On wara marha kesî Kporin komo awya so, On wara tak ehcoko, yaaro mak en̂ekano ciicoko. Kir̂wn̂he me mak ehcoko roro. Pahnoke tak nas awakir̂wamacho komo owya. Yohno rma n̂esenpesî kir̂wanî ro me oyehtopo.

2 Tawake xa naxe ero wara cehsom komo, ero wara cehtopo komo yahsîpînkan̂e pîn kom ha. Tawake xa marha naxe awepokaretopo komo yîwîrîman̂e pîn komo, kicicitho pokono mera ro mak oyamorî wîîr̂asî, kan̂e komo marha. Noro yipu komo tawake naxe.

3 Achew so naxe anarî yana komo, Kporin komo yakrono me cehsom komo rma. On wara kahra ro mak n̂ehcowpe noro yipu komo, Tîyanan mera ro mak oriyasî Kporin komo okwe, kahra n̂ehcowpe. Achew so marha naxe anarî kom hara, ewnuku me cehsom komo. On wara kahra ro mak n̂ehcowpe noro yipu kom hara, Yîpîrîtho mak ow okwe, kahra ro mak n̂ehcowpe.

4 On wara wîîkes Ow Aporin komo, On wara ween̂asî anarî komo, ewnuku komo, awepokaretopo komo po cemyawno ro pokohra naxe. Oyanmen poko mak naxe tawake mak oyehtome tpoko so. Omtapotacho ponaro marha naxe, Oyewehcataw awya so kakronomexe so, kacho ponaro.

5 Noro yipu komo ya wîmyasî ekenî ro komo. Omîn yaka rma ekenî ro komo wiir̂asî. N̂examro wosohcesî marha. Yumumuru komo exihra nasî, emsîrî komo marha exihra. Exitaw ketaw ha re tawake naxe ha re osotî komo poko. Tawake xa tko naxe tosohtotopo poko owya. Eroromerono ke xa n̂examro wosohcesî, ehcamnopînî ro ke ha.

6 Taa, anarî rowon pono yepamtho komo poko kîmtapowas hara. On wara naxe noro yipu komo anarî komo mak, Kporin komo yakrono me tak naxe. Yînantomarî me cexi xe so mak naxe. Tîpîn̂e nasî Noro yosotî yîwya so. Noro yanton me xa naxe. Awepokaretopo komo marha yîwîrîmara naxe. Omtapotacho marha n̂ewehcaxe, Oyewecataw awya so kakronomexe so, kacho ha. Ero wara naxe anarî komo, anarî rowon pono komo.

7 Noro yipu komo wekyasî oyekenî ro pona, îh pono pona. Omîn yaka marha wekyasî oyakro amtapotacho komo yaka. Iito tak n̂examro wahworesî. Owya tîmsom yakn̂itopo pona tookuthîrî komo nakn̂iyaxe, ahce na marha nakn̂iyaxe owya tîmsom me ero pona. Ero yipu yakn̂iyataw tawake wasî poko so. Ero yimaw on wara kacho me nas omîn amn̂e, Kaan yakro kîmtapotacho komo, mîk hak rowon pono komo mtapotacho ha, kacho me nasî, kesî Kporin komo.

8 On wara marha kesî Kporin komo, Pahxa n̂he Ixaw Yana komo wekye hara oona. Miya so waapa narîtho komo wenmekye hara. Wara rma pahxaro n̂examro yaka wenmekyasî anarî komo xa hara, yihcirî me enmexapu komo yîhreru xa hara, kesî. Ero wa kesî Kporin komo.

9 On wara marha kesî Kporin komo anarî poko hara, Ai, woskara pono komo, comota pono komo marha, ahnoro enpamnî komo, amohcoko awotî komo yonoso, kesî.

10 On wara naxe Ixaw Yana yenîn̂e komo, Ewuhra ro mak naxe okwe, camkî mak okwe. Xapari mak mîkyam, owhow kan̂e pîn makî tko okwe. Nîwînîkyaxe mak, cetîrapo xe mak naxe, Tpoxwe xa nasî yîwîntopo komo yîwya so.

11 Xapari mak mîkyam, tîyopono xatî mak kica. Taa, n̂eexi tak ha, oyecenarî wahsî, kan̂e pîn komo mîkyam kopi. Oper̂a yenîn̂e mak mîkyam, yuhnari yîhtînon̂e pîn mak ha tko okwe. Cemyawno ro ponarono komo mak mîkyam, tupurantan yepamnotopo ponarono mak ha. Cekenî ro ponaro mak naxe okwe.

12 On wara kan̂e mîkyam, Amohcoko kawaxiyem yeeso. Wekyas ow. Oroto kawaxiyem ceecerî mer̂pora ro mak okre. Pahxaxa ero wa xa marha ceecerî, ero yopo xa matko okre, kan̂e mîkyam kica. Ero wa naxe kahn̂eru yenîn̂e warai komo kica, kesî Kporin komo.