On wara wasî, Siaw pînîn yaw wasî, Xerusaren pînîn yaw ha. Ero ke iitono komo poko yîmtapotan me mak exihra wasî. Tîtken̂e mak exihra wasî. Kîmtapowasî rma iitono komo poko takîhso ehtopo komo cesenposo ro, weeyu wara cesenposo ro ha. N̂examro yakir̂wamacho cesenposo ro marha kîmtapowasî. Ramha wara n̂esenpesî n̂examro yakir̂wamacho amn̂e, potuhtoxapu wara xa.

2 On wara maxe amn̂e amyamro Xerusaren pono komo, kir̂wan̂he awehtopo komo tak n̂een̂axe Xenciu komo. Cenporem me awehtopo komo n̂een̂axe kayaritomo komo ahnoro. Anarî tak nasî awosot hara ero yimaw. Kporin komo rma awosohcexe so.

3 Aroko wara tak maxe ero yimaw cenporem wara xa okre, Kporin komo yamorî yawno wara rma. Kayaritomo yarokorî wara rma maxe, ponaro awehtopo komo yamorî yawno wara ha.

4 Ahsîpînkaxaputho, kacho me exihra tak maxe ero yimaw. Pohnîtho, kacho me exihra marha nas arowon komo. Tpoxwem, kacho me xa matko maxe. Ciin̂oyem, kacho me marha nas arowon komo. Ero wa Kporin komo awir̂axe so, tîpîn̂e xa awexirî ke so yîwya. Ciin̂oyem wara rma tak nas arowon komo ero yimaw.

5 Cipici me emasî nahsîyasî kar̂pamxan, ero wara xa marha awahsîyaxe amrerî komo cipici warai me. Cipici poko nahwowasî iin̂o oroto ka ahsîxapu poko, ero wara xa marha apoko so nahwowasî Kaan, ponaro awehtopo komo.

6 Ai, Xerusaren on wara wîîkes awya, waapa yekahton̂e komo wantomekn̂e awacan meretwono komo. Tîtken̂e exihra ro mak naxe katpanaw, kosope marha. On wara wîîkes awya so Kporin komo yakro tîmtapotaxmu komo, Yîtîtmamra ro mak ehcoko.

7 Xerusaren yakir̂wamacho poko amtapotacoko roro Kporin komo yakro. Yîtîhkan me amtapotacoko roro panapickan̂e wara. Ero wa ehcoko, Kir̂wanî ro komo mîkyam iitono komo, kachome roowo pono komo. Ero wara amtapotacoko Xerusaren poko kir̂wan̂he cehso ro.

8 On wara marha kesî Kporin komo, Yaaro xa tan wîîkesî, Anatîrî komo yeperîrî nas amn̂e puruma yeperîrî. Ero tîmîhra ro mak tak wasî aaxatî pîn komo nahrî me. Awokru komo cirirî poko mekaricexe uupa yukun poko ha, ero yerîhra ro mak tak naxe anarî rowon pono komo. Kari n̂ixa oyamorî wetahcasî yaaro omtapotarî yentachome awya so ero pokono ha, oyaporî marha wetahcasî, karitî xa.

9 Tînatîrî yeperîrî yenmekn̂enho komo rma nahyaxe tîn̂enmekîthîrî komo. Kir̂wan̂he nai ham okre Kporin komo, kexe ahyataw. Uupa yeperîrî potun̂enho komo rma yukun n̂eer̂axe. Omîn roronî ro po rma n̂eer̂axe, kekn̂e Kporin komo. Ero wa kekn̂e.

10 Taa, etocoko tak, waaca metatan yaro etocoko. Iina tîtosom komo yesamarî akir̂wamacoko. Îîpî katpîrî wara n̂he cik cicoko kaw n̂he. Toopu komo ar̂macoko marha esama yawnonho. Ero wa esama yakir̂wamache akayaritomo komo banteiran tak anîmcoko anarî yana komo n̂enîrî me.

11 Tîmtapotarî n̂entamexpekn̂e Kporin komo miyan komo ya rma, roowo yenatîtopo yawno komo ya meero. On wara kekn̂e, On wara kacoko Siaw yemsîrî ya, Awakir̂waman̂e komo men mokyasî. Awepethîrî komo n̂ekyasî. Epemano ritopo poko tak nasî oona tmokuche.

12 Ero yimaw on wara kacho me tak naxe Kaan yanan komo, Kaan yanan komo ro, kacho me. Kporin komo nowtho komo, kacho me marha naxe. Tpoxwem, kacho me marha mas amoro Xerusaren, Ahsîpînkan, kacho me marha masî. Ero wa cetacisom me nasî awewton komo, Xerusaren ha, kesî. Ero wa kesî Kporin komo.