Taa, ciwya pono komo n̂entarî me tan kîmtapowas hara meyeno komo n̂entarî me. Iitono komo, awya so kesekatîmyasî. Ero ke omtapotarî ka entacoko. Oyewrunaw rma oyan̂ikyakn̂e Kporin komo. Oyetacakn̂e oyewrutoponho n̂ixa ro rma.

2 Kacipara imo wara rma n̂iir̂akn̂e omtarî, iyohtoxapu wara. Oyeyamyakn̂e tamorî yawarpan yaka. Waiwî wara rma oriyakn̂e kir̂wan̂he enporixapu wara. Oyeyamyakn̂e marha, cemehnu yawno wara oriyakn̂e.

3 On wara kekn̂e owya, Oyanton amoro Ixaw ha. Kir̂wanî ro me oyehtopo yenpon̂e me mas okre, kekn̂e owya.

4 On wara tko wîîkekn̂e ohnaw makî, Tohnaw kekaricekn̂e okwe. Kar̂pe oyehtoponho wirihtîkekn̂e tohnaw ro mak okwe. Ero poko oyehtoponho yepetho tko nîhtînoyasî Kporin komo. Ponaro oyehtopo rma Mîk oyepemes amn̂e tanme ro.

5 Yememe ropotaw rma Kporin komo oyakîcekn̂e tanton me. On poko oyantomesî, tîhyaka Xako yepamtho komo yenmetopo poko, Ixaw yepamtho komo yenmetopo poko. Kir̂wanî ro me oyen̂as amn̂e Kporin komo, ponaro oyehtopo. Noro rma nasî okariton̂e me.

6 On wara kesî Kporin komo owya, Oyantonî rma re amoro. Ohyaka Xako yepamtho komo yenmekn̂e me masî, Ixaw Yana komo yenmekn̂e me ha. Onkurunpetho komo mîkyam menmekyasî. Ero pokono me ciki re masî. Wara rma Xenciu weyuru me marha tak kiir̂as hara oyanme akir̂wamano rin̂e me awehtome. Meyeno komo yakir̂waman̂e me masî, roowo mapitawno komo yakir̂waman̂e me, kes owya. Ero wa kesî Noro owya.

7 On wara marha kesî Kporin komo awya, Ixaw Yana komo yown̂enho Mîk Noro kesî, Kir̂wanî ro ha. Tooto komo nîwîrîyakatho amoro, kayaritomo komo yanton marha amoro, kesî. On wara marha kesî awya, Amn̂e tak kayaritomo komo nawomyaxe awen̂ataw. Antomano rin̂e komo nutupenwaxe tak Kporin komo xe cexirî ke so. Ero wara tak naxe apoko Kporin komo yanme, Kir̂wanî ro Mîk ponaro Ixaw Yana komo yehtopo, kemîknon̂e pînî ro mak. Tîwyanî ro me awahsîn̂enhîrî Mîk. Noro xe cexirî ke so nutupenwaxe, kesî. Ero wa kesî Kporin komo.

8 On wara marha kesî Kporin komo awya hara, Amtapotarî wentai mîk hak poko tawake oyehtopo me ka exitaw. Akir̂wamano ritopo me exitaw kakronomai. Kukurunpesî roro tak yaarono me omtapotarî yenpon̂e me awehtome. Yaaro ham Kaanî mtapotarî, Kakir̂wamexe so amn̂e, kacho, kexe tak apoyino komo awenîrî ke so. Roowo yakir̂waman̂e me marha kiir̂asî, ewtotho yekamn̂e me marha n̂examro yeken me, Ero warai me kiir̂asî.

9 On wara kan̂e me marha masî ahruxapu komo ya, Epatakacoko tak ha, kan̂e me. Awarpanawno komo ya mîîkes hara, Esenpocoko tak ha, mîîkesî. Esama yaw rma cetaw so noro yipu komo n̂eseresmexe tak. Cuupu tak n̂een̂axe îh po so, ewtî mera ehxapunhîrî po so.

10 Yîromamra tak naxe ero yimaw, Tuuna xe was okwe owokru, kahra marha naxe. Peramtara naxe, yipikara so marha nasî kaamo. N̂examro naar̂asî yîpînîn yawno rma. Tuuna pîtho kwaka naar̂asî.

11 Esama me tak wiir̂asî îîpînhîrî komo, orowon pono komo. Kaw n̂he marha wiir̂asî esama komo, orowon pono kom ha.

12 Mokyaxe tak amn̂e meyenonhîrî komo, mehxa mehxa wara mokyaxe, enko xe. Anarî komo mokyaxe nohce n̂ixa, anarî komo mokyaxe oesce n̂ixa, anarî komo mokyaxe hara Sin̂in rowon pononho komo.

13 Okre, okre, kacoko kar̂pe amyamro kah yawno komo. Ahwotacoko marha amyamro roowo pono kom hara. Ewanomacoko tak amyamro hara îîpî komo. Ero wara ehcoko tîyanan komo yahworerî ke Kporin komo ya okre, cesemetanmesom komo pînîn yaw exirî ke ha. Ero ke ahwotacoko.

14 On wara tko kesî Siaw, oyahsîpînkai okwe Kporin komo, opoko twen̂ekarî mak nas okwe, kexe.

15 Ahce wa nai rikomo yon awya so, tîmxîkrî poko ma re twen̂ekarî nai, moomo yeen̂e poko ha? Tîropotawnonhîrî pînîn yawra ma re nai awya so? Anarimaw so rma tko twen̂ekarî nat okwe rikomo yon. Wara rma apoko so yîtwen̂ekarîntara ro mak was Ow ha.

16 Awosotî komo mewrekn̂e Ow oyamoyeretaw. Awewton komo wacan ponaro xa wasî.

17 Amrerî komo tak mokyaxe hara kar̂pe. Awaparî komo tak cexe ahyai so ero yimaw, awewton komo yakn̂in̂enho kom ha.

18 Miya so esewyar̂ko. N̂esenmekyaxe tak amrerî komo. Ahyaka mokyaxe. Yaarono xa tan omtapotarî, waipîra wasî, kacho wara rma. On wara wîîkesî, aponon porokru wara rma miir̂axe amrerî komo. N̂examro yamrun̂e wara masî wooxam wara ciin̂ontaxmu wara, wîîkesî. Ero wa wîîkesî.

19 On wara tak nas amn̂e amararînthîrî komo, peen me ehxapunhîrî komo, eken ken̂ehra tak nasî mer̂pora ro mak exirî ke iina cesekenmaxmu komo. Eken ken̂ehra xa marha nasî awewtonthîrî komo, iipo aporin pen komo waihtoponho komo. Awermomn̂enhîrî pen komo tak naxe mooxe.

20 Mer̂pora tak naxe amn̂e amxîkrî komo, anarînhîrî pen komo yemtakan komo. On wara kexe n̂examro an̂entarî me, Wahra nas oyeken okwe. Takwekemî n̂he xe xa wasî oyeken, kexe.

21 Ero yimaw on wara mîîkexe ahnaw so mak, Onoke n̂ewrui moxam me omxîkrî me ha? Kîmxîkwaiyakn̂e cma re ka okwe, yîmxîtara marha wîxakn̂e. Owaparî rowon po thakwa wîxakn̂e okwe, poxumnî me mak. Onoke moxam por̂mamnoyakn̂e? Cewn̂e wîxakn̂e akronomra okwe. Ahn̂ixan komo moxam hara? mîîkexe tak.

22 On wara kes hara Kporin komo Kaan, On wara was amn̂e, kapockanwasî tak amn̂e Xenciu komo n̂enîrî me. Kayaritomo banteiran wanîmyasî meyeno komo n̂enîrî me. Ero ke amumuru komo tak n̂ekyaxe cenaw so rma. Awemsîrî komo marha n̂ekyaxe tmotaw so.

23 Kayaritomo komo tak naxe amxîkrî komo por̂mamnon̂e me. Kayaritomo pici komo marha naxe amxîkrî komo wokpan̂e me. Amamakan me nutupenwaxe n̂examro cesewnaposo ro. Roowo mak n̂emeyaxe ahtarî mîtwono. Ero yimaw on wara mîîkexe, Kporin komo xa Mîk ham on wara kiin̂e, mîîkexe. Pahkî opona enîn̂e komo naxe ehn̂an me ro mak okre, kesî Kporin komo.

24-25 Karitî komo nahsîtho ma re tahsîyat hara yînar̂mathîrî komo yemyawnonho awya so? Yukurumîkno komo narîtho ma re towyatu awya so? On wara tko kesî Kporin komo awya so, Nhnk, Karitî komo nahsîtho komo rma wowyasî. Yukurumîkno komo nahsîtho marha wowyasî yînar̂mathîrî komo yemyawnonho. Awakro cetar̂maxmu komo yakro marha ketar̂mes Ow hara. Ero wara wasî amxîkrî komo yukurunpetome owya.

26 Tupunthîrî komo ke rma tak awemetanmekn̂enhîrî komo wîyotmesî. Kawaxiyem yeen̂enho wara marha naxe tîkamxukuthîrî komo ke rma wenîmxapu wara. Ero yimaw tak on wara kexe tooto komo ahnoro, Ixaw Yana komo kurunpen̂e xa Mîk ham Kporin komo, n̂examro nowye. Karitî Mîk kopi ponaro Xako yepamtho komo yehtopo, kexe. Ero wara kexe tooto komo ahnoro.