On wara marha kesî Kporin komo, Onoke xa Moso mokya Eton poi? Onoke xa Moso Bosîra poi mokya? Yucurexapu yaw mokyasî poono yaw. Kir̂wanî ro mîn Noro ponon. Kar̂itî xa Mîkî. Kar̂pe xa cehtopo n̂enpesî tmokyataw. Owî rma Ow ha, mehxa tmohsom, kir̂wan̂he xa tîmtapotaxmu Ow. Cekaritosom xa Ow akir̂wamano ritopo pokono.

2-3 Ahce kacho cucure nai aponon? Uupa yewkukan̂e wara mesenpes okyo, ketaw yîwya on wara n̂eyukyasî, Wewkukai rma wa ha. Cewn̂e wewkukmai, kesî Noro. Oyakrono exihra ro mak xakn̂e ero poko oyexitaw. Orwon me wewkukai. Kîrwonîmtîkai n̂examro poko. Oponon n̂ecaramai n̂examro kamxukutho ke. Ahnoro tak oponon wucureye.

4 Oyesepantopo me tak wîhtînoyasî on kaamo. On cimn̂ipu nasî towno ritopo me owya.

5 Oyakrono cma re wepor̂akn̂e, enîhra rma tko wîxakn̂e okwe. Keserepokekn̂e oyakrono exihtorî ke. Ero ke oyaporî rma oyanan komo nukurunpekn̂e. Orwonî rma xakn̂e oyeceton̂e me.

6 Tîrwon̂e tak anarî yana komo wapikye. Ero yanme n̂examro wenatken̂e wooku yeen̂enho wara. Ero wara n̂examro wiir̂akn̂e orwonîmtîkarî ke. Karitînhîrî komo mîkyam war̂mekn̂e roowo pona, kesî. Ero wa kesî Kporin komo.

7 Taa, on wara wîîkes ow hara, kwakren̂e me Kporin komo yehtopo poko tan kîmtapowas hara. Kir̂wan̂he xa nai ham, wîîkesî Noro poko. Mer̂pono pîn ke kwakretken̂e so okre. Ixaw Yana komo nakronomekn̂e ro mak okre. Ero wa nakronomekn̂e yîpînîn yaw cexirî ke. Kakronoman̂e ro kaxi ero wa kakronmetken̂e so.

8 On wara cma re kekn̂e Kporin komo kporin pen komo poko, Oyanan me naxe n̂examro. Omxîkrî komo mîkyam cemarontanî ro kom ha, kekn̂e poko so. Ero ke n̂examro pen nukurunpekn̂e.

9 N̂examro pen yesemetanmekyataw so Noro meero nahwokekn̂e. Ancu tî n̂en̂epekn̂e Noro yawno ro rma. N̂examro kurunpen̂e me n̂en̂epekn̂e. Yiixe so xakn̂e, yîpînîn yaw so marha xakn̂e. Ero ke n̂examro nowyakn̂e yiixatî pîn komo n̂emetanmekîtho. N̂examro nanîmyakn̂e, naar̂akn̂e marha pahkî ro mak. Ero wa xakn̂e Noro pahxa n̂examro pen poko.

10 On wara tko xatken̂e n̂examro pen okwe, Kporin komo tak nanwekyatken̂e kica. Noro Yekatî nahwokamexpetken̂e ro mak okwe, Kir̂wanî ro. Ero ke yîhyai so tak n̂esewkor̂mekn̂e Kporin kom hara. Yiixatî pîn me tak xakn̂e okwe. Noro rma tak n̂etar̂mekn̂e n̂examro yakro okwe.

11 Ero yimaw tko on wara xatken̂e n̂examro, pahxan pen komo yehtoponho takî tî nîhtînoyatken̂e hara, Moises pen yehtoponho marha. Ero ke on wara ketken̂e, Tuuna imo kwai kporin pen komo n̂ekyakn̂e Kporin komo. Moises pen n̂iir̂akn̂e n̂examro yaan̂e me, oper̂a yaan̂e wara. Cekatî marha n̂iir̂akn̂e yîropotaka so, Kir̂wanî ro.

12 N̂examro pen narpekn̂e Noro Moises ya. Noro rma tko aano n̂iir̂akn̂e taporî ke rma. Kir̂wanî ro mak Noro yaporî. Ero yipu rma xakn̂e Moises karihton̂e me, akro tîtosom me xakn̂e, kari n̂ixa. Tuuna imo marha nîyotawnomekn̂e Noro Ixaw Yana komo yesamarî me. Ero wa n̂examro pen naar̂akn̂e cekaiporesom me tak cehtome miya roro eroromero ha.

13 Ixaw Yana komo naar̂akn̂e weyun yotari. Kawaru wara tî cetken̂e tuuna yotari, woskara pore tîtosom wara. Ehrokara ro makî tî cetken̂e.

14 Paaka komo cesî tuuna yecihtaka etîraposo ero wara n̂examro pen n̂iir̂akn̂e cepokaresom me. Kporin komo Yekatî rma noro yipu komo n̂iir̂akn̂e cepokaresom me. Ahto nai Noro ero wa ciino rin̂enho? ketken̂e. Ero wara xa ayanan komo maar̂akn̂e Apa kir̂wan me cekaiporesom me xa tak awehtome.

15 On wara wîîkes ow hara, Apa, kah yaw mas Amoro. En̂exa tak amna enko. Awekenî ro po masî kir̂wanî ro po. En̂exa amna enko. Ahto tak nai amna xe awehtopo, kar̂pe xa awehtopo marha? Amna xatî me xa ka mîxakn̂e, amna pînîn yawno me marha mîxakn̂e. Ero wara awehtopo yenpora mai hara amna ya?

16 Amna Porinî rma Amoro Apa. Oyanan komo n̂examro, kahra rma na nai Abraaw amna poko, Ixaw marha ero wa kahra na nai. Wara rma amna Porin me rma mas Amoro Apa. Pahxanînhîrî rma Mîk Ixaw Yana komo yown̂e, kacho me masî.

17 Ahce kacho amna mîwaimamnopoi Apa awesamarî yawno pîn me ehtome amna? Ahce kacho ceipuru wara amna ropotarî miire twerîhra tak amna yehtome apoko? Awanton amna, etîyananî re nas amna. Ero ke amok hara amna yakronomaxi.

18 Ayananî ro amna. Yohno mak tko amînî yenîn̂e me ka xakn̂e amna okwe. Oroto tak amînthîrî nas amna xatî pîn komo napikrî me mak okwe.

19 Pahxan pen komo wara mak tak nas amna, awanton pîn me cehsom komo wara. Awosoken mera ro mak xatken̂e n̂examro. N̂examro wara mak nas amna okwe. Ero wara nas amna okwe. Ero wa wîîkes awya Apa.