On wara marha kesî Kporin komo awya so, Ewanomakî tak aaci, yîmxîtanînhîrî. Kar̂pe tak ewanomakî. Yîmxîtara ro makî ka mîxakn̂e okwe. Erewra mak mîxakn̂e okwe amxîkrî yewrutopo me. Emtarakakî tak tahwore. Mer̂pora tak naxe yîmxîtanînhîrî xîkrî komo ciin̂oyem xîkrî komo yopo, kesî Kporin komo.

2 Awetarî tak amtareko n̂he. Amîn wacan etakakî miya n̂he. Wahra mak etakara esko. Amîn mici yupupusmakî n̂he kaw xa tak. Amîn mici yecetî komo pasahtoko nhe yuhnaka.

3 Miya tak mepamyasî kaari yaw roro, poowa yaw roro marha. Xenciu komo tak nahsîyaxe awepamthîrî komo amn̂e tmaywen komo me. Ewtotho komo pona tak n̂esekenmexe.

4 Erasîra esko. Ahyapamtopo ponarora esko. Cehn̂axmu me exihra ro mak masî. Ero ke tîwîrîmaxmu mera tak masî. Amn̂e tak tîhyapamsom me awehtoponhîrî mîhcamnoyasî, emasî me awexitawnonhîrî ha. Pahxa ahwon me mîxakn̂e iin̂owaixapunhîrî me awexirî ke. Ero ponarora tak masî oroto.

5 Awakîton̂enhîrî rma nasî aan̂o me tak. Kporin komo, kantoman̂e ro Mîk ha, Noro yosotî. Kir̂wanî ro Mîk awown̂e komo, ponaro Ixaw Yana komo yehtopo, kacho Mîk. Roowo yosom Mîk ha, miya rorono yosom ha.

6 Noro rma tak awahsîye, Aporin komo. Kîîrî cinho wara rma masî, ahsîpînkaxapu wara. Anarimaw emasî nahsîyasî kîîrî yohno mak. Ero yinhîrî nahsîpînkes hara okwe. Ero ke thakwa nahwokesî. Ero warainhîrî amoro. Kahsîyasî hara tko Ow, kesî Kaan, ponaro awehtopo.

7 Yohno makî kahsîpînketken̂e so. Apînîn yaw so ro makî tko was amn̂e. Ero yimaw tak kenmekyaxe so hara.

8 Kîrwonakn̂e rma re apoko so wara n̂he ha tko. Ero ke kesewyahruyakn̂e oyenîra awehtome so, yohno mak ha tko. Eroromero tko awakronoman̂e me was amn̂e, apînîn yawno me ha, kesî Kporin komo, awown̂e kom ha.

9 Roowo yukmachonho wara rma nas owya awemetanmetopo komo oroto, Noe pen exitawno wara. On wara wîîkekn̂e ero yimaw, Tuuna yukmara xa hara nasî roowo yukmanîretîkacho me, Noe exitawnonho wara exihra ro mak tak nas amn̂e, wîîkekn̂e. Cemaro pîn me xa wîîkekn̂e ero wara. Ero wara xa marha wîîkesî apoko hara oroto, apoko so yîrwomra tak was amn̂e, aweira so marha wasî, wîîkesî. Cemaro pîn me xa marha ero wa wîîkes awya so.

10 N̂ehcamnoyasî rma re îîpî amn̂e, matîwîn komo marha n̂ehcamnoyasî. Ehcamnopîra ro mak tko nasî owya awakronomacho komo. Opoko tawakem me tak kiir̂axe so, kacho marha nasî etowîn me, kesî Kporin komo.

11 On wara marha kesî Kporin komo awya ewto ya, etwîrîmaxapu xa amoro. Ocowo nar̂matho warai amoro. Ahworenî ro mak amoro okwe. On wara wîîkes awya, amn̂e tak amîn komo wiir̂as hara toh ke, kir̂wan ke. Sapira tak wiir̂asî amîn komo yapon me, awacan komo yapon me marha.

12 Amîn yiretîrî me wîîr̂asî hubi. Awacan metatan me wiir̂asî tpepeyurem hara. Ero wa xa marha wiir̂asî awewton wacan ahnoro, kir̂wan komo xa wiir̂asî waaca me, cepethîkem komo xa toopu.

13 Kporin komo npanatanmekrî me tak naxe amxîkrî komo ahnoro. Ahwokan me ro mak tak naxe amxîkrî komo ero yimaw.

14 Kir̂wan̂he awexirî ke so ar̂man me ro mak tak maxe okre. Mooxe tak naxe awemetanmekî xatî komo. Mooxe tak naxe awerahtîmtoponhîrî komo, awaparî kom ha. Meyehra mokuhra ro mak tak naxe amîtkoso.

15 Awapari komo rma re n̂esenmekyaxe, oyanmera mak ha tko. Awar̂maxi so mohxapunhîrî komo tak n̂epîrkexe amamawno me hara.

16 Pehu pokono ro komo xe ka encoko. Onakîtotho mîkyam, ero pokono ro komo. On wara naxe, twehtorî komo naipexe kir̂wan̂he etahsîtome. Ero yinhîrî ahce na n̂iir̂axe yiixe cehtopo, kacipara imo ha na. Onakîtotho rma mîkyam noro yipu komo. Ero wa xa marha yîwîrîmano rin̂e komo wakîhcekn̂e Ow hara, waihkano rin̂e hara.

17 Awaikacho komo rma na nakîhcetu aaxatî pîn komo. Awaikara rma tko nasî yînakîtothîrî komo. Awen̂ekan̂e komo exitaw, tohnawno me yîmtpotarî menpexe. Ero wara maxe Kporin komo yanton me awexirî ke so okre. Oyanme mak naxe oyanton komo kir̂wanî ro me, kesî Kporin komo. Ero wara kesî Noro awya so.