1-2 Taa, Babiron̂a pono komo yar̂macho pokono wencekn̂e hara. On wara kacho wencekn̂e, Banteira anîmcoko îîpî meretwo rma. Eeeei, kacoko yîwya so. Pokupoku kacoko marha n̂examro n̂enîrî antomano rin̂e komo yewton pona mohtome so.

3 Onahsîtho komo wantomekn̂e. Osowtatun komo wan̂ikye orwonîmrî ke. N̂examro tak nahwowaxe opoko, tooto komo yopono me oyesenpetaw.

4 Wara hakî kacho wencesî îh pono komo mtapotarî. Mer̂pono pîn komo mtapotarî kopi. Wara ro mak kexe, mîk hak rowon pono komo mîkyam nîmtapowaxe, kayaritomo maywen kom ha. Sowtatu pen komo n̂enmekyasî Kporin komo etar̂maxi totohme so.

5 Meyeno komo xa mokyaxe, kaapu mapirî makatawno komo mîkyam mokyaxe. Kporin komo Mîk mokyasî tîrwon̂e. Tuwuhreke xa mokyasî. Ahnoro roowo pono komo waihkaxi mokyasî.

6 Awratacoko tak ha. Pahnoke tak nasî Kporin komo kamon. Ar̂mano ritopo me men n̂enmayasî amn̂e.

7 Ero yimaw tak amokar̂pera ro mak naxe ahnoro tooto komo. Nahwokexe ro mak ahnoro kîrkomo okwe.

8 N̂eraswaxe tak ha, n̂erewaxe tak oko, nahwokexe marha okwe. N̂erewaxe wooxam komo wara rma, cewrusom wara. N̂esekatkexe ro mak tîmîtwono komo yeen̂ataw. Wehto ke etahsîxapu wara nasî eepatarî komo.

9 N̂enmayasî men amn̂e Kporin komo kamon. Tooto pînîn yawra tak nasî Noro ero yimaw, nîrwonasî ro makî. Pohnî me tak roowo n̂iir̂asî. Kicicme cehsom pen komo waihkesî iitononhîrî pen komo.

10 Kweipora tak nai xirko, kah yawno mko, xir̂ko imo warai mko esenpora ro mak nasî. Kaamo marha nawarpanwasî enmayataw. Kweipora marha tak nasî nuun̂i.

11 Ero yimaw ahnoro roowo poko hakno komo wîwîrîmesî kicicme exirî ke so. Ow xa takîhsom, kan̂e komo wîtîtmamnoyasî. Ehcoyoponkan me ro mak tak wiir̂asî noro yipu komo. Kicicitho komo wiir̂asî cehn̂axmu me ro mak.

12 Ero yimaw exihra n̂he tak natu kîrkomo. Mer̂po mak nasî ooru kir̂wanî ro, ero wa xa marha naxe kîrkomo, asakî xa mak naxe okwe. Ooru esenpora nas ha re paayu wicakno, Opi pononho. Ero wa xa marha naxe kîrkomo ero yimaw.

13 Kaapu wewsîyasî ro mak ero yimaw, roowo marha n̂esewyatakesî anana n̂he. Ero wa nasî Kporin komo yîrwonîmtopo po, yîrwonîmtîketaw xa.

14 Ero yimaw tooto komo naxe kooso merkaxapu wara. Oper̂a wara marha naxe waaca yaka an̂ikîn wara. Ahnoro tak cexe tîyanan komo cheka, Tîrowonî ro pona tak n̂emahciyaxe.

15 Kîrkomo yeenataw rma noro yipu komo paraxkexe ro mak okwe. Ahsîxapu komo reha waihkexe kacipara imo ke okwe.

16 Yîmxîkîthîrî pen komo nar̂mexe yîîm komo weroro so rma. Toh pona so nar̂mexe kar̂pe, cewakrokaxi ro okwe. N̂examro yemyawnonho pen naatîkexe. Yihcinhîrî pen komo nahsîyaxe okwe.

17 Meca pono komo wiir̂asî ceserepokaxmu me n̂examro poko. Prata ponarora ro mak naxe. Ooru wahsîyas okre, kahra marha naxe.

18 N̂examro krapan tak waihkesî kar̂pamxan komo, wakrokesî ro mak okwe. Wooxam ropotainonho komo pînîn yawra marha naxe okwe. N̂expe rikomo komo, kahra marha naxe.

19 Babiron̂a wara rma exi xe wasî oyewton, kexe mîk hakî, kayaritomo komo. Cenporem xa okre kewton komo, kexe Kawtew komo ero poko. Kaan kamon po tak Babiron̂a tak exihra nasî Sotoma pen wara rma, Komoha pen wara marha okwe.

20 Tooto yeken me exihra ro mak tak nasî miya roro. Iina esekenmara ro mak naxe tooto komo miya ro mak ehretawnomaxapu komo rma. Iina tîronan komo cirihra ro mak naxe Arabe komo, tîmîn me cirihra. Oper̂a yosom komo marha iina cirihra natu tooku wacan.

21 Kamara warai komo mak n̂etîrapesî iina, axawa pono ro komo. Tooto mîntho yaka tak waw kan̂e n̂iir̂a takowerî, mer̂pora ro mak nai iito. Apeseturusu marha n̂enmayasî iito, kooso warai marha nahronasî iito okno pîn.

22 Howhow kesî tak rokohci warai komo iito. Kayaritomo mîntho yaw rma nasî onok na komo. Pahnoke tak nasî ero wa Babiron̂a pono pen komo yîwîrîmacho. Cerepore iitono komo yehtopo yenmamnopîra nai Kporin komo. Ero wa nasî.