Taa, pahxaro tak weewe mîtî warai petawasî. Xese pen pokono rma mîn, weewe mîtî, kacho. Noro micin natîkwasî weewe peremru wara.

2 Noro ropotaw nasî Kporin komo Yekatî. Kakîhren̂e Mîk Noro Yekatî, yuhnari yîhtînon̂e me kiin̂e marha. Ero wa xa esko, kan̂e marha Mîk Noro Yekatî, karitî me kiin̂e marha. Mîn hak poko kîhcamhokan̂e marha Mîk Noro Yekatî, Kporin komo ponaro xa kiin̂e marha. Noro yipu nasî peremru warai ropotaw ha.

3 On wara nasî Noro, kir̂wan̂he ro mak n̂een̂asî Kporin komo poko tweeno komo. Tooto yehtopo yetacira nasî esenpotopo yanme mak. Ero wa xa mîxakn̂e, kahra marha nasî tapota yentacho yentarî ke mak.

4 Cesemetanmesom komo yepanîn̂e Mîk, roowo pono komo yepanîn̂e ha. Tîrwonporem komo yepanîn̂e marha Mîk ha. Takîhso n̂epanîyasî. Yîmtai rma n̂epatakesî amoi warai roowo pono komo yetapacho. Yîmtai marha n̂epatakesî Noro yapepen, kicicitho komo waihkacho okwe.

5 Kir̂wanî ro me ehtopo nasî Noro yaan̂apotun warai me. Kemîknon̂e pîn me ehtopo marha nasî aan̂apotun warai me hara.

6 Ero yimaw robu tak n̂enmayasî kahn̂eru komo yaw rma. Kabritu yawxari rma n̂etîrapesî reopatu. Iito re n̂etar̂axe paaka xîkrî, reaw yakro, karpamxan yakro. Paaka yupurukrexapu marha cesî noro yipu komo yakro. Noro yipu komo rma naar̂asî rikomo ciki.

7 Cuupu tak nahyasî paaka uhsu yakro. Iito re marha tak n̂etîrapesî uhsu xîkrî paaka xîkrî yakro rma. Puruma yeputho yahn̂e me tak nasî reaw paaka wara rma.

8 Okoi yewtarî mîtwo rma n̂eseman̂iyaxe rikomo komo moomo yeen̂e komo rma. Okoi yewtarî rma napeyasî rikomo komo moomo yahsîpînkan̂enho komo rma.

9 Keskara ro mak tak nasî oyekenî ro pono komo, îh pono komo. Waihkano cirihra marha nasî. Tawronohkatîkaxi tak nasî roowo ahnoro Kporin komo yehtopo yentacho ke. Tukmaxi nasî tuuna imo tuuna ke, ero wara rma nasî roowo amn̂e Kporin komo yehtopo yentacho ke yukmaxapu wara nasî.

10 Ero yimaw on wara nasî, Xese micin, kacho. Xenciw komo n̂enîrî me n̂ecececesî, Ow xa akayaritomon komo, kacho me cesenpotome yîwya so. Cececetoso mak nasî iito, ekaritoxapunhîrî. Kir̂wanî ro mîn okre Noro yeken.

11 On wara marha nasî Kporin komo ero po rma kaamo po, tamorî n̂ehyatkesî xa hara tîyanan komo yakwenho yenmeso hara. Asiriu chewnonho n̂ekyasî, Exitu pono komo chewnonho, Patîroso pono komo chewnonho, Eciope komo chewnonho, Eran pono komo chewnonho, Sina pono komo chewnonho, Amace pono komo chewnonho, ciwya pono komo chewnonho, iitononhîrî komo n̂ekyas hara oona.

12 Ero yimaw marha tak Ixaw Yana komo banteiran nanîmyasî. Ero ke mîk hak roowo pono komo marha n̂enmekyasî tîhyaka. Ixaw Yana komo marha n̂enmekyasî, anarî komo rowon pona en̂epexapunhîrî komo. Cetakpaxi naxe Xuta yepamtho komo amn̂e mîn hak roowo pononho komo. En̂exa rma tko n̂examro n̂enmekyas hara Kporin komo.

13 Ero yimaw tak Xuta yepamtho komo poko yîrwomra naxe Eprain yepamtho komo tîyopono me so exirî komo poyero. Ero yimaw marha Xuta yepamtho xatî pîn komo tak n̂ehcamnoyaxe. Kyopono me naxe kica Xuta yepamtho komo, kahra tak naxe Eprain yepamtho komo. N̂examro yemetanmekîra marha tak naxe Xuta yepamtho kom hara.

14 Piristew komo motawno wara rma mokyaxe kaamo yemicitopo yaw roro. Iito re cexe kaamo yepatakacho n̂ixan komo yemyawnonho yahsîso hara. Eton pono komo marha nahsîyaxe tmaywen komo me, Moabe komo marha. Xuta yepamtho komo yewetîn̂e me marha naxe Amon yepamtho kom hara.

15 Ero yimaw tuuna imo yukuhyan tak nuturpamnoyasî Kporin komo exihra cehso ro, Exitu yecihtawnonho pen ha. Tamorî ke marha pokupoku kesî Tuuna Yepu yepoi. Puu kesî ro mak Noro kar̂pe ro mak ero yimaw. Tuuna Yepu pîtho komo tak napainokesî 7 me cehsom kom ha. Ero ke yarinho pore mak tak wacexe tooto komo tîhtarî koomo po rma.

16 Ero yimaw marha esama tak nasî iito kir̂wan. Kporin komo yanan yakwenho komo mohtopo me tak nasî, Asiriu komo chewnonho mohtopo me ha. Pahxa xakn̂e esama Exitu poi Ixaw Yana komo mohtoponho, ero wa xa marha nasî Asiriu komo yesamarî hara amn̂e. Ero wa ehtopo komo me tak n̂enmayas amn̂e, kaamo ha.