On wara marha kesî Kporin komo awya so, On wara tak naxe kir̂wan pen komo, waihyaxe mak okwe. Waihtopo komo poko tko eserepokara maxe amyamro. Yîpînîn yawno komo exihra mak naxe okwe. Camkî mak naxe okwe n̂examro waihtopo komo poko. Nnn, kir̂wan komo naar̂a ham Kaan esemetanmekîra ehtome so amn̂e, kahra naxe okwe.

2 Cerepore tak naxe ero wa waihxapu komo. Kuywa po cepokaresom wara naxe okre. Ero wara naxe takîhso roro cehsom kom okre.

3 On wara wîîkes awya so hara, yaskomo mrerî komo mak amyamro, ciin̂o pîn pokono mrerî, anarî ro pokono mrerî ha. Amohcoko xiya amyamro.

4 Onok poko xa metaporetu? Onok wece na meen̂atu kicicitho wece enîn̂e wara? Onok wece an̂uru komo mekanîyat ha? Kicicitho me anocwan komo yehtoponho rma amyamro yîmrerî komo. Cemarontaxmu mrerî komo amyamro okwe.

5 Mîk hak warai me an̂irithîrî komo poko mepohketîkexe ro mak okwe. Weewe komo yapomyaw ero yipu poko maxe, taakem komo yapomyaw so ha. Amxîkrî komo marha mîwaikexe aporî yecihtaw so, toopu makataw so marha. Ero wara maxe okwe.

6 Toopucitho mak nasî ponaro awehtopo komo me, tmemehsemu komo, aporî kwawno komo ha. Ero yipu komo mak nasî yiixe awehtopo komo me okwe. Ero yipu ya tîmsom me markexe wooku, puruma marha makn̂iyaxe ero yipu ya tîmsom me kica. Tawake ma re wai awya so ero poko awexitaw so kica? kesî Kporin komo awya so.

7 On wara marha kesî Noro awya so, Îh pona maar̂axe akaman komo kawno pona. Iina mîîcexe mîk hak ya tîmsom yakn̂iso kica.

8 Ametatan komo mkai so miir̂axe ponaro awehtopo komo kuknon, metata yecepu mkai marha miir̂axe. Ow mahsîpînketken̂e okwe. Akaman komo yaam maswankexe. Ero yaka metîrapexe. Swaa, mîîkexe ro mak kica. Etpoko cehcerî, mîîkexe awayamnu mexan me an̂enîrî komo ya. N̂examro pun wece meen̂axe ponomnî ro wece kica.

9 Kayaritomo yaka maar̂axe asece. Yaakeno ke mekotopexe kotoporem ke iina awcetaw so. Amtapotarî yentamexpon̂e komo men̂epexe meyeno komo yaka okwe. Mekiciciretîkexe ro mak kica wehto imo ywawno komo wara rma okwe.

10 Mekar̂kexe rma okwe ponaro awehtopo komo poko. N̂eexi tak ha, kir̂wan̂he kirihra rma nai ham noro kica, kahra rma tko maxe. Kar̂pe rma maxe ha re. Ero ke, N̂eexi kica, kahra rma maxe okwe.

11 Onoke pona xa meraswatu? Kopi, mîîketu onoke pona? Noro pona awerahtîmrî ke mîcemaronwaxe kica on̂entarî me. Oponarora mak maxe okwe, omtapotarî ponarora marha. Kîtîtmamyakn̂e mak pahxa rma. Ero ke opoko twerîhra mat ham okwe.

12 Kir̂wan komo wara rma re menpexe, kir̂wan̂he ciino ritopo pokono me rma ha re. Tohnaw makî tko ero wa maxe. Kir̂wan̂he xa exihra rma maxe okwe.

13 Amna akronomatamko okwe, ketaw awya so on wara wîîkesî, Anakîtothîrî komo xa matko awakronomacowpe. Mer̂pora naxe ahyaw so ero ke noro yipu komo xa ka awakronomacowpe ha. Ocowo narîrî me mak naxe okwe ero yipu komo. Awapepenîmtopo warai rma ciki naar̂as okwe. Ero wara nasî ponaro awehtopo komo. Anarî komo reha tukurunpen̂e me ohtînoyaxe. Noro yipu komo xa ceken komo tak nahsîyaxe amn̂e on roowo pono. Oyekenî ro nasî îh po, ero marha nahsîyaxe amn̂e ceken komo me, kesî Kporin komo awya so.

14 Ero yimaw on wara kes anarî, Roowo enmecoko kaikokoro n̂he ciitome tak oyanan komo yesamarî. Peen marha aiwacoko n̂he kir̂wan̂he totohme so ero yaw, kesî.

15 On wara nasî Kporin komo, kah yaw xa nasî Noro yeken, kyopono ro xa Mîk, waipînî ro ha. Kir̂wanî ro mîn Noro yosotî. On wara kesî Noro, Kah yaw xa nasî oyeken, kir̂wanî ro mîn oyeken. Tooto ropotaka marha kesekenmesî, Kicicme wex ow ha kica, kan̂e komo ropotaka, anarî komo xawyakan me cesehtînosom komo ropotaka marha. Noro yipu komo ropotaw oyexitaw wahworesî tak okre.

16 Kicicme maxe kica, kahra wasî eroromero. Miya roro yîrwomra wasî onakîtotho komo poko. Ero wara oyexitaw nahwokexe ro mak okwe oyanme rma. Nahwoketîkexe tak okwe onakîtotho komo rma, kar̂pera tak nasî ekatî komo okwe.

17 Kicicme rma tko xatken̂e oyanan kom okwe, cemyawno komo yepamnopu xe mak xatken̂e kica. Ero ke kîrwonakn̂e poko so, wîwîrîmekn̂e tak oko. Keseyamyakn̂e marha, kîrwonakn̂e mak okwe. Ohyai tko n̂emoxenoretken̂e rma kica. Cehtoponhîrî komo yaw roro rma xatken̂e kica, yiixe cehtopo komo poko rma.

18 Kicicme noro yehtopo rma re ween̂asî. Wara rma wehcemesî kar̂pe ehtome hara. Noro yaan̂e me tak was hara, wahworesî marha ahwokaxapunhîrî.

19 Kir̂wan̂he Kaan nai ham okre, kan̂e me tak wiir̂asî tîwrataxmunhîrî komo, Ixaw Yana kom ha. Tawake tak wasî apoko so, tawake tak wasî apoko so, wîîkesî xa hara. Meyeno komo ya ero wa wîîkesî, meyeno pîn komo ya marha. Noro yipu komo wehcemesî kir̂wan̂he tak ehtome so, kesî Kporin komo.

20 Tuuna imo wara makî tko naxe kicicitho komo cekahximaxmu wara, tîtpe exihnî wara. Ecihtaka roowo nar̂mesî yamarataka, apacakrî kica. Ero wa xa marha naxe kicicitho komo.

21 Cereporem me exihra thakwa naxe kicicitho komo, kesî Kporin komo. Ero wa kes awya so.