On wara marha wîîkes awya so, Siaw pono komo amyamro, apakacoko, apakacoko n̂he. Kar̂pe awehtopo komo yamrun̂e wara ehcoko, poono yamrun̂e wara. Kir̂wanî ro tak amrucoko aponon komo. Xerusaren pono komo amyamro, Kporin komo yewtonî ro pono kom ha. Awewton komo pona mokuhra ro mak tak naxe etanpikan komo, esmurexapu komo marha mokuhra naxe.

2 Aponon komo tak yupupunkakî. Awomcoko tak awapon komo pona so aweremachome so tak. Ero wa ehcoko amyamro Xerusaren pono komo. Apîmîrî komo micitho yîmhokacoko, kuripara ha. Siaw yemsîrî amoro waapa nahsîthonhîrî ha.

3 On wara kesî Kporin komo awya so, Epethîmra ro mak awahsîyatken̂e so anarî komo okwe. Ero ke epethîmra marha kowyaxe so hara, kesî Kporin komo awya so.

4 On wara marha kesî Kporin komo, Yihcirî me ka Exitu pona cetken̂e oyanan komo iitono komo yaw enmachome. Kokon̂oro tak oyanan komo n̂emetanmekyatken̂e Asiriu kom hara. Tohnaw ro mak n̂emetanmekyatken̂e.

5 On wara marha kesî Kporin komo, Ahce wa tak ciino wiir̂a hara? Epethîmra ro mak oyanan komo naar̂atken̂e waapa kom okwe. N̂etaporexe mak aan̂enhîrî komo n̂examro poko, kesî Kporin komo. Kaamo po roro kicicitho me ro mak nîmtapowaxe oyosotî poko.

6 Ero ke oyehtopo yenîn̂e me tak naxe oyanan komo. Ero yimaw on wara tak kexe, Kporin komo xa Mîk xakn̂e ham on kîwirîmacho yekaiporen̂e, kexe. Yaaro, Owî rma ero wa awehtopo komo wekaiporekn̂e.

7 Taa, on wara wîîkes hara, cenpore xa nasî kahwotacho yekatîmn̂e tarî, îh pore tmohsom komo tarî ha. Kaan poko tawake kiitopo komo yekatîmn̂e komo mîkyam, awahwotacho yekatîmn̂e komo, awakrecho kom ha. Awakir̂wamexe so Kaan, kacho yekatîmn̂e komo marha mîkyam okre. On wara kexe n̂examro Siaw pono komo ya, Ai, kayaritomo me tak nasî Kaan, ponaro awehtopo kom okre, kexe.

8 Siaw pono komo yekyataw xa hara Kporin komo ya, kar̂pe tak kexe awaparî yekahton̂e komo. N̂emtarakexe mak tahwore xa okre. Ero wa n̂emtarakexe ekno rirî ke tak.

9 Xerusaren po nasî mer̂pora mîîmotho komo, ecahxaputho komo. On wara wîîkesî ero yipu komo ya, Ai, ewanomacoko tak iito re, tahwore ewanomacoko, wîîkesî. Tîyanan komo tak nahworei Kporin komo. Xerusaren tak nowye hara, cewton me okre.

10 Taporî tak n̂enpesî Kporin komo kir̂wanî ro. Ponomnî me n̂enpesî. Mîk hak rowon komo wero ro rma n̂enpesî. Ero yimaw tak ponaro kehtopo komo ya kakir̂wamacho tak n̂een̂axe mîk hak rowon pono komo ahnoro, roowo yenatîtopo tono komo meero.

11 On wara marha wîîkes awya so, ewto poi so tak etocoko, etocoko ha men. Kicicitho yapehra ro mak ehcoko. Ewto poi epatakacoko ka, esmunkacoko tak amyamro Kporin komo mîn yawno yaan̂e komo.

12 Ponan̂e tko tohra maxe, emahcira marha maxe. Yamoro n̂he mak mîîcexe. Kporin komo rma cesî apoturme so. Noro marha mokyasî amapitawno komo me hara, ponaro Ixaw Yana komo yehtopo. Ero wa mîîcexe.

13 Taa, kîmtapowasî oyanton poko hara. Oyanton encoko, takîhso ciino rin̂e me nasî Noro. Kayaritomo komo yopono ro me tak nasî Noro, yaana me xa tak nasî.

14 Pahxa ka mer̂pono pîn komo n̂eserepoketken̂e apoko so. Noro punu reha xakn̂e yîhyotopo yotho ken̂e xa oko. Anarî komo rma re xatken̂e ero wa ha re. Noro reha miya xe xa xakn̂e oko. Tooto warahra ro mak n̂esenpekn̂e tîhyokrî ke oco.

15 Ero ke mîk hak rowon pono komo tak caramesî Noro, mer̂pono pîn kom ha. Noro yenîche kayaritomo komo ya nîtîtmamyaxe mak. Noro tak n̂een̂axe ekaci yentan̂e pîn komo ha ka. Tîn̂entathîrî pîn komo poko tak n̂esehtînoyaxe. Ero wara naxe ha.