Taa, on warai wencekn̂e hara Kporin komo mtapotarî Moabe komo pokono hara, Ai, on wara wîîkesî Moabe komo poko, n̂ecahtîkesî tak okwe Moabe komo pen yewtontho. Kiiri n̂ecakyasî, ooro rma n̂ecahtîkes okwe kosope rma.

2 Tibon pono komo cexe ponaro cehtopo komo mîn yaka, îh pona so marha cexe. Yîwrataxi mak cexe iina so. N̂ebo pononho pen komo pînîn yaw nîwracexe, Meteba pononho pen komo pînîn yaw marha. Kanahmuri yaw so naxe ahnoro, etpoci komo marha nasî tpahso.

3 Kumixitho yaw so mak n̂etar̂axe esama yaw so. Mîîmo meretwo so rma nîwracexe, ewto roron po so marha. Okwe okwe, kexe kar̂pe ro mak okwe.

4 Esbon pono komo marha nîwracexe, Ereare pono komo marha. Mooxe n̂esencesî yîwratarî komo Xaasî pona roro. Ero ke sowtatu komo meero nîwracexe Moabe sowtatun komo. Nahwokexe ro mak okwe.

5 Owrata xe marha wasî Moabe komo pînîn yaw. Miya ro mak n̂emahciyaxe n̂examro anarî komo, Soa pona roro n̂emahciyaxe, Ekraci Serisia pona roro marha. Ruice yesamari yaw n̂esawnukyaxe. Tîwratarî me so cexe. Oronain yesamarî yaw marha cexe. Iina tîcetaw so nîwracexe tpoyinonhîrî pen komo waihîrî ke okwe.

6 Tuuna marha napaitîkai okwe N̂imrin pononho. Twaihso tak nasî cuupu. Ahce na atîhtaxapu exihra ro mak tak nas okwe.

7 Pahxa cemyawno komo nahsîyatken̂e mer̂pora ro mak. Mîîmo yaka nîmcetken̂e. Ero tak naar̂axe aporî kwaka sawkeru ken̂arî kwaka.

8 Miya ro mak n̂encexe yîwratarî komo Moabe komo rowon wokpan pona rorono komo. Ekrain pona roro n̂esencesî, Bee Erin pona roro marha. Ero wa n̂esencesî yîwratarî komo mooxe ro mak okwe.

9 Kamxuku ken̂e nasî tuuna yepu Tibon yewkuru. Wara rma miya xe ro mak tak wekpesî kamxuku xa hara Tibon yewkuru yesuru me. Reaw marha wekpesî Moabe komo rowon poi emahcixapu pen komo yeskan̂e me, Moabe komo rowon po rma etîmtoxapu pen komo yeskan̂e marha mîk wekpesî. Ero wara Moabe pen komo wemetanmekyasî, kesî Kporin komo. Ero wara kesî.