Taa, on wara marha kesî Kporin komo awya so, Ahto nai karita anocwan yai oyetowtoponho pokono, noro yen̂epetoponho owya? Ahto nai on̂epethîkatho, yîwya kîmyatken̂e so noro? Kicicme awexirî ke so matko wa metîmyatken̂e anarî komo ya. Omtapotarî yanwekrî ke awya so anocwan komo wen̂epekn̂e.

2 Omokyataw awenso so ahce kacho exihra ro mak mîxatken̂e iito? Ai, ai, wîîkekn̂e cma re awya so, ahce kacho oyeyukn̂e exihra ro mak xakn̂e okwe? Aporî kawra katî wai awya so awown̂e komo pîn me? Kar̂pera kat wai awya so akurunpen̂e komo pîn me? Tuuna imo yapainokan̂e tko Ow, eitopo ke mak wapainokesî. Tuuna yepu wiir̂asî axawa imo me mak. Ootî pen tak kowasî tuuna yexihtorî ke.

3 Awarpape tak wiir̂asî kaapu. Kumixitho ke ahruxapu wara mak wiir̂asî. Ero wara wiir̂as anarimaw so, kesî Kporin komo.

4 On wara oriyakn̂e Kporin komo Kaan. Ekar̂kaxapu komo yakro tîmtapotaxmu me oyehtopo poko ohcamhokekn̂e. On̂uru ciin̂e ro Mîk takîhso omtapotachome noro yipu komo yakro. Oyenpakesî marha Noro enmar̂atîxera. Cehcamhokaxmu waara oyenpakesî. Opanarî yenpakan̂e wara rma nasî tîmtapotarî yentachome.

5 Opanarî nahrunkekn̂e Kporin komo Kaan. Yîmtapotarî yanwekîra wîxakn̂e. Yîhyai etaknamara marha wîxakn̂e.

6 Omkarî rma wîhyokpekn̂e ooxatî pîn komo ya. Oyetpoci marha mohkapekn̂e yîwya so. Opoko n̂etaporetken̂e. N̂etakwatken̂e meero opore kica. Esewyahrura rma tko wîxakn̂e ero wara exitaw so opoko.

7 Oyakronomesî Kporin komo Kaan ha. Ero ke ahce na poko cehn̂axmu me exihnî me wasî. Ero ke apotmîkî xa wiire oyewru saama wara ro mak. Yîhyapamnoxapu me exihra ro mak wa was ha.

8 Kir̂wan̂he oyehtopo yenpon̂e nasî meyehra. Ero ke onoke ma re, Kicicme masî kica, nîîke opoko? Cesentacerî tak. Onoke xa oyen̂eka xe nai? Noro rma mokope ohyaka.

9 Kporin komo Kaan xa Mîk oyakronoman̂e. Onoke ma re oyen̂eke? Poonotho wara mak naxe oyen̂eka xatî komo ahnoro, tatîhsom wara. Mahcaru warai nahyasî poonotho, ero wara naxe.

10 Nai ha na apoyino komo, Kporin komo ponarono komo, Noro yantonî mtapotarî yewetîn̂e kom ha? Noro yipu rma na nai awarpanaw cetarisom wara. Weyumnî me ro mak na nai? Noro yipu komo exitaw Kporin komo yosotî pona mak tak n̂encowpe, ponaro cehtopo komo yosostî pona.

11 On wara tko wîîkes awya so hara, awehtorî komo yirin̂e komo ya, tpoturim yaan̂e komo ya, Awehtorî komo weyuru po rma etaricoko, tpoturim komo weyuru po mak ha. On wara tko maxe amn̂e merewaxe xa oko, awerewîmtopo chew cetîraposom me maxe oko. Owî rma ero wa kiir̂axe so.