On wara marha kesî Kporin komo awya so, Kporin komo Yekatî nasî okariton̂e me, Kaan Yekat ha. Ohkapekn̂e Kporin komo emyawnomnî komo yahwotacho yekatîmn̂e me. Ahwokatîkaxapu komo yehceman̂e me marha oyen̂epekn̂e, ahruxapu komo yahrunkacho yekatîmn̂e me marha.

2 Kîpînîn yaw ka nasî Kporin komo on cimn̂ipu po, kacho yekatîmn̂e me marha oyen̂epekn̂e. N̂esepanîyasî ro mak Kaan amn̂e anarî kaamo po, kacho yekatîmn̂e me marha oyen̂epekn̂e. Ahnoro tîwrataxmu komo yewyakîren̂e me marha oyen̂epekn̂e.

3 Siaw pono komo yewyakîren̂e me marha oyen̂epekn̂e, tîwrataxmu komo yewyakiren̂e me ha. Wemronho nai yîhtîpîrî komo po so. Noro yipu komo tak wiir̂asî cenporem me okre. Ahwotacho komo ke yîhkapen̂e komo me wasî yîwratachonhîrî komo yemtaka hara. Kir̂wan̂he Kaan nai ham okre, kacho wamrupesî yîwya so ponon komo wara. Ero wara kan̂e me n̂examro wiir̂asî, Ahce wa wai okwe? kan̂enho ha. Ero yimaw, Kir̂wan komo mîkyam, weewe yepu warai kom ha, kacho me tak naxe. Kporin komo natîrî mîkyam kir̂wanî ro me Noro yehtopo yenpon̂e kom ha, kacho me marha naxe.

4 Ewtotho komo po tak mîîmo n̂iir̂axe hara. Pahxa akn̂ixapunhîrî komo tak n̂iir̂axe hara mîîmotho komo. Pahxanî ro pen komo yewtontho n̂iir̂axe hara.

5 Anarî yana komo tak naxe awoh komo yenîn̂e me. Anarî rowon pono mumuru komo naxe amararîn komo pomon̂e me hara, anatîrî komo yenîn̂e me marha, uupa yatî yenîn̂e me ha.

6 Kporin komo ya tîmsom pokono mîkyam, kacho me tak maxe ero yimaw. Kaan maywenî ro komo mîkyam, kexe marha tooto komo apoko so. Xenciu komo nahrî yahn̂e me tak maxe okre, cepethîkem yahn̂e me ha. N̂examro yemyawnonho komo poko marha mahwowaxe, kir̂wanî ro poko ha.

7 Cehn̂axmu me mîxatken̂e amyamro. Amn̂e tak takîhsom me tak kenpexe so hara. Ero yinhîrî esewkukman me xa tak kenpexe so xa hara. Cehn̂axmu me ehxapunhîrî tak nahwowaxe ceken̂i ro poko. Asakî ro wemyawnomesî yîrowon komo po rma. Ero yimaw tak nahwowaxe ahwokan me ro mak okre. Ero wara oyanan komo wiir̂as amn̂e.

8 On warai Ow Aporin kom ha, yaaro mak ciino ritopo xatî Ow. Okno komo na nakn̂iyatu owya tîmsom me, en̂epanîmxapu tko na nîmyatu owya kica. Ero yipu tîmtopo xatî pînî ro mak Ow. Awemîknon̂e pîn komo me oyexirî ke n̂examro wakîhresî yaarono me ehtopo komo poko. On wara marha tak kîmtapowasî akro so, Kakronomexe so men amn̂e, wîîkesî yîwya so. Yaaro xa wîikesî yîwya so towîhnî me ro mak.

9 Ero ke tak n̂examro yepamtho yehtopo n̂encexe Xenciu komo. N̂examro yepamtho komo n̂ekaiwaxe anarî yana komo n̂entarî me. On wara kexe ahnoro n̂examro yenîn̂e komo, Kporin komo nwakretho komo xa n̂examro ham okre, kexe. Ero wara kexe n̂examro poko, kesî Kporin komo.

10 On wara was ow, Kporin komo poko kahwowasî ro mak okre. Tahwore wasî Kaan poko, ponaro oyehtopo poko. Oyakir̂wamacho namrupesî Noro owya oponon yamrupon̂e wara. Kir̂wan̂he oyehtopo yamrupon̂e wara nas owya. Tarokorî namruyasî kîîrî, cipitaxmu, wooxam marha n̂eporokucesî ciin̂otaxmu, toopuci mko ke n̂eporokucesî enporixapu ke okre, ero wara rma oyenporiy Kporin kom okre.

11 On wara nasî roowo, tatîhtaxmu yewtî me nas okre. Ero wa xa marha nasî mararî, iina ciixapu natîkwasî okre. Ero wa xa marha cehtopo yatîkren̂e wara nasî Kporin komo Kaan. Kir̂wanî ro me cehtopo natîkresî, tpoko kahwotacho marha. Ero yipu natîkresî mîk hak rowon pono komo wero ro. Ero yipu yatîkren̂e wara nasî Kporin komo.