On wara marha wîîkes awya so, onoke ha re amna mtapotarî n̂ewehcakn̂e? Onoke ya ha re taporî n̂enpekn̂e Kporin komo? Amna mtapotarî nanwekyaxe mak okwe entan̂e komo.

2 Kaan yanton poko tan amna nîmtapowasî. On wara nasî Noro, por̂mamyasî tak Kporin komo wero ro. Naatî wara por̂mamyasî, kokon̂oro atîhtaxapu wara, cukmano wara. Naatî micintho wara rma tko n̂esenpesî turpem poi mohkaxapu wara. Cenporem me exihra ro mak nasî. Okre, cenporem Mîk okre, kacho mera ro mak nasî. Oyakrono mexe ween̂asî Noro, kacho mera marha ceen̂asî.

3 Tooto komo nîwîrîyakarî me mak nas okwe. Nanwekyaxe ro mak okwe. Ahwokamexpoxapu me roro mak nas okwe. Cemetanmetopo yînîmn̂e me roro marha nasî. Noro yenîche tooto komo ya anana mak n̂esewkor̂metken̂e. Yîwîrîyakaxapu me exirî ke amna marha ponarora mak xakn̂e.

4 Kar̂pera kehtopo tko nahsîye. Ahwora kehtopo marha nukukmai. On wara makî tko kekn̂e amna Noro poko, Kaan nîwîrîmatho thakwa Mîkro, Kaan n̂etapatho ha. Kaan n̂emetanmekîtho xa, kekn̂e mak amna Noro poko.

5 Kanme so rma tko Noro n̂eparaxkapekn̂e, Kaan yanwetoponho yanme rma kîwya so. Kicicme kehtopo komo yanme mak n̂eserepekn̂e. Ero wa Noro n̂irpekn̂e Kaan tawake tak cehtome kpoko so. Yîhyoxapu me marha xakn̂e oko. Ero wara ehtoponhîrî ke rma keper̂anthîrî komo tak nasî cicihso okre.

6 Oper̂a warai mak kîwyam, kosom komo yai mak tîhcetken̂e okwe. Cetakpayatken̂e mak okwe kesamarî ro yaw so mak kîwtotome so kica. Noro pona tko kicicme kehtopo komo n̂iir̂akn̂e Kporin komo.

7 Emetanmexapu me ro mak xakn̂e Noro, yîhyoxapu me ro mak okwe. Wara rma nîtîtmamyakn̂e mak. Oper̂a xîkrî naar̂axe osom komo paraxkachome, ero wara Noro pen naar̂atken̂e. On wara nasî oper̂a yîhpoci pahyataw, tîtken̂e mak nasî emtarakara. Ero wara rma xakn̂e Noro pen hara tîtken̂e mak.

8 Emetanmekn̂e komo tak naar̂atken̂e en̂ekaposo hara. Onoke ha re, Noro yepamtho mîkro, nîîke Noro poko? Noro pen tak nîhcamnoyatken̂e. Ero ke waipîn komo chew exihra tak xakn̂e. Kaan yanwekn̂e me oyanan komo yehtopo yanme mak ero wa xakn̂e, Kaan n̂etapatho me xakn̂e okwe.

9 Kicicitho pen komo yokoputho yakro rma Noro pen nahruyatken̂e, cemyawnoyem nahtotho yaka rma tko. Waapa me exihnî rma ero yipu yaka nahruyatken̂e, cemaro me yîmtapotanî ro. Ero ke ero yipu yaka rma nahruyatken̂e.

10 Kporin komo rma tko nîhtînoyakn̂e Noro pen yemetanmetopo. Kaanî rma Noro pen n̂iir̂akn̂e tahwokaxmu ro me. Kicicme kehtopo komo yepetho me mak waihkapekn̂e. Ero wa twaihîrî ke tak cepamrî komo n̂een̂asî Noro. Pahkî ro mak tak nasî waipîn me. Kporin komo yanme mak ciino n̂iir̂asî Noro ehn̂an me ro makî.

11 Wooxam n̂erewasî cewruyataw, ero wara xakn̂e Noro ropotarî, cerewre xa. Ero wa cexirî ke tîmxîkrî komo n̂een̂as amn̂e. Ero yimaw tak cerepore nasî. On wara kesî Kporin komo Noro poko, Oyanton Mîk Noro kir̂wanî ro ero wa n̂eserepotanmekyasî. Ero wa cexirî ke mer̂pono pîn komo nakir̂wamesî. Noro rma kicicme ehtoponhîrî komo yepetho me waihyasî.

12 Ero ke Noro tak wemyawnomesî. Karitî komo nahsîtho raconho rma nahsîyasî cemyawno me. Ero warai nahsîyasî tanmero rma cewaikaporî ke. Oyanwekn̂e komo yakrono me rma n̂etkuknomapekn̂e kicicitho wara okwe. Kicicme cehsom komo yehtopo nahsîyakn̂e tponan me rma, merpono pîn komo yehtopo ha. Oyanwekn̂e komo poko marha nîmtapowakn̂e oyakro, Yîpînîn yaw so cma re mas Apa, kekn̂e noro yipu komo poko. Ero wa xakn̂e Noro, Kporin komo yanton, wîîkesî. Ero wa wîîkes awya so.