Apa kah yawno, on wara wîîkes awya, kaapu yawka xe ro mak was awya. Amna yaka amoku xe ro mak wasî. Îîpî yesewsî xe ro mak wasî roowo po awexirî ke tak.

2 Yakuxwere poko n̂etahsîyasî wehto. Tuuna yenukren̂e me nasî wehto. Ero wa awexi xe wasî tan roowo po. Ero wara rma amoku xe wasî awosotî yentan̂e me xa ehtome so aaxatî pîn komo. Ero wara awosotî yentache tak tatan̂em me cma re miir̂asî mîk hak rowon pono komo.

3 Pahxa cirihnî mko miir̂akn̂e. Amna yeserepokacho mîn menpekn̂e, Kopi kacho ro mak amna ya. Roowo pona mîhcekn̂e. N̂esewsîyakn̂e tak îîpî amokrî ke. Ero wara miir̂akn̂e.

4 Kaan Amoro, anarî exihra ro mak nas awarai, ponaro amna yehtopo ro. Mehxa rono komo rma noro yipu yehtopo yentara xatken̂e, enîhra marha xatken̂e roowo yakîhtotoponho n̂ixa rono kom ha. Aponarono komo yakronoman̂e Amoro, pahkî amomokn̂e komo yakronoman̂e ha. Noro yipu yehtopo yenîhra ro mak xatken̂e.

5 On wara amna exi xe mas Apa, kir̂wan̂he cehtopo poko amna exi xe masî tahwore. Awehtopo ponaro mak amna exi xe masî eponarononkara. Noro yipu komo yakro eseposo mîmokyasî. Amna tko xakn̂e kicicme rma. Awehtopo yaw rorohra ro mak amna xakn̂e kica. Ero ke amna poko mîrwonakn̂e. Ero ke ahce wa thakwa re amna mukurunpe?

6 Tusmuyemtho wara tko amna n̂ehtîkekn̂e kica. Kir̂wan poko amna yehtoponho meero nasî poonotho wara, tusmuyemtho wara kica. Amna mak nuskuruminwasî katayarîtho wara kica. Ocowo wara nasî kicicme amna yehtoponho, amna yaan̂e me nas okwe.

7 Exihra ro mak nasî tukurunpetopo poko tîmtapotaxmu awosoken me cehtopo yanme mak. Awahsî xatî exihra ro mak nas okwe. Cesewyahrusom wara mak mas okwe amna yenîn̂e pîn wara. Amna kar̂kan̂e me mak masî Apa kicicme amna yehtoponho yanme rma.

8 Wara rma Apa, amna Yîîm Amoro. Er̂mo warai mak amna, amna kahn̂e mak Amoro. Anakîtothîrî mak amna ahnoro.

9 Apa, miya xe xa cma re yîrwomra mas amna poko. Eroromero kicicme amna yehtoponho ponaro exihra cma re masî. Amna cma re meen̂asî. Ayanan komo amna ahnoro.

10 Pohnîtho me ro mak nas awewtonthîrî komo okwe. Siaw meero nasî pohnîtho me okwe. Yarîhra ro mak nasî Xerusaren.

11 Cecahso tak nas amînthîrî Apa, cenporemînhîrî ha. Iito amna porin pen nahwowatken̂e apoko. Tîpîn̂e amna n̂enîtho tak nasî wemronho me mak, ahnoro rma okwe.

12 Kicicme amna exirî ke amna memetanmekpoi okwe Apa, amna xatî pîn komo ya. Ahce wa tak mai oroto, amna yakronomara rma katî mai? Tîtken̂e makî katî mai okwe? Amna katî memetanmetîke miya xe xa tak okwe? Ero wa cma re kes amna awya Apa.