On wara marha kesî Kporin komo owya hara, Kar̂pe amtapotakî, yamoro mak kahra esko. Kar̂pe xa amtapotakî tuu kacho wara ro mak. Oyanan komo ya ekatîmko oyanwekn̂e me ehtopo komo. On wara maxe kicicme mak okwe, kasko yîwya so Xako yepamtho komo ya. Kicicme ehtopo komo ekatîmko.

2 Enmar̂atîxera tko oyakro tîmtapota xe naxe. Oyehtopo yencetaw tpoxwe n̂encexe okre. Kir̂wan komo wara rma re naxe Ixaw Yana komo. Owya tpanatanmetopo komo yahsîpînkan̂e pîn wara naxe. Kir̂wan̂he cma re amna mîhcamhokesî takîhso en̂ekano ritopo poko, kexe rma re owya. Tahworem wara marha naxe ohyaka tmokyataw so.

3 On wara tko kexe owya, Ahce kacho pahkî eseresmara amna nasî tohnaw mak okwe? Ero wa amna yehtopo yenîhra mehxe okwe. Ahce kacho kar̂pen me amna n̂ecire tohnaw? Ero wara amna yecitopo ponarora ro mak mas okwe, kexe owya. On wara tko wîîkesî yîwya so hara, On wara maxe amyamro okwe eseresmara awehtopo komo po rma, awemyawno komo poko rma maxe, yiixe awehtopo komo poko mak ha. Ero po so marha awanton komo mapicketîkexe iyopo so okwe.

4 Pahkî eseresmara awehtopo komo po rma meseseyukyaxe, meseyaxe kom ha okwe. Mesetapexe marha awamorî ke so rma, kicicme cehsom ke rma kica. Ero wara maxe. Eseresmara maxe oroto. Ero wa cehcerî kîmtapotarî komo yentachome Noro, kah yawno, mîîkexe. Pîra rma okwe. Amtapotarî komo yentara rma was okwe ero wa awehtopo komo yanme.

5 On wara maxe pahkî eseresmara awexitaw so, cesemetanmesom me mecir̂axe. Mutupenwaxe marha re, tuuwa n̂ewananîyasî ero wara kyam mak okwe. Kumixitho pona mak metîrapexe, wermonho pona marha re meremexe. Ero wa mak maxe okwe. Tawake ma re wai ero wara mak eseresmara awehtopo komo poko awya so? Aporin komo Ow ha.

6 On poko xa yo kantomexe so pahkî eseresmara awehtopo komo pokono wara rma awehtome so, kicicitho n̂imitho komo yîmhokacoko, wara n̂he tak apickacoko iyopo so apickaxapu komo, emetanmexapu komo tak tocowpe emetanmekîra ro mak tak ha. Ahnoro yîwîrîmaxapu komo yîwîrîmara tak ehcoko.

7 Anahrî komo marha yîraconkacoko rooma pokono komo yakro, yîmîmnî komo marha ermonocoko amîn komo yaka, ponomnî komo marha pononmacoko. Ayanan komo yesemer̂wetaw so eseyamra ehcoko noro yipu komo n̂enîhtori me. Ero wara xa yo ehcoko aweseresmacho komo watotopo pokono warai me awentome so owya.

8 Ero wara awexitaw so tak enmayatawno wara tak maxe okre, yohno tak akaricexe so hara Aporin komo kar̂pera awexitaw so. Apoturme so tîtosom wara tak nasî kir̂wan̂he awehtopo komo. Kir̂wanî ro me Aporin komo yehtopo marha n̂esenpesî amapitaw so tmohsom me, akurunpen̂e komo me ha.

9 Ero yimaw tak oyakro mîmtapowaxe awakronomacho komo poko. Keyukyaxe so tak. Apa kah yawno, mîîkexe owya. Tan wasî, wîîkesî tak awya so. Ero wa tak kencexe so omtapotarî yewehcataw awya so. Iyopo so apickano cirihra tak ehcoko, wîîkesî. Apoyino komo wece ekanpîra marha ehcoko awamorî komo ke, kicicme yîmtapotara marha ehcoko.

10 Rooma me cehsom komo pînîn yaw marha ehcoko. Cesemetanmesom komo wakrecoko, yiixe ehtopo komo tîmcoko, wîîkes awya so. Ero wara awexitaw so enmayatawno wara tak maxe okre awarpanawnonhîrî. Kamarakatawno wara tak maxe okre kosope ehxapunhîrî wara okre.

11 Aporin komo rma tak awesamarî komo n̂enpesî roro awya so. Atîhtara exitaw amararîn komo tuuna mokuhra exirî ke ero yimaw rma anahmexe so iime aweseresmachome so. Ayochîrî komo marha n̂iir̂asî cewaxke. Naatî yewtî wara tak maxe tîhxapu wara. Tuuna pîtho wara marha maxe apaipînî ro wara okre.

12 Apoyino komo tak n̂esewtomexe hara ewtotho pona so. Pahxantho pona so n̂iir̂axe tîmîn komo mîîmo mapatantho pona so. On wara kacho me tak maxe ero yimaw, Waacatho Yahrun̂e Awkaxaputho, kacho me maxe. Esamatho Yaiwan̂e Hara, kacho me marha maxe. Ero wa kacho me tak maxe okre.

13 Awemyawno ro komo ciiso tohra tak ehcoko awepokaretopo komo po. Oponaro xa awehtopo komo ro mak mîn awepokaretopo komo. Ero ke yiixe awehtopo poko mak exihra ehcoko ero po so. Kepokaretopo tan okre, kacoko ero me enmayataw. Kporin komo ponan me xa tan kesenmetopo okre, kir̂wanî ro, kacoko marha. Noro ponaro xa ehcoko, ero po awemyawno ro komo pokohra tak ha, awesewakomacho komo pokohra marha, amtapotarî ro komo pokohra n̂he marha. Ero wara exihra ehcoko Noro ponaro xa tak awehtome so.

14 Ero wara awexitaw so tahwore xa tak maxe opoko, Aporin komo poko ha. Ow tak kaar̂axe so kawaru mkawno wara. Îîpî meretîrî pore kaar̂axe so, kawno meretîrî pore. Aporin pen komo wecehcekn̂e Xako pen ha, kir̂wanî ro ke noro pen wînahmekn̂e. Ero yipu ke xa marha kecehcexe so hara. Aporin komo xa Ow ha. Yaaro tan wîîkes awya so, kesî Kporin komo awya so.