Taa, kmoko tak onatîrî yewtî pona. Opici amoro, oyepeka warai rma ha re. Miiha yarî wenmekî, knahrî poxuretopo marha. Wen yamicho waapu, wen marha wemeu. Owokru weerî uupa yukun, paaka mownu marha. Taa, eseresmacoko rma cîw komo, oyakrono komo amyamro. Uupa yukun marha eecoko tmaxmitaxi ro. Yiixe oyehtopo komo amyamro.

2 Taa, anarimaw kîwînîkyakn̂e, cewkem wara rma tko xakn̂e oropotarî. Yiixe oyehtopo mtapotarî wencesî. Kneiknei kesî metata poko. On wara kes owya, Ai, opici amoro, oyepeka warai rma. Ahrunkakî ka metata ohyaka. Oyok warai amoro, potkuku warai. Kir̂wanî ro mak amoro okre. Ohtîpîrî nasî cicah ken̂e, tukre nasî ohpoci cicakî ke, kosope tmohsom ke, kes owya.

3 Ai ha. Kepononka okwe. Wamruya hara okwe? Kehtakoroka marha. Ohtarî wusmure haram okwe?

4 Ero yinhîrî on wara xakn̂e yiixe oyehtopo, tamorî numunukyakn̂e ewtarî yaro metata yewkachome. Ero yimaw yiixe tak wehtîkekn̂e.

5 Ero ke kîwcekn̂e metata yahrunkaxi yîhyaka. Miiha katî xakn̂e oyamorî poko. Cipicipi kekn̂e oyamoyaran poi metata yewkacho poko.

6 Metata tak wahrunkekn̂e yiixe oyehtopo yaka. Exihra tko xakn̂e okwe. Anana cekn̂e haram. Yiixe xa tak wîxakn̂e yîmtapotarî yentarî ke owya. Ero ke wepor̂akn̂e. Enîhra rma wîxakn̂e okwe. Osotî wetahcakn̂e kar̂pe. Eikura xakn̂e okwe.

7 Ero yinhîrî porisia warai oyen̂atken̂e, ewto pore cetar̂ataw so. Oyetapetken̂e oko cerewre ro mak oko. Waaca pono komo marha oyahsîyatken̂e, waapa yekahton̂e komo. Oyewopon naar̂atken̂e okwe xwaraxwarano pen.

8 On wara wîîkesî awya so, emasî komo ya, Xerusaren pono komo ya, Yiixe oyehtopo yeen̂ataw awya so on wara men kacoko yîwya, N̂ekar̂kesî ro mak apici okwe aaxe xa cexirî ke, kacoko yîwya, wîîkekn̂e yîwya so.

9 On wara ketken̂e emasî komo owya, Ahce wa xa nai aan̂o anarî wooxam komo yiin̂o yopo. Cenporem xa amoro anarî wooxam komo yopono. Ahce wa xa nai aan̂o anarî wooxam komo yiin̂o yopo ha? Ahce kacho ero wa mîîke amna ya? ketken̂e owya.

10 On wara weyukyakn̂e, Tumutwe nas oyin̂o, cewcure rma ha re. 10.000 exitaw on̂iyo yakrono komo iyopo so rma wa nasî noro cenpore xa okre.

11 Ooru mak mîn yîhtîpîrî, kir̂wanî ro mak ooru. Koikoipe nasî yîhpoci. Cicwiye nasî kohpu wara.

12 Potkuku wara nasî noro yewru, tuuna yecihtawno wara. Paaka mown warai ke rma nasî tîhso noro yewru. Kir̂wan̂he xa ciiso nasî ewru mîtî yaka.

13 Knahrî poxuretopo yepu wara nasî noro yeepatarî, iina re ciixapu wara. Tpoxun yakpan̂e wara nasî. Epemrutun wara nasî yîmtarî picho, miiha ke cipicipi kan̂e wara.

14 Amoyi wara nasî noro yaporî, ooru ciixapu wara ha. Xasintu ke tporokyem wara nasî. Erepanci yorî wara nasî yupun tmemehsem wara. Sapira ke tporokyem wara nas okre.

15 Mîîmo mapatan wara nasî yîhrepu marmore enporixapu wara. Aapo pona ciixapu wara nasî ooru pona. Ero wa xa marha nasî yîhrepu. Ribano wara rma n̂esenpes oyin̂o. Cenporem xa mîk setru yepu wara rma Ribano pono wara.

16 Tîkpore xa nasî yîmtarî. Ahnoro rma yupun cenpore nas okre. Ero wa xa nas oyin̂o, oyakrono ro ha. Ero wa wîîkes awya so emasî komo ya, Xerusaren pono komo ya.