Taa, ero kaamo po on wara tak mîîkexe, Apa kah yawno, kir̂wan̂he awehtopo poko kîmtapowasî. Pahxa opoko mîrwonakn̂e. Metîrwoxinkai tak ham opoko. Ow tak mahwores hara okre.

2 Yaaro tan wîîkesî, oyakir̂waman̂e Mîk Kaan okre. Ero ke Noro pona ween̂asî erasîra. Okariton̂e Mîk Xeopa Kaan, poko oyewanomacho marha Mîk ha. Oyakir̂waman̂e me tak nas okre.

3 Ero ke atunarî komo yanîmyatawno wara maxe, ahtoxapu yawno yanîmn̂e wara. Tahwore maxe ero yanîmyataw. Awakir̂wamacho komo pokono rma mîn, tuuna manîmyaxe, kacho.

4 Ero yimaw on wara marha mîîkexe, Kir̂wan̂he mai ham okre, kacoko Kporin komo ya. Anarî yana komo n̂entarî me ekatîmcoko yin̂irithîrî. Kosotî komo yopono ro xa Mîn Kporin komo yosotî, kacoko yîwya so.

5 Kporin komo poko ewanomacoko. Kir̂wan̂he kiin̂e ro Mîk Kporin komo, kacoko. Roowo poko hakno komo n̂entari me rma ero wa kacoko.

6 Siaw pono komo, awya so wîîkesî, kar̂pe ro mak amtapotacoko Kporin komo poko. Ero wa kacoko tahwore awexirî ke so. Kyopono xa Mîk Kir̂wanî ro, ponaro Ixaw Yana komo yehtopo ha. Ero ke tahwotapore xa nasî Noro poko.