîrîmaxmu me ro mak amn̂e. Owatman warai rma re mîkyam, oyanan komo poko orwon yenpotopo ha. N̂examro yemyawno wara rma nasî orwon, owatman wara rma nasî.

6 N̂examro wen̂epesî Kaan ponarono pîn komo waparî me. Orwonmekn̂e komo waparî me wen̂epesî. Oponarono pîn komo yemyawnonho yaatopo poko wantomesî, oponarono pîn pen komo yapihtopo poko marha. Apacakrî yapikn̂e wara rma napikyaxe okwe. Ero poko Asiriu komo wantomesî.

7 Ero warahra tko nîhtînoyasî Asiriu komo kayaritomon, anarme mak nîhtînoyasî noro reha. Waihkatîkano ritopo mak nîhtînoyasî noro. Yakeno yar̂ma xe nai noro kayaritomo pen komo, tmayweyemînhîrî pen kom ha.

8-9 On wara kesî Asiriu komo kayaritomon, Kayaritomo me cehsomu rma omaywen yantoman̂e komo. Kahkemisi pono pen komo warahra ma re natu Kawno pono pen kom hara? Ahpaci pono pen komo warahra ma re natu Aamaci pono kom hara?. Tamasku pono pen komo warahra ma re natu Samaria pono pen komo hara?

10 Mîk hak warai me ciixaputho ponaro xatken̂e mîk hak rowon pono komo. Yîrowonthîrî komo rma tko wahsîyakn̂e. Kir̂wanhe enporixapu me xakn̂e ponaro n̂examro pen yehtoponho. Xerusaren po nasî ponaro iitono yehtopo mko ero yopono me xakn̂e onar̂matho komo n̂iritho, Samaria pono mko yopono me marha xakn̂e yin̂irithîrî komo.

11 Samaria pono pen komo war̂mai ponaro ehtoponhîri komo yakro rma. Ero ke ar̂mara ma re wai Xerusaren pono pen komo ponaro n̂examro yehtopo komo yakro marha? kesî. Ero wara kesî Asiriu komo kayaritomon.

12 Ero ke on wara ka nasî Kporin komo, Siaw Yîpîn pono pen komo ka panaresî, Xerusaren pono pen kom ha. N̂examro pen panaretîkache tak Asiriu komo kayaritomon makîrha tak wîwîrîmes hara. Cehcoyoponkaxmu mak mîk kica. Anarî komo yopono me mak keenîn̂e mîk ha kica. Ero ke noro pen makîrha wîwîrîmesî.

13 On wara kan̂e mîk, Kar̂pe exirî ke oyamorî ar̂mano wiir̂e, takîhso oyexirî ke marha. Yuhnari yîhtînon̂e ow ham okre. Tooto komo rowon wokpan wetakai, anana wiir̂e. N̂examro purantan mîn yawnonho marha waare. N̂examro kayaritomon pen war̂mai karitî me oyexirî ke.

14 Kapikara pume cenmekyasî akowerî yawnonho ero wara rma oyamorî ke roowo poko hakno komo yemyawnonho wepore censo ro. Wenmekye marha. Ero wa ahsîyataw owya powpow kahra ro mak xakn̂e cewn̂e n̂hema, piwpiw kahra marha xakn̂e, kan̂e mîk kica. Ero wa kan̂e mîk kica Asiriu komo kayaritomon.

15 Ahce wa nîîke yawaka awya so, Okre, weewe wames owî rma, nîîke ha ma re tîîke aman̂e ya? Ahce wa nîîke sahsa tîîke yîhkoton̂e ya hara, Okre, weewe wîhkoces owî rma, nîîke ha ma re? Tahsîn̂e ma re n̂etape amoi awya so? Ketape ma re watma tanme ro mak weewetho pîn wara?

16 Ero wara karî ke yîwya on wara tak noro pen n̂iir̂asî Kporin komo, kantoman̂e ro, noro sowtatun komo yeper̂an tak n̂iir̂asî akpororen̂e komo me. Tupurukyem komo yakpororen̂e rma mîn n̂iir̂asî. Cepethîke xa nasî noro ponon, tporokye so nasî. Ero yipu yakn̂itopo wehto n̂iriyasî Kporin komo.

17 Ixaw Yana komo weyuru tak n̂etakîcesî wehto me oco. Ero wara tak nasî Ixaw Yana komo yakir̂waman̂e ro. Ero kaamo po rma Asiriu pen komo nakn̂iyasî. Noro natîrî warai nakn̂iyasî cekyekyem warai ha.

18 Kir̂wanî ro me mak n̂esenpexe Asiriu sowtatun komo. Comota wara ro mak naxe. Mararî warai me marha naxe naatî yewtî mexan warai me. Noro yipu komo rma nakn̂itîkes Kporin komo. Kar̂pen me n̂ehtîke n̂examro yekatî, yupun komo marha. Takporoyasî ro mak anarimaw kamotoyataw, ero wara xa marha naxe n̂examro.

19 Asak mak tak n̂ehtîkesî weewe komo noro rowon pono. Rikomo rma mewresî ero wicakno yukuknomacho ciki. Ero wara tak Asiriu pen komo n̂iir̂asî Kporin komo asak makno me tak ha.

20 Ero kaamo po tak on wara naxe Ixaw Yana komo, asakî mak tak naxe n̂examro yakwenho, Xako pen yepamtho komo. Ero yimaw tak tar̂man̂enhîrî komo pona enîhra naxe. Kporin komo pona mak tak n̂een̂axe, Ixaw Yana komo yakir̂waman̂e ro pona. Yaaro tak Noro pona n̂een̂axe.

21 Asak mak tak n̂etaknamexe Kporin komo wece hara. Ero wara naxe Xako pen yepamtho komo, asak mak n̂etaknamexe Kaan wece Karitî ro wece.

22 Mer̂pora ro makî ka na matu amyamro Ixaw Yana komo, axawa wara matu tuuna yecihtawno wara. Amn̂e tko asak mak tak n̂etaknamexe hara Noro wece. Anarî pen komo waihkacho n̂ekatîmyakn̂e Kporin komo. Ero wa kacho yaw roro rma tak waihkano n̂iir̂asî. Yukmarî wara rma nasî n̂examro pen komo waihkacho. Yaaro rma waihkano n̂iir̂asî.

23 Tîmtapotachonhîrî yaw roro rma tak waihkano n̂iir̂asî Kporin komo, kantoman̂e ro ha. Kanan poko hakno komo waihkesî.

24 Ero ke on wara kesî Kporin komo awya so, kantoman̂e ro Mîk kesî, On wara wîîkes awya so oyanan komo ya, Siaw pono komo ya, erasîra ehcoko Asiriu komo pona. Awetapetken̂e so rma re watma ke, Exitu pono komo awetapetken̂e so ero wara rma Asiriu komo awetapetkexe so hara. Wara rma n̂examro pona erasîra ehcoko.

25 Yohno rma tak tîî kesî apoko so orwonîmtopo. N̂examro makîrha tak orwon n̂ekamexe hara waihkachome tak owya.

26 On wara nasî Kporin komo n̂examro poko, ososwa ke nîhyokyasî oco. Mician komo nar̂mekn̂e pahxa Orebe Tohrî mîtwo ero wara rma n̂examro nar̂mes hara. Tuuna yepore marha tamoyin nanîmyasî, Exitu po exitaw so nanîmyakn̂e ero wara rma. Ero wa naxe ar̂mano ritopo ro po.

27 Ero kaamo po tak tawsîn̂em n̂etanîmyasî amotawnonhîrî komo, awya so noro yînarpotho. Apîmtawnonhîrî komo marha n̂etaxikwesî yin̂irithîrî komo. Ero wara n̂etaxikwesî Kporin komo nîhkapetho me awexirî ke so.

28 Mokyaxe rma tko ka Asiriu komo. Ayace pona mokyaxe, Mikron pore mokyaxe. Mikmasa po tukurun komo n̂ermonoyaxe mîîmo yaka.

29 Îîpî katîhwo roro mokyaxe. Xeeba pona n̂etakriyaxe. N̂eraswaxe ro mak Haama pono komo. N̂emahciyaxe Xibeia pono komo, Sawru pen yewtontho pono kom ha.

30 Awratacoko amyamro Karin pono komo yemsîrî. Waapa komo mokrî entacoko Rais pono komo. Okwe ro mak, wîîkesî Anatoce pono komo poko.

31 Macmena pono komo marha n̂emahciyaxe. Ceseyamtopo komo yeposo cexe Xebin pono kom hara.

32 Nobe po rma kokmamyaxe. Siaw yemsîrî yîpîn pono komo wece tamorî namnonoyasî etapan̂e wara oko. Xerusaren Yîpîn yetapan̂e wara pokupoku kesî tamotîwîn ke. Ero wara mokyaxe Asiriu komo.

33 On wara tko nasî Kporin komo n̂examro poko, peremkan̂e wara nasî. Eepu warai komo namesî, kawno warai pen komo. Kar̂pen me tak n̂enpesî karitî me cesehtînosomînhîrî komo.

34 Weewe komo namesî yawaka ke ametawno wara. Ribanu pono komo n̂epîrkexe Karitî ro yanme. Ero wara nasî Kporin komo weewe warai komo poko.