Ero warahra reha nasî Kporin komo Xako yepamtho komo poko, n̂examro pînîn yaw nasî. Yînmen̂ekathîrî me rma naxe Ixaw Yana komo. N̂examro n̂ekenmesî xa hara yîrowonî ro komo pona. Anarî yana komo tak nasî yîchewno komo me. Xako yepamtho komo yakrono me tak naxe.

2 On wara marha naxe anarî yana komo ero yimaw, Ixaw Yana komo tak n̂ekyaxe hara oona ekenî ro komo pona. Ixaw Yana yanton me tak naxe. Kîrkomo naxe anton komo me, wooxam komo marha. Ero wa naxe anarî yana komo Kporin komo rowon po cexitaw so tak. Tahsîn̂enhîrî komo tak nahsîyaxe hara Ixaw Yana komo. Cemetanmekn̂enhîrî komo yantoman̂e me tak naxe hara.

3 Ero yimaw tak cepokaresom me tak awir̂axe so Kporin kom ha. Ahwora ka mîxatken̂e, meraswatken̂e marha. Epeman me thakwa awapicketîketken̂e so awantoman̂e komo. Ero ke tak cepokaresom me awir̂axe so Kporin komo.

4 Ero yimaw tak on wara mîmtapowaxe kakîhretopo me. Babiron̂a pono komo kayaritomon poko mîmtapowaxe. On wara mîîkexe, Enko ka, kemetanmekn̂enhîrî komo tak n̂ehcamnoi okwe. Tîrwon̂emînhîrî exihra tak nas okre, mîîkexe.

5 On wara marha mîîkexe, Kicicitho komo yamoyin naxikwekn̂e Kporin komo, kayaritomo yamoyintho.

6 Anarî yana pen komo yar̂man̂e me roro xakn̂e noro tîrwon me. Mîk hak rowon pono komo nantomekn̂e tîrwon me okwe. Noro penî tko nasî cemetanmesom me hara. Yukurunpen̂e exihra thakwa nasî.

7 Ero ke cerepore tak naxe roowo pono komo ahnoro. Ahwokamexpon me tak naxe ahnoro. Tahwore ro mak tak n̂ewanomexe okre.

8 On wara kexe yîwya, Babiron̂a kayaritomon ya, Siprexte yepu meero nahwowaxe awaitopo poko. Setru yepu komo marha nahwowaxe Ribanu pono komo. On wara kexe, Awaipuche amna yaman̂enho komo tak mokuhra naxe okre, kexe.

9 Wehto imo ywawno komo meero n̂eserepokexe apoko. Awenso mokyaxe iina awtoche. Waixapunhîrî pen komo n̂eserepokexe iina awtotopo poko. Antomano rin̂enho pen komo n̂eserepokexe roowo pononho komo. Awaponhîrî poi awomcoko, kexe. Ero wa kexe mîn hak pono kayaritomonînho pen komo yîwya.

10 Iina awtoche on wara kexe awya, Ai, kar̂pera tak mai amoro hara okwe amna wara xa marha? Amna wara rma tak mai hara okwe?

11 Cenporem me xa esenpoxapunhîrî tan tak mai haram wehto imo ywaw mak oco. Apoko tahwotacho komo raatî yorkara tak naxe amaywenînhîrî komo. Awakrî mak tak nasî awapon me. Aponon wara ro mak nasî awakrî kica, kexe. Ero wa kexe iitono komo Babiron̂a pono komo kayaritomonînho ya.

12 Taa, kwakwarî warai ya wiikes hara, enmaporo cesensom ya. Ahce wa awexirî ke kah yai mepîrkekn̂e? Ahce wa tak mehtîkai hara? Roowo pona ar̂maxapu wara tak mas okwe. Anarî kayaritomo komo maywen pen kar̂kan̂enho amoro.

13 On wara tko mîîkekn̂e aropotaw, Kah yaka roro kawomyasî. Oyapon tak wiir̂asî kaw xa xir̂ko yopo, Kaan nakîhtotho yopo. Îh pona marha keremesî enmekno ritopo pona. Iina keremesî meye xa nohce n̂ixan pona.

14 Tuuna yewru yopo xa kawomyasî kaw ro mak ha. Yîtîhkathîrî wara rma tak wasî, mîîkekn̂e kica.

15 Wehto imo ywaka xa matko ar̂maxapu me tak masî, ewtarî imo mapitaka roro en̂epexapu me okwe.

16 On wara naxe awenîn̂e komo amn̂e, awentîkexe ro mak. Apoko marha n̂eserepokexe. On wara kexe apoko, Moso ma moso roowo yewsin̂enho kopi, mîk hak rowon pono komo yahwokamexpon̂enho ha?

17 Pohnî me ro mak roowo ciin̂enho moso. Ero pononho yakn̂in̂enho moso ewto pen komo. Iitononhîrî pen komo nahsîyakn̂e ahrutome. Ahrunkan me ro mak nahruyakn̂e okwe, kexe apoko. Ero wara kexe.

18 On wara nas anarî komo yokoputho, kayaritomo pen komo yokoputho, cepethîkem yaw rma nasî poono yaw. Tporokye marha nasî ponon, een marha. Tîmîye ro so marha nasî okoputhîrî.

19 On wara kexe awya reha, Awokoputhîrî yewtatho yai reha awar̂metken̂e kr̂a. Weewe peremtho wara rma awar̂metken̂e ero pîntho wara rma. Waihkaxapu komo ponontho tar̂mesî kr̂a ero wara rma mas amoro tar̂maxmu me kr̂a. Kacipara imo ke paraxkaxapu komo cexe ewtarî imo yaka, iitono pona toh pona. Ero wara xa marha mas amoro hara. Anarimaw tooto pen yokoputho mak napikyaxe sowtatu komo, ero wara rma nasî awokoputhîrî tapihsom me kr̂a hara.

20 Kayaritomo pen komo yakro awahrura ro mak naxe arowon yîwîrîmachonhîrî yanme awya. Amaywenînhîrî pen komo marha mîwaikekn̂e okwe. Kicicitho xîkrî komo tak naxe etacin me ro mak. Ero ke ero wa xa marha naxe amxîkîthîrî pen kom hara okwe.

21 On wara kesî Kporin komo apoko, Yîmxîkîthîrî komo waihkacho marha ciicoko. N̂examro pen waihkatîkacoko yîîm pen komo yehtoponho yanme rma, kicicme ehtoponhîrî komo yanme rma. Ero wa waihkacoko ekaritora ehtome so, roowo yahsîtîkara marha ehtome so. Ekaritotîkache roowo tak men nawronohketîkexe cewton komo ke. Ero wara exihra ehtome so waihkacoko, kesî Kporin komo.

22 On wara marha kesî Kporin komo, kantoman̂e ro, Babiron̂a pono komo yar̂machome tak kawomyasî. Babiron̂a pen tak wîhcamnoyasî kr̂a. Osotîthîrî wîhcamnoyasî, ero po yîmtoxapunhîrî pen komo, yîmxîkîthîrî pen komo, epamthîrî pen komo marha. Ero warai komo wîhcamnoyasî kr̂a.

23 Waw kan̂e komo yeken me mak tak wiir̂asî. Krarasî me tak wiir̂asî ewtonthîrî komo. Wacmiiku ke ewtotho waiwesî. Mîîmo yixkacho, kacho rma mîn wacmiiku, kacho, kesî. Ero wara kesî Kporin komo kantoman̂e ro.

24 On wara kesî Kporin komo, yaaro xa wîîkesî cemaro pîn me ro mak. Ciino ritopo wîhtînoi pahxa ero yaw roro rma men wiir̂as amn̂e. Anarme cirihra ro mak wasî.

25 Asiriu komo war̂mesî orowon po rma. Oyeken po rma wapikyasî kr̂a îh po. Ero wa wîir̂asî oyanan komo yemetanmekîra tak ehtome so. Yîpîmtawno ke paaka ya tarara n̂ixikpexe osom komo, ero wara rma oyanan komo napickexe okwe, tîpîmtawnoyem wara rma. Ero ke ero yipu tak wowyasî ero yimaw. Motaw so tawsîn̂em yaan̂e wara marha n̂iir̂axe. Ero ke motawnonho yar̂man̂e wara marha wasî.

26 Ero wara nîhtînoyasî Kporin komo roowo poko hakno komo ciitopo. Noro rma moso mîk hak rowon pono komo ciin̂e tamorî ke. Etpoyino pîn ciin̂e Mîk ha.

27 Ero wara nîhtînoi Kporin komo, kantoman̂e ro. Ero ke onoke thakwa re Noro n̂ehn̂anmekya? Noro yaporî nasî cesehyatkaxi. Onoke thakwa re Noro porohkesî? Pîra ro thakwa mak.

28-29 Taa, on wara tooto ciitopo n̂een̂akn̂e hara Isaias Akasî waihtoponho po cimn̂ipu po. On wara kekn̂e Kaan yîwya, On wara wîîkes awya so Piristew komo, ahwotara ro mak ehcoko. On wara kahra ehcoko, Kwaparî komo xatken̂e amoi ke ketapan̂e komo wara. Amoyinthîrî tak nasî cetaxikwoso okre, kahra ehcoko. Ero wa kacho poko ahwotara ehcoko. Okoyi warai mîk. Ero ke noro yepamtho tak men n̂ewruyas amn̂e okoyi me xa hara, kaikokoro tîtosom warai, wehto warai me oco.

30 Cesemetanmesom xîkrî komo reha tak n̂een̂axe tînahrî komo, poturme ewruxapunhîrî kom ha. Erasîn me marha n̂etîrapexe cesemetanmesom komo. Amicin warai komo reha waihkesî Ow rooma yaka. Waipîn me yîmtoxapu komo waihyaxe rma ero yaka apoyinonhîrî pen komo, kesî Kporin komo.

31 Awratacoko amyamro ewto potawno komo, kar̂pe ro mak awratacoko amyamro ewto pono komo. Etkuixapu wara tak ehcoko yuxukrapamxapu wara. Ero wa tak ehcoko amyamro Piristew komo. Wehto yîsîn warai mokyasî nohce n̂ixa mer̂pono pîn. Kar̂pen exihra ro mak nasî n̂examro chew.

32 Akayaritomon n̂en̂epetho komo mokyataw, Ahce wa kapore nai yîwya so? On wara kapore nasî yîwya so, Siaw ciin̂enho Mîk Kporin komo, ewto ciin̂enho ha. Ero ke ero pona cexe Noro yanan komo, cesemetanmesom kom ha. Tukurui so cehtome so iina cexe, kapore nasî yîwya so. Ero wa kapore nasî.