Taa, on wara kes hara Kporin komo awya so, On wara wîîkes hara awya so, anarî komo tak oyenî xe xatken̂e. Ahto nai Kaan? kan̂enho pîn komo mîkyam oyenî xe tak xatken̂e. Oyenî xatî pînînhîrî komo tak oyen̂atken̂e rma. Tan wasî, tan wasî, wîîkekn̂e oyosoken pîn komo ya rma.

2 Oyewetîn̂e pîn komo wece reha kapockanwakn̂e kaamo poko roro an̂ihtome so. Kicicitho pokono ro mak mîkyam kica. Tanme ro so mak nîhtînoyaxe ahce na poko cehtopo kom okwe.

3 Orwonmekn̂e me roro naxe n̂examro, camra ro mak nîmtapowaxe oyakro. Tînatîrî komo chew so tîmsom nîmyaxe noro pîntho komo ya okwe. Kawau amnonoxapu ke tînîmrî komo yapon nakîhcexe. Ero pona so kotoporem nakn̂iyaxe okwe.

4 Tooto yocho chew ceremaxmu mîkyam. Anarimaw so n̂enmayaxe okoputho yewtatho yaw. Kuuxi pun tonon̂e mîkyam kica. N̂examro kaxaran me nasî mîk hak pun yewkuru, kicicitho yewkuru kica.

5 On wara kan̂e komo n̂examro, Iito esko, ohyaka mokuhra esko. Ow xa kir̂wan̂he wasî, pîra n̂he mas amoro reha, kan̂e kom ha. Kewnakwiikesî wehto yîsîn, ero wara mak naxe ero wa kan̂e komo owya. Wehto wara marha naxe owya, kaamo poko eseikanî ro wara.

6-7 Tmewreso nasî tan on̂enîrî kicicme n̂examro yehtoponho, kicicme n̂examro porin pen komo yehtoponho marha, kesî Kporin komo awya so. Kotoporem makn̂iyatken̂e mîn hak pona îh pona. Kicicme ro mak mîmtapowatken̂e opoko matîwîn po so. Ero ke tîtîtmamso mak exihra ro mak wasî. N̂examro poko kesepanîyasî, enaka so rma wiir̂asî epethîrî komo. Pahxa rma ahce wa na ehtopo komo wukuknomesî ero yecenarî xa marha emetanmetome so owya, kesî Kporin komo.

8 On wara marha kesî Kporin komo awya so, On wara nai uupa yukun anarimaw so, cewkremu rma nai mataxapu chew. On wara nîîke anarî potun̂e ya, Ar̂mara esko. Cewkremu mko rma cik nai ero chew, kexe. Ero wara xa marha wasî oyanton komo poko, ahnoro xa waihkatîkara wasî.

9 Xako yepamtho komo wepamnoyas hara. Xuta yepamtho komo marha wepamnoyasî îîpî yahsîn̂e me, oyeken mamhokono komo yahsîn̂e me. Oyananî ro me onahsîtho komo iina n̂esekenmexe. Iitono ro me tak naxe oyanton komo.

10 Saron tak nasî kahn̂eru wacan me. Akoro woskaran tak nasî paaka yetîrapotopo me. Iito so nasî oyanan komo yoku, oyenî xatî komo yok ha.

11 Kporin komo yahsîpînkan̂e tko amyamro okwe. Oyekenî ro ponarora ro mak maxe îîpî ponarora. Pohtuna nahrî metakexe kica. Tescinu ya tîmsom marha metakexe wooku kica.

12 Ero ke kukuknomexe so kacipara imo namarî me. Ahnoro amyamro mutupenwaxe awaikachome so kr̂a waapa komo ya. On wara mîxatken̂e okwe, Amohcoko ohyaka, wîîkekn̂e cma re awya so. Ow eikura ro mak mîxatken̂e okwe. Kîmtapowakn̂e cma re awakro so. Omtapotarî yentara mîxatken̂e okwe. Kicicme mîxatken̂e owero ro rma. Yiixera oyehtopo poko awexi xe mak mîxatken̂e kica. Ero ke twaihkaxmu me kiir̂axe so, kesî Kporin komo awya so.

13 Ero ke on wara kesî Kporin komo Kaan awya so, N̂eseresmexe amn̂e oyanton komo. Amyamro reha maxe rooma poko. Wooku n̂eer̂axe oyanton komo. Amyamro reha wokumra mak maxe okwe. Nahwowaxe oyanton komo, amyamro reha maxe tahwokaxmu me okwe.

14 N̂ewanomexe oyanton komo tahwore cexirî ke so. Amyamro reha mîwracexe ahwora ro mak awexirî ke so. Okwe okwe, mîîkexe ahwora awexirî ke aropotaw so.

15 Awosotîthîrî komo tak mahsîpînkexe onahsîtho komo yîwîrîmacho me exirî ke. Awaikexe so Aporin komo Kaan. Anarî me tak tanton komo nosohcesî.

16 Ero yimaw tak twakrecho komo xe cexitaw so arowon pono komo Kaan xa n̂etahcaxe twakren̂e me, kemîknon̂e pîn ha. Anarimaw apoyino komo nîmtapowaxe ahce poko so na cehtopo komo poko. Towîhnî me ro mak nîmtapowaxe. Ero wa ketaw Kaanî rma n̂etahcaxe, kemîknon̂e pîn ha. Ero yimaw tak n̂ehcamnoyasî awesemetanmetoponhîrî komo. Weyamyasî tak enîhra tak oyehtome.

17 Taa, pahxaro tak yaxan tak wakîhces hara kaapu komo. Yaxan marha wakîhcesî roowo hara. Pahxantho komo ponarora tak maxe. Twen̂ekarî tak maxe ontho poko.

18 Ero ke tawake tak ehcoko onakîtorî poko. Ahwotacoko ero mko poko miya roro ahwokan me ro mak. Xerusaren tak wakîhcesî iitono komo yahwotacho me okre. Tahwotaxmu me wiir̂asî ero pono komo.

19 Ow marha kahwowasî Xerusaren poko. Tawake wasî oyanan komo poko. Iitono komo yîwratacho yesentara ro mak tak nasî. Okwe okwe kacho esentara nasî ero po.

20 Ero yimaw exihra tak nasî ewruxan yohno rma twaihsom. Exihra marha nasî tooto poritomontatîkara twaihsom hara. Rikomo me mak waihye okwe, kexe waihxapu poko 100 cimn̂ipu exitaw ewrutoponhîrî waihyataw. Yîwîrîmaxapu mîk ham okwe, mîîkexe kicicitho waihyataw 100 cimn̂ipu mak exitaw okwe ewrutoponhîrî.

21 Ero yimaw tîmîn n̂iir̂axe iitono komo. Ciriche ero yawno ro me tak naxe. Uupa yatî marha n̂iir̂axe tînatîrî komo me. Ero yeperîrî nahyaxe okre.

22 On wara ka xatken̂e okwe, tîmînî cma re n̂iir̂atken̂e, anarî tko xakn̂e ero yawno ro me okwe. Tînatîrî cma re n̂iir̂atken̂e anarî tko nahtîkekn̂e okwe. Ero warahra ro mak tak naxe oyanan komo amn̂e. Pahkî ro mak naxe oyanan komo waipîra, weewe n̂icimn̂ipunwasî pahkî ro mak ero wara rma naxe. Pahkî ro mak nahwowaxe oyanton me onmen̂ekatho komo tîn̂irithîrî komo poko.

23 Tohnaw etapickara tak naxe ero yimaw. Nîmxîkwaxe marha, esemetanmekîn me mak naxe yîmxîkrî komo. Kporin komo nakronomatho yepamtho me mak naxe okre. Ero wara naxe n̂examro amn̂e, ero wa xa marha naxe epamthîrî kom hara.

24 N̂examro wakronomesî, Amna cma re makronomesî, kahra rma ka exitaw so owya. Anarimaw so ero wa ketaw so rma yîmtapotarî komo wencesî.

25 Ero yimaw iito re tak n̂eseresmesî robu, kahn̂eru xîkrî yakro. Puruma yeputho yahn̂e me tak nasî reaw paaka wara rma. Roowo nahyasî rma tko okoyi. Keskara ro makî tko nasî noro yipu komo oyekenî ro pono komo, îh pono kom ha. Eseskara ro mak tak naxe iitono komo, etwaikara marha naxe. Ero wara naxe amn̂e pahxaro, kesî Kporin komo.