Ai, cenporem xa amoro, wooxam, ahna tomo yiixe awehtopo. Ahtono yaw xa tomo esama yaw? Noro n̂epor̂as amna awakro.

2 Miya tomo yiixe oyehtopo tînatîrî yenso, knahrî poxuretopo yenso. Tooku nînahmesî iito naatî chew. Iitono marha pohcasî ririu okre.

3 Yiixe xa noro yehtopo ow, yiixe xa oyehtopo marha noro hara. Ririu chew tooku nînahmesî noro.

4 Yiixe xa oyehtopo amoro. Cenporem xa amoro okre, Cihsa wara rma okre. Enpotho xa amoro Xerusaren wara rma okre. Keserepokacho rma amoro sowtatu komo wara, tîbanteiran wenari tîtosom wara.

5 Miya cewru tak esko. Oyopo ro mak opohkesî awewru. Kabra wara nasî ahpoci Xireace Yîpîn yenîhton̂e wara, yakeno wara.

6 Oper̂a wara nas ayorî eyehxapunhîrî mohxapu wara. Taknoye re nasî, cewyarono exihra nasî.

7 Awewru mîtî n̂esenpesî rma ha re awewopon yaro. Roman wara rma n̂esenpesî, yîraconhîrî wara.

8 Naxe rma re yaake kayaritomo pici komo, 60. Opici warai komo marha naxe yaake, 80. Naxe marha emasî komo yukuknomarî yopo ro mak.

9 Cewn̂e makî tko masî potkuku warai owya. Kir̂wan̂î ro mak amoro owya. Anarî exihra ro mak nasî awarai. Amoro mak masî ason yemsîrî. Tîmxîkrî mexan me xa tî awen̂akn̂e anocwan. Anarî komo emasî komo tî awen̂atken̂e. Kaanî nwakretho xa mîkro ham, ketken̂e apoko. Enpotho xa mîkro, ketken̂e kayaritomo pici komo, yipici warai cehsom komo marha.

10 On wara ketken̂e apoko, Onoke xa moso wooxam, enmarî wara rma cesenposom? Cenporem moso nuun̂i wara. Kîkatparen̂e moso kaamo wara. Keserepokacho me nasî sowtatu pen wara rma, banteira wenari tîtosom wara, ketken̂e.

11 Ero yinhîrî naatî yenso kîwcekn̂e tîtko warai yenso. Yar̂kwetkuru yenso kîwcekn̂e. Naawa tak na weewe woskara pono, wîîkekn̂e. N̂epemrutunwa tak na uupa yatî, roman yepu marha na, wîîkekn̂e marha. Ero ke enso kîwcekn̂e.

12 Ahce wa tak ha na, yohno tak yiixe oyehtopo oyar̂akn̂e oyanan komo tararan cheka, kayaritomo tararan cheka ha.

13 Amok hara, amok hara, amoro Surami pono. Amok hara, amok hara awentîkachome amna ya. Ahce kacho noro yentîka xe matu, Surami pono yentîka xe ha? Maanain pono komo manîmrî mentîkexe ero wa xa marha noro yentîka xe matu ahce kacho?