Taa, on wara kes hara Kporin komo awya so, Ai, awokru xatî komo, on wara wîîkes awya so, ahnoro amohcoko xiya tuuna kwaka. Yupurantamnî komo, awya so marha wîîkesî, amohcoko. Anahrî komo ahsîtamcoko, aweseresmachome so tak okre. Amohcoko, uupa yukun ahsîtamcoko epethîmra ro mak, paaka mownu marha. Puranta ponahra ro mak ahsîtamcoko ha.

2 Ahce kacho apurantan komo mirihtîketu awru pîn komo pona? Ahce kacho awetapickachonho yepetho mîmyatu awereporen̂e pîn komo yepetho me. Omtapotarî men ka entacoko kir̂wan poko tak aweseresmachome so okre. Tpoxwem komo xa tak mahyaxe okre oyentan̂e me awexitaw so.

3 Ohyaka amohcoko omtapotarî yentaxi. Ero wa ehcoko waipîn me awehtome so. Awakro so kîmtapowasî awakronoman̂e ro me oyehtopo poko. Towîhnî me ro mak wîîkesî ero poko. Pahxa kîmtapowakn̂e Tapi yakro yîpînîn yaw oyehtopo poko. Yaaro xa wîîkekn̂e yîwya. Ero wa xa marha kîmtapowasî awakro so hara.

4 Noro xa wiir̂akn̂e oyehtopo yekatîmn̂e me anarî yana komo ya. Aano rin̂e me marha wa noro wiir̂akn̂e, antomano rin̂e me ha.

5 Ero yimaw tak anarî yana komo man̂ikyaxe, an̂entorî pîn kom ha. N̂examro tak mokyaxe ahyaka so kar̂pe. Awenîn̂enhîrî komo rma ero wa mokyaxe. Kporin komo yanme ero wa naxe, ponaro awehtopo komo yanme. Kir̂wanî ro Mîk Kporin komo, ponaro Ixaw Yana komo yehtopo. Noro rma kir̂wan me awenpetken̂e so okre.

6 Kporin komo epocoko Noro yesenpotopo me exitaw rma ka. Meyehra ka exitaw Noro an̂ihcoko.

7 On wara tak n̂ehcowpe kicicitho komo, cehtoponhîrî komo tak nahsîpînkacowpe. Cesehtînotoponhîrî komo marha nahsîpînkacowpe noro yipu komo. N̂esewkor̂macowpe tak Kporin komo wece hara, ponaro kehtopo ro komo wece. Ero wara esewkor̂mache so yîpînîn yaw so tak nasî Noro. Kicicme ehtoponhîrî komo tak nîhcamnoyasî. Ehtoponhîrî komo ponarora ro mak tak nas okre. Ero wara tak nasî Kporin komo noro yipu komo poko.

8 Etîme re esehtînopîn me taxe Ow, amyamro. Etîme re exihra marha nasî ahce wa na kehtopo komo, kesî Kporin komo.

9 Kaw xa nasî kaapu roowo yepoi ro mak. Ero wa xa marha nas oyehtopo awehtopo komo yepoi ro mak. Ero wa xa marha nasî oyesehtînotopo hara, awesehtînotopo komo yopo xa marha nasî.

10 On wara nasî tuuna, n̂eepi kom ha, kah yai mokyasî. Ero yinhîrî tohra nasî kah yaka hara. Roowo xa matko nîhyasî. Ero ke tak naatî n̂epemrutunwasî epetachome tak okre. Naatî yatho me n̂eperwasî tmararîyem komo n̂irirî xa hara, iyuru komo me marha okre. Ero wara nasî tuuna yanme, tmohsom yanme ha.

11 Ero wara xa marha nasî omtapotarî omtai toxapu. Tohnaw mak mokuhra nasî ohyaka hara. Oyanme ciino ritopo rma mîn omtapotarî. Ero wa ciino rin̂e me tompe, ketaw owya, ero wara rma cesî ehn̂ara rma.

12 On wara maxe amyamro amn̂e, tahwore mîîcexe ahce na wece. Cerepore maxe awar̂ataw so awantoman̂e komo. Cewanomaxmu wara tak nasî îîpî komo iina awcetaw so, matîwîn komo marha. Knowknow kan̂e wara nas ahnoro weewe komo tahwore.

13 Cekyekyem yewtîtho po tak natîkwasî siprexte yepu hara. Kpata warai yewtîtho po tak natîkwasî muhta yepu hara. Ero yipu yenîrî ke tak miyan komo rma tak nîmtapowaxe kir̂wan̂he Kporin komo yehtopo poko. Noro yehtopo kuknon me nasî arowon pono komo miya roro eroromero. Yîwîrîman me ro mak tak nasî arowon komo. Ero wara nasî.