Taa, on wara kesî Kporin komo awya so, kir̂wan̂he awexi xatî komo ya, Kporin komo yenî xatî komo ya ha. Toopu wara maxe hara, porin poi yîhkotoxapu wara. Ewtarî yawnonho mîn toopu. Ero ke iitononhîrî ow ham, ewtarî yai anîmxapu, kacoko. Toopunhîrî ow ham, porin poyinonho ham, kacoko marha.

2 Abraaw mîk aporin komo. Ero ke noro yehtoponho ponaro ehcoko, Sara mîk anocwan komo. Noro yehtoponho ponaro marha ehcoko. Abraaw wan̂ikyakn̂e cewyarono me tak ehtome. Ero yinhîrî noro wakronomekn̂e, wepamnoyakn̂e takî.

3 Siaw pono komo marha nahwores amn̂e Kporin komo. Yîrowon komo marha nahworesî, peen ken̂arî kom ha. Peen kan̂arînhîrî tak n̂iir̂asî naatî yewtî me, Eten pononho wara rma okre. Axawa imo marha nasî yîmîtwo. Kporin komo natîtho wara tak nas okre. Iitono komo tak naxe tahwore, tawake marha. Amna cma mîwakrew okre, kacho xa n̂esencesî iito, ewanomarî komo marha.

4 Omtapotarî men entacoko amyamro oyanan komo, Ow men entacoko omaywen kom ha. Omtapotacho tak n̂etakpayasî amn̂e, panatanmekno ritopo komo. Takîhso xa en̂ekano wiir̂asî. Ero wara owya ciino ritopo rma nas anarî yana komo weyuru wara rma.

5 Pahnoke takî nasî kir̂wanî ro me oyesenpotopo. N̂esencesî tak akir̂wamano ritopo owya. Oyaporî rma nasî anarî yana komo yen̂ekan̂e me, yaaro en̂ekan̂e me ha. Ciwya pono komo n̂een̂axe opona. Oyaporî nîhtînoyaxe tukurunpen̂e komo me.

6 Kahsî encoko kaapu yentome awya so. Roowo marha encoko kaapu makatawno. Pahxaro tak n̂ehcamnoyasî kaapu komo, wehto yîsîn n̂ehcamnoyas ero wara rma. Natîhyasî marha roowo poonotho wara. Waihyaxe tak ero pononho pen komo. Eroromero tko was Ow akurunpen̂e komo me. Ehcamnopîn me marha nasî kir̂wanî ro me oyehtopo.

7 Omtapotarî ka entacoko amyamro kir̂wanî ro me oyehtopo poko ehcamhokaxapu komo, Omtapotarî entacoko amyamro apanatanmetopo ponarono kom ha. Awîrîyaketu so rma na tooto komo. Kicicme so na nîmtapowat apoko so. Ero wara yîmtapotarî komo pona erasîra ro mak ehcoko.

8 Poonotho wara mak naxe amn̂e noro yipu komo, awkaxaputho wara, mahcaru warai naputho wara. Nasî akrî warai ciki poonotho yahn̂e, oper̂a poci kahxapu yahn̂e ha. Yînaputhîrî wara naxe noro yipu kom okwe. Eroromerono me tko nasî kir̂wanî ro me oyehtopo. Eroromerono me akir̂wamano wiir̂asî. Miya roro ehretawnomaxapu komo yakir̂waman̂e Ow, kesî Kporin komo awya so.

9 On wara tak wîîkes ow Kporin komo ya, Awaporî yenpakan̂e wara esko Apa, ekaritoko xa. Kar̂pe awehtopo amruko poono wara. Apakakî Amoro Kporin komo yaporî, wîîkesî. Pahxa mesenpekn̂e kporin pen komo exitaw ero wara rma esko hara. Habe yaman̂enho amoro, watwa imo mîk mîparaxkekn̂e.

10 Amoro rma tuuna imo mapainokekn̂e, weyunu imo mapainokekn̂e ha. Weyunu imo yotaw rma esama miir̂akn̂e yarinho yaw rma. Anowthîrî komo yesamarî mîn miir̂akn̂e tuuna imo watotome yîwya so.

11 Pahxaro tak on wara naxe hara Kporin komo nahsîtho komo epethîrî pona, tîrowon pona tak n̂etîramexe hara. N̂ewanomexe Siaw pona cepataketaw so. Eroromero tahworem me ehtopo komo nasî n̂examro yarokorî wara. Tahwore tak naxe okre, tawake marha. Yîhyai so cemahcisom wara tak nasî ahwora ehtoponhîrî komo, Okwe, okwe, kachonho yîwya so.

12 Owî rma Ow ha awahworen̂e komo. Onoke warai xa amyamro hara okwe? Tooto pona cerahsom me maxe, twaihsomtho pona mak ha. Cuupu wara ciisom mak mîkyam tooto me ewruxapu kom ha. Ahce kacho noro yipu komo pona meraswat ha?

13 Aporin komo ponarora tak mehtîkexe okwe, awakîton̂enhîrî komo ponarora. Kaapu yehyatkan̂enho Ow, roowo mapatan ciin̂enho marha Ow. Wara rma oponarora tak maxe okwe. Ero ke meraswaxe ro mak enmar̂atîxera okwe. Mokyaxe men okwe kwaparî komo kopi tîrwon̂em kopi. Kwaparî me tmohtopo komo poko n̂esencexe kopi, mîîkexe okwe. Ahto ma nat awya so awemetanmekn̂e komo, tîrwon̂em kom ha?

14 Pahnoke tak nasî ahruxa pen komo yahrunkacho. Yuhnawno yaw tahruso naxe okwe. Yohno rma tko n̂epatakexe waipîra cehtome so, iyuru komo yenatîra marha ehtome.

15 Aporin komo Ow ha, ponaro awehtopo komo. Tuuna imo yotakanman̂enho Ow yamarataka ken̂arî, cewtunîmsom ha. Ero yipu yotakanman̂enho rma Ow. Kporin komo, kantoman̂e ro, kacho Ow ha. Ero wa nasî oyosotî.

16 Omtapotarî rma wiir̂akn̂e amtaka so. Kahruce so marha oyamorî yawarpan ke. Ero wa kakronomexe so roowo mapatan ciitome hara owya. Ero yimaw marha on wara wîîkes Siaw pono komo ya, Oyanan komo amyamro okre, wîîkesî, Ero wa wîîkes awya so, kesî Kporin komo.

17 Ai Xerusaren pono komo, awya so wîîkesî rma, Apakacoko, apakacoko, kuywa poi tak ahtocoko. Kporin komo nîmîtho yeen̂enho amyamro wooku, yîrwonîmtopo yeen̂enho ha. Yînmîthîrî meetîketken̂e oko makumuthîrî meero. Atataren̂e komo mîn meetîketken̂e.

18 Mer̂pora cma re xatken̂e amrerî komo. N̂examro poyino exihra tko nas awan̂e komo me cehsom. Mer̂pora cma re mîpor̂mamnoyatken̂e amrerî komo. Exihra tak nai ham okwe n̂examro poyino awamorî komo yahsîn̂e, aweceton̂e kom ha.

19 Asakî thakwa nai awesemetanmetopo kom okwe. Onoke thakwa re apînîn yaw so nai hara? On wara nasî awesemetanmetopo komo, Metwîrîmetken̂e okwe, amînthîrî komo n̂ecakyakn̂e, rooma poko mîxatken̂e, awenmayipu pen komo marha waihketken̂e kacipara imo ke oko. Ero wara nas okwe awesemetanmetopo komo, awahwokacho kom ha. Onoke thakwa re wantome awahworetopo komo poko hara okwe?

20 On wara marha nasî awesemetanmetopo komo, n̂ekar̂ketîketken̂e amrerî komo okwe. Esama yaw so mak naxe pukno wa okwe. Kooso wara ro mak naxe mîîye yaka ecimxapu wara okwe. Kporin komo yîrwonîmrî ke ero wa naxe. Ponaro awehtopo komo n̂eitho me mak naxe okwe.

21-22 Ero ke on wara wîîkes awya so, emetanmexapu komo amyamro okwe. Wenîmxapu komo amyamro, kawaxiyem ken̂ehra wenîmxapu ha tko. On wara wîîkes awya so, Aporin komo Ow ha, ponaro awehtopo kom ha. Ow mak Aporinî ro komo. Oyanan xatî pîn komo yopono me tîmtapotaxmu Ow. Ero ke on wara wîîkesî, wooku makumuthîrî yeen̂e wara mehce, orwonîmtopo yeen̂e wara. Atataren̂e komo mîn orwonîmtopo. Ero yipu yeen n̂eexi awemyaw so, parakweci. Wowye tko awemyai so erîhra tak awehtome so.

23 Awemetanmekn̂e komo yemyaka tak wiir̂asî n̂examro wokru me hara. On wara kan̂enho mîkyam awya so, Etîrapocoko kr̂a amyamro oona amna yesamarî me, kan̂enho mîkyam. Ero ke roowo wara rma miice amkarî komo n̂examro yesamarî me, aapore n̂examro totopo me. Noro yipu komo tak n̂eer̂axe hara awokruthîrî komo, kesî Kporin komo awya so.