Yiixe xa oyehtopo amoro. Cenpore xa keen̂asî. On̂enîrî mexan xa amoro. Xwaraxwarano yaro rma re awewru ween̂asî potkuku wara. Ahpoci ween̂asî kabra wara, mer̂pono pîn wara. Xireace Yîpîn yenîhton̂e komo wara ween̂asî.

2 Oper̂a komo wara ween̂as ayorî, oroto yîhpokaxapu wara, eyehxapu wara. Taknoi so nas ahnoro, cewyarono exihra.

3 Kir̂wan̂he ween̂asî amtarî picho, cucure. Cenporem okre amtarî. Ahtîpîrî yakawan ween̂asî marha xwaraxwarano yaro. Roman wara rma ween̂asî yîraconhîrî wara.

4 Tapi mîn wara ween̂asî apîmîrî, kawnon wara, sowtatu kurun mîn wara. Mîîmo wacan po takriso nasî kecen̂anî mko, 1.000. Sowtatu komo yecen̂an rma mîn iina akrixapu, karitî komo yecen̂an. Ero wara ween̂asî apîmîrî okre.

5 Amanatîrî ween̂asî pixkaru wara asakno wara, woosî wara. Asak hakno rma peen yarî nahya epemrutun chew. Ero wara ween̂as amanatîrî okre.

6 Kîwcesî tak îh pona, miiha yewtî pona. Matîwîn pona marha kîwcesî kotoporem yewtî pona. Iito enmarî momokyasî. Iito wasî cekatpankaxi ro.

7 Cenporem xa amoro, yiixe oyehtopo amoro. Yupunpon me awehtopo ciki exihra ro mak nas okre.

8 Opici amoro, amoko tak oyakro Ribano poi. Amana Yîpîn meretwononho kaika, Seen̂i meretwononho, Ehmon meretwononho marha. Reaw yeken poi kaika, reopahtu yeken poi ha, îh pono poi.

9 Opici amoro, oyepeka warai rma ha re. Ow mîpohketîkesî ro mak okre. Owece menwo, awarî pokono marha menpo owya tohkarara cepethîkem. Ero ke rma ow mîpohka okre.

10 Opici amoro, oyepeka warai rma ha re. Kir̂wan̂he ro mak nasî ooxe awehtopo owya. Tpoxwe rma re nasî uupa yukun. Tpoxwe marha nasî aponon pokono kotoporem. Knahrî poxuretopo marha nasî tpoxwe. Ooxe awehtopo xa tko nasî kir̂wan̂he xa tak okre.

11 Opici amoro. Cipicipi kesî amtarî picho wen yamicho yaino wara. An̂uru makataw nasî paaka mownu warai, ween warai marha. Kotoporem xa mîn aponon Ribano kotorî wara okre.

12 Opici amoro, oyepeka warai rma ha re. Naatî warai amoro, twacayem wara. Wacan metatan nasî tahruso, cewkaxi marha, ero warai amoro. Tuuna pîtho warai marha amoro, ahruxapu warai. Ero warai amoro.

13-14 On warai anatîrî, roman yepu, anarmerpan anatîrî, tpoxwem me cepetaxmu yepu, eena, nahtu, asapuraw, karamu, kan̂era, anarmerpan ke kotoporem yepu, miiha, aroe, knahrî poxuretopo ahnoro, kir̂wanî ro ha. Ero wa nasî anatîrî.

15 Tuuna pîtho warai marha amoro naatî chewno warai. Tuuna yepu me n̂epatakesî porin yai, tuuna pîtho yai. Tuuna tak nîhcesî Ribano poi, ero warai amoro okre.

16 Taa, apakakî ocowo nohce n̂ixan. Suu n̂ixan marha amoko ocowo. Onatîrî pore puu kasko kotorî yakpachome miya so. Yiixe oyehtopo marha moku xe wasî tînatîrî pona. Iitono nahpe okre naatî yeperîrî kir̂wanî ro. Ero wece mokope yiixe oyehtopo.