On wara marha wîîkesî Moabe pen komo poko, kahn̂eru xîkrî arpocoko iitono komo kayaritomon yepetho me. Sera pona arpocoko miya axawa yeco pona. Siaw yemsîrî yîpîn pono komo yaka arpocoko.

2 Torowo xîkrî wara rma naxe Moabe wosîn komo. Anarimaw torowo xîkrî nar̂mesî yîson takowerî yai. Noro yipu powpow kes ha re tohnaw mak okwe. Noro yipu wara rma naxe Moabe wosîn komo. Ahnon yecihtaw naxe tuuna watotopo to.

3 On wara kexe Moabe komo, Amna akîhrecoko. Yîhtînocoko ka, ahna amna cee? Awekatî komo ciicoko kokmamxapu wara. Ero wa ciicoko kamarakataw rma. Emahcixapu komo eyamcoko. Waapa ya enpora ro mak ehcoko.

4 Ahyaw so mak n̂enmacowpe emahcixapu komo, Moabe pen komo. Waparî komo yeen̂ataw eyamcoko. Awemetanmekn̂enhîrî komo tak n̂ehcamnoyaxe hara okre. Waihkano ritoponho tak nîtîtmamyasî. Awapathîrî komo tak waihtîkace. Exihra naxe arowon komo po.

5 Pahxaro tak kayaritomo n̂iir̂asî Kporin komo ar̂manî ro. Kîpînîn yawno ro xa Mîk n̂iir̂asî. Yaaro mak ciino rin̂e Mîk okre. Tapi pen yepamtho rma Mîk ha. Yaaro en̂ekano rin̂e me nasî. Yohno so rma kicicitho komo n̂en̂ekesî. Noro yipu Kporin komo n̂iir̂asî kayaritomo me.

6 On warai komo mîkyam Moabe komo, Ow xa kir̂wan, kan̂e ro komo mîkyam kica. Cehcoyoponkaxmu ro mak mîkyam, anarî komo yanwekn̂e ro kom ha. Ero wara n̂examro yehtopo amna n̂encekn̂e.

7 Ero ke nîwracexe Moabe komo. Cekenhîrî komo pînîn yaw nîwracexe. Awratacoko rma, ahwora ehcoko uupa yuturpamnoxapu pînîn yaw, Kiiri Aresece pono komo natîrî yeperîrî nai kir̂wan. Ero pînîn yaw awratacoko ha.

8 Naawaiyasî mak okwe yînatîrî komo mararî pono, Esmon pono komo natîrî. Sibma pono komo natîrî marha naawaiyasî uupa yatîtho okwe. Mîk hak kayaritomon komo ero peremetken̂e kir̂wanînhîrî. Pahxa miya rma xakn̂e yînatîrî komo uupa yatî. Xase pona roro xakn̂e yînatîrî komo, axawa imo wece marha n̂esenmamyatken̂e. Miya marha tînatîrî komo n̂iir̂atken̂e tuuna imo yecihtaka roro.

9 Ero ke kîwracesî Xase pono komo yakro rma. Sibma pono komo natîrî pînîn yaw kîwracesî uupa yatî pînîn yaw. On wara wîîkes awya so Esbon pono komo ya, Ereare pono komo ya marha, oyewyokuthîrî ke rma kîhyasî mak. Pahxa memtaraketken̂e tahwore awexirî ke so. Tahwore ka memtaraketken̂e anatîrî komo yeperîrî yenîrî ke akîhxapu yenîrî ke. Tîtîtmamso tak nasî awemtarakachonhîrî kom okwe.

10 Tahwore exihra tak maxe anatîrî komo poko. Tawake exihra marha maxe okwe. Uupa yatî chew ewanomara tak naxe apoyino komo, emtarakara marha. Awokru komo yapikîra tak naxe okwe ewkukacho yaw. Awemtarakachonhîrî komo wîtîtmamnoyakn̂e.

11 Kîwracesî oropotaw Moabe komo pînîn yaw. Raatî yorkacho wara rma nas owratacho. Ohnaw xa kîwracesî Kiiri Aresece pono komo pînîn yaw.

12 Cexe rma re Moabe komo îh pona so ponaro cehtopo komo yakro yîmtapotaxi. Tanme ro rma n̂ekar̂kexe ero poko. Tohnaw ro kyam mak cexe ponaro cehtopo komo mîn yaka noro yakro yîmtapotaxi. Ero wara naxe Moabe komo okwe.

13-14 Ero wa kekn̂e Kporin komo Moabe komo poko pahxa rma. On wara tko kesî hara Noro oroto, osorwaw cimn̂ipu tukuknomapore nasî. Epethîrî pona cetapickaxmu nukuknomesî cimn̂ipu ero wa xa marha tukuknomapore nasî. Ero wicakî cimn̂ipu exiche tak Moabe komo yemyawnonho tak nasî yîmîtwono komo nîwîrîyakarî me. Ero wara nasî cepetîkemîn̂hîrî rma. Mer̂pora ro makî ka xatken̂e Moabe komo. N̂examro pen marha naxe yînwîrîyakarî me amn̂e. Asak mak tak naxe waipîn komo. Kar̂pen me marha naxe okwe. Ero wara naxe Moabe komo amn̂e, kes oroto. Ero wa kesî Kporin komo Moabe komo poko.