On wara marha kesî Kporin komo tîyanan komo ya, Awomcoko, weipono ciicoko, aweyuru komo tak moko okre. Kir̂wanî ro me Kporin komo yehtopo nasî enmarî wara akatparen̂e komo me.

2 Awarpape nasî roowo ahnoro amn̂e. Awarpan chew mak naxe roowo poko hakno kom okwe. Awece so reha Kporin komo nasî cenmaxmu wara. Apoko so rma kir̂wan̂he Noro yehtopo n̂esenpes okre.

3 Xenciu komo tak mokyaxe amn̂e katpape awehtopo pona. Kayaritomo komo marha mokyaxe kir̂wanî ro me awenmacho komo pona.

4 Esewyaricoko tak, miya so encoko. Ahnoro rma n̂esenmekyaxe, ahyaka so mokyaxe. Meyenonhîrî tak mokyaxe amumuru komo. Awemsîrî komo marha tak naxe moomo yeen̂e wara, wen̂epu yawno wara.

5 N̂examro tak meen̂axe. Tawake ro mak tak maxe enîrî ke so. Tahwore ro mak tak maxe. Ayopono komo me mak nasî tahwore awehtopo komo. Awemyawno komo n̂ekyaxe tuuna kwaw tîtosom komo. Ccpethîkem xa tak n̂ekyaxe. Xenciu komo yemyawnonho tak n̂ekyaxe ahyaka so cepethîkem.

6 Kameru komo mokyaxe arowon komo yawronohkatîkan̂e me. Mician pono komo, Epa pono komo, Saba pono komo, ero wa mokyaxe kameru pen. Ooru n̂ekyaxe, kotoporem marha. Kir̂wan̂he nai Kporin komo okre, kexe ahyaka so tmokyataw so.

7 Oper̂a marha n̂ekyaxe awya tîmsom me. Toh komo n̂ehtîkexe Keta pono komo, oper̂a, N̂ebaioce pono komo marha n̂ekyaxe kahn̂eru anîmrî komo me. Owya tîmsom yakn̂itopo pona makn̂iyaxe. Kir̂wan̂he ween̂asî yînîmrî komo. Ero yimaw kir̂wanî ro me xa tak wenpesî omîn. Kir̂wanî ro me oyehtopo yenpotopo rma mîn omîn ha.

8 Onoke mîkyam kaapu smun wara tîtosom komo? Potukuku cesî takowerî yaka ero wara cexe, onoke mîkyam ha?

9 Ciwya pono komo meero omomokyaxe. Poturme mokyaxe Tahsisi pono komo kanawarî. Amumuru komo n̂ekyaxe meyenonhîrî komo. Tupurantan marha n̂ekyaxe amumuru komo, prata, ooru, ero wara. Cekaiporesom me xa tak nasî Kporin komo yosoti, ponaro awehtopo komo yosot ha. Kir̂wanî ro Mîk ponaro Ixaw Yana komo yehtopo. Amyamro marha kir̂wan me awenpexe so Kporin komo. Ero ke meyeno komo mokyaxe ahyaka so.

10 Anarî rowon pono mumuru komo tak n̂iir̂axe awewton komo wacan. Noro yipu kayaritomon komo marha wiir̂asî awakronoman̂e komo me. Ero wara was apoko so. Yihcirî me ka kîwîrîmetken̂e so okwe. Ero yinhîrî tak apînîn yawno komo me was hara.

11 Ero ke swaa wara nas awewton wacan metatan, eroromero nasî ero wara. Tahruso exihra ro mak nasî katpanaw, kosope marha. Ero wara roro nasî cemyawnonhîrî komo yehtome Xenciu komo ahyaka so. Cepethîkem n̂ekyaxe. N̂examro kayaritomon komo mokyaxe etîmkaw re.

12 On wara tko wiir̂asî anarî yana komo, anarî rowon pono komo. Awanwekyatu so tko anarimaw, anantomarî komo me cexi xera na natu. Ero wara exitaw so n̂etwîrîmexe ro mak okwe.

13 Weewe komo n̂ekyaxe Ribanu pono komo. Kir̂wanî ro mîn iitono weewe. On warai n̂ekyaxe ahyaka so, paia yepu, pin̂eru yepu, aramu yepu, ero warai n̂ekyaxe weewe ahyaka so. Omîn yakir̂wamacho me n̂ekyaxe. Ero wara ohtarî yapon wakir̂wamesî kir̂wan̂he cehso ro okre.

14 Awemetanmekn̂enhîrî mumuru komo tak mokyaxe ahyaka so. Nutupenwaxe tak amamakan me so. Ahnoro awîrîyakan̂enhîrî komo tak nutupenwaxe awamrinaka so cesewnaposo ro, ahtarî komo yecento so rma. On wara awetacaxe so, Kporin komo yewton pono ro komo amyamro. Siaw pono komo. Kir̂wanî ro yewton pono komo marha amyamro, ponaro Ixaw Yana komo yehtopo yewton pono kom ha, kexe apoko so.

15 Pahxa poxumnî me ro mak mîxatken̂e. Aaxera so xatken̂e tooto komo, ahyari so tohra xatken̂e okwe. Ero warahra tak maxe amn̂e. Kir̂wanî ro me tak kiir̂axe so amn̂e eroromerono me okre. Miya roro ehretawnomaxapu komo rma nahwowaxe apoko so.

16 Anocwan komo wara rma naxe Xenciu komo, n̂examro mownu yeen̂e wara maxe. Kayaritomo komo naxe anocwan komo wara, moomo ke awokpan̂e komo wara ha. Ero yimaw tak on wara mîîkexe opoko, Kakir̂waman̂e xa Mîk ham Kporin komo okre. Kown̂e Mîk ham okre. Karitî Mîkro ponaro Xako yehtopo, mîîkexe opoko.

17 Bronse yemtaka tak ooru wekyas ahyaka so. Pehu yemtaka tak wekyasî prata. Weewe yemtaka tak wekyasî bronse hara. Toopu yemtaka tak wekyasî pehu. Etîxatî me awehtopo komo tak wiir̂asî awenîn̂e komo me. Kir̂wan̂he awehtopo komo wiir̂asî awantoman̂e komo me.

18 Waapa, kacho tak esentara nasî arowon komo po. On wara kacho marha esentara, N̂etwîrîmesî mak erotho okwe, n̂exixkesî mak erotho hara okwe, n̂ecakyasî erotho hara okwe, ero wa kacho esentara tak nasî arowon komo po. Kakir̂wamacho me tak mosohcexe awewton komo wacan. Kaan poko kahwotacho me tak mosohcexe awewton wacan metatan. Ero wara mosohcexe okre.

19 Kaamo tak akatparera so nasî. Nuun̂i marha nasî akatparera so hara. Kporin komo mak nasî akatparen̂e komo me okre. Eroromero akatparexe so. Ponaro awehtopo komo rma nasî kir̂wanî ro me awenpon̂e komo me hara.

20 Emicira ro mak tak nasî kaamo awero ro so. Esenponkara marha tak nasî nuun̂i hara. Kporin komo tak nasî akatparen̂e komo me okre awarpantan me ro mak tak okre. Ero yimaw tak n̂enahcasî, Okwe okwe, kan̂e me awehtoponhîrî komo.

21 Ero yimaw tak ahnoro apoyino komo naxe kir̂wan me. Arowon komo tak nasî n̂examro yeken me eroromero. Naatî petarî warai mîkyam, on̂iritho warai ha. Oyamorî ke akîhtoxapu marha mîkyam. Ero wara tak naxe kir̂wan̂he xa oyehtopo yenpotome okre.

22 Axawyakanînhîrî komo rma n̂epamyasî 1.000 me cehso ro. Asak makno me na natu anarî komo, apoyino komo. Noro yipu rma tko n̂epamyasî anarî yana komo yopono me, kariti me ha. Aporin komo Ow ha. Ero wara ciino wiir̂asî Owî rma. Yohno rma ciino wiir̂asî, ciitopo me exitaw mak ha tko. Ero wara wiir̂asî, kesî Kporin komo awya so.