Anarimaw okaman po wîxakn̂e kosope. Yiixe oyehtopo ro wepor̂akn̂e iito. Enîhra rma wîxakn̂e okwe.

2 Ero ke on wara wîîkekn̂e, kîhcesî tak. Ewto imo pore kîwcesî miya xiya wara. Esama yaw so kîwcesî, yîhroron pore marha kîwcesî. Yiixe oyehtopo wepor̂asî, wîîkekn̂e. Ero ke eposo kîwcekn̂e. Enîhra rma wîxakn̂e okwe.

3 Porisia warai komo oyen̂atken̂e, ewto imo pore cetar̂isom komo. Ero wa etar̂ataw so oyen̂atken̂e. Yiixe oyehtopo yenîhra mîxatken̂e amyamro? wîîkekn̂e yîwya so.

4 N̂examro watoche rma tak yiixe oyehtopo ween̂akn̂e okre. Ero ke noro wahsîyakn̂e. Ahsîpînkara wîxakn̂e. Yememe mîn yaka waar̂akn̂e. Pahxa yîropotaw ketahsîyakn̂e rikomo me noro yamtakpon yaka xa waar̂akn̂e.

5 Ai, emasî komo, Xerusaren pono komo, on wara wîîkes awya so, yiixe oyehtopo men enpakara ehcoko. Tanme ro mak pakape amn̂e, wîîkesî. Ero wa wîîkesî pixkaru n̂entarî me rma, kooso woosî n̂entarî me marha, woskara pono n̂entarî me ha.

6 Taa, onoke mîkro axawa imo poi tmohsom. Wehto yîsîn wara mokyasî patawno wara. Kotopore mokyas okre. Miiha me kotowasî, anarî me marha kotoporem me. Twarawantaxmu komo yai taponukyasî kotoporem, sororono, ero me rma kotowas okre.

7 Saromaw tararan warai mîn mokyasî, enko xe. Sowtatu ke takronoi mokyasî noro. 60 sowtatu komo naxe akrono komo okyo. Erasînî ro komo mîkyam, Ixaw Yana kom ha.

8 Tkaciparai so naxe, sowtatu me tîtotopo poko enpamxapu mîkyam. Aan̂apotun komo poko cimiso nasî kaciparan komo yen eraspetono yen̂epetome kosope.

9 Taasom nakîhcekn̂e Saromaw, kayaritomo. Amna yapon mîn nakîhcekn̂e. Weewe ke nakîhcekn̂e, Ribano pononho ke.

10 Prata n̂iir̂akn̂e ecepu me, ooru tî n̂iir̂akn̂e ecetî me. Amna yapon tî nîmkarinomekn̂e poono ke camnarexapu ke. Yai tak nîratarinometken̂e emasî komo, Xerusaren pono komo. Kir̂wan ke nîratarinometken̂e yiixe cexirî ke so.

11 Amohcoko xiya emasî komo, Siaw pono komo. Kayaritomo yenso amohcoko, Saromaw yenso. Tarokoi nasî kayaritomo yarokorî ke. Yîson tî n̂iir̂akn̂e yîhtîpîrî pona, yipici yahsîtopo po rma n̂iir̂akn̂e kaamo po. Tawake ro mak ehtopo po rma arokorî n̂iir̂akn̂e yîhtîpîrî pona. Entamcoko xe.