On wara marha wîîkes awya so, Aporî kawno pîn me exihra rma nasî Kporin komo akurunpen̂e pîn komo me exihra. Panahnî me exihra marha nasî Noro awentan̂e pîn komo me exihra. Pîra ro mak, ero warahra ro mak nasî.

2 Kicicme awehtopo komo xa matko nasî awahkoton̂e komo me. Ero ke Aporin komo mîtwono mera thakwa maxe. Kicicme awehtoponhîrî komo nasî Noro yewru yahruru me. Ero ke esenpora nas awya so okwe. Kicicme awehtopo komo yanme rma amtapotarî komo yentara nas okwe Kaan.

3 Kamxukutho ken̂e nasî awamorî komo kica. Kicicme awehtopo ken̂e nasî awamoyaran komo kica. Amtarî komo ke mîcemaronwaxe kica. Kicicitho me mîmtapowatken̂e an̂uru komo ke kica.

4 Takîhso xa en̂ekano ciicoko, kan̂e exihra ro mak nasî apoyino komo, Yaaro xa ekatîmn̂e me ehcoko, kan̂e exihra marha nas okwe. Tohnaw ro mak nîmtapowaxe mîn hak poko. Ero wara tîmtapotachonhîrî komo ponaro rma tko naxe kica. Cemaronwaxe mak okwe. Emetanmekno ritopo nîhtînoyaxe tanme ro so okwe. Akpîra cehtopo komo mak n̂enpexe rikomo wara, ewruxan wara ciki.

5 Okoyi pume yahkamexpon̂e komo mak mîkyam oko. Moyoskoto kahn̂e marha mîkyam. N̂examro pume yahn̂e komo waihyaxe okwe. Yuhme yahkache okoyi tak n̂epatakes oko.

6 N̂examro ponon mera thakwa nas okwe moyoskoto, yînkaputhîrî komo. Etpononmacho mera nasî ahce na poko ehtoponhîrî komo okwe. Kicicme ro mak ciino n̂iir̂axe. Waihkano rin̂enho mîkyam tamorî ke so okwe.

7 Kar̂pe cexe kicicitho poko ehso kica. N̂erekanaxe kicicme exihnî komo waihkacho poko okwe. Kicicme marha n̂esehtînoyaxe. Etkurexapu mko mak nasî n̂examro yesamatho yaw okwe, etwîrîmaxapu komo marha okwe.

8 Ahwokan me kehtopo poko camkî ro mak naxe okwe. Takîhso ciino rin̂e mera ro mak naxe kica. Cekumxe mak nînankexe cesamarî komo. Ero yipu yaw so kîwcetaw so ahwokan me kehtopo yenîn̂e pîn me ro mak taxe okwe.

9 Ero ke mooxeno me mak nasî takîhso epanîno ritopo. On wara nas amna Apa, amna yaka xa mokuhra nas okwe takîhso kehtopo. Ahto nai kweyuru komo, kesî rma re amna. Awarpanaw makî tko nas amna okwe. Katpan yenî xe nas amna. Wara rma awarpanaw mak amna n̂etar̂as okwe.

10 Ewuhnî warai mak amna, tapero mak waaca amna n̂epor̂as okwe. Tapero mak amna n̂etar̂asî ewuhnî wara ro mak okwe. Kamarakataw amna n̂ehrokes oko kokmamchen wara rma okwe. Waihxapu wara ro mak nas amna, ewtotho pono wara.

11 Amna n̂emkutunasî uhsu wara ro mak. Okwe okwe, kes amna potkuku wara. Takîhso cepanîn̂e komo amna n̂epor̂asî, enîhra rma tko amna nas okwe. Tukurunpen̂e komo yenî xe nas amna, mooxe rma tko naxe okwe.

12 Apa, awanwekn̂e me amna yehtopo n̂epamtîkesî ro mak awero ro. Kicicme amna yehtoponho rma nas amna yen̂ekan̂e wara rma. Amna ropotaw roro nasî awanwekn̂e me amna yehtopo okwe. Akpîn me amna yehtopo n̂een̂asî rma amna kica.

13 On warai amna, awanwekn̂e komo amna. Kporin komo poko cemarontaxmu me marha nas amna. Ahyai cemoxenoresom mak amna, ponaro amna yehtopo yai okwe. Emetanmekno ritopo poko tîmtapotaxmu amna, ahyai cetowtopo poko cesentaxmu marha amna okwe. Cemaro yakîhton̂e marha amna tîropotaw, ero yekatîmn̂e marha amna kica. Noro yipu mak amna kica.

14 Ero ke takîhso en̂ekano ritopo porohyasî mak okwe, amna yaka mokuhra nasî kica. Mooxe n̂ecececesî takîhso amna yehtopo. Mokuhra nas amna yaka roro. Cehrokaxmu wara mak nasî yaaro cesehtînosom me amna yehtoponho. Amna mîn yaka ewomra nas okwe takîhsom me amna yehtopo.

15 Ero ke yaaro ekatîmn̂e ro exihra ro mak nasî tan okwe. Anarî komo rma re nahsîpînkexe kicicme cehtoponhîrî komo. Noro yipu komo tko n̂emetanmekyaxe kicicitho pokono kom okwe. Ero wara nas amna. Ero wara amna yehtopo tî n̂een̂akn̂e Kporin komo, ahwora ro mak xakn̂e amna poko takîhso ciino rihra ro mak amna exirî ke okwe.

16 N̂examro pînîn yaw cma re mas Apa, kan̂e cma re n̂epor̂akn̂e Kporin komo. N̂eserepokekn̂e tak noro yipu exihra exirî poko. Ero ke taporî ke rma tak akir̂wamano n̂iir̂akn̂e cerepore n̂he tak cehtome. Kir̂wan̂he ciino rin̂e me cehtopo rma xakn̂e Noro yecehton̂e me.

17 Kir̂wanî ro me cehtopo namruyakn̂e cewanpîpîthîrî me. Kukurunpen̂e me cehtopo n̂iir̂akn̂e tîxapikan me, kuripara ha. Epanîno ritopo marha namruyakn̂e tponon me. Tîrwon ke n̂ewomcekn̂e tpononî mkarino me.

18 Ero ke on wara ciino n̂iir̂asî Kporin komo, yîwîrîmano ciin̂enho komo nîwîrîmesî ero wa xa marha. Tîîxatî pîn komo poko nîrwonasî ro mak. N̂examro poko n̂esepanîyas okwe. Ciwya pono komo poko meero n̂esepanîyasî kicicme ehtoponhîrî komo yecenarî rma.

19 Ero ke oesce n̂ixan komo tak naxe twerî mak Kporin komo yetacin̂e me. Resce n̂ixan komo marha naxe Noro ponaro xa kir̂wanî ro me Noro yehtopo yenîrî ke. Tuuna yukmarî wara rma re mokyaxe anarimaw Kporin komo xatî pîn komo. Ero yimaw tak Kporin komo Yekatî tak nanîmyasî tîbanteiran tîîxatî pîn komo weken̂emekn̂e komo yan̂ihtopo me.

20 Siaw pona tak mokyasî awown̂e komo. Xako yepamtho komo towso mokyasî, kicicme cehtoponhîrî poxunkan̂e komo towso ha, kesî. Ero wa kesî Kporin komo awya so.

21 On wara marha kesî Kporin komo awya so, Kîmtapowasî tak amn̂e awakronomacho komo poko, towîhnî me ro mak tan kîmtapowasî. On wara wîîkesî. Oyekatî nasî aropotaw so. Omtapotarî marha wiire amtaka so. Ero rma etowra ro mak nasî amtai so, amxîkrî komo mtai so marha, n̂examro yepamtho komo mtai so marha. Etowra ro mak wa nasî miya roro, kesî. Ero wara kesî Kporin komo awya so ha.