Taa, Xako yepamtho komo amyamro, omtapotarî ka entacoko amyamro hara. Ixaw Yana komo, kacho rma amyamro. Xuta pen yepamtho rma amyamro. Kporin komo yetacin̂e amyamro, Yaaro xa tan wîîkesî, kachome awya so. Kaan yetacin̂e amyamro, ponaro Ixaw Yana komo yehtopo yetacin̂e ha. Yaarono mera tko metahcaxe okwe, kicicme awexitaw so rma okwe.

2 Kaan yewtonî ro pono amna okre, ponaro Ixaw Yana komo yehtopo pona enîn̂e ha, mîîkexe. Kporin komo, kantoman̂e ro, kacho Mîk, Noro poko ero wa mîîkexe.

3 Yîhcirî me ka awehtoponhîrî komo wekatîmyakn̂e awya so pahxa rma. An̂entarî me kîmtapowakn̂e. Ponan̂e tak ero wara rma kiir̂atken̂e so omtapotachonho yaw roro rma.

4 Oyanwekn̂e me kîhtînoyatken̂e so rma. Pehu me mak xakn̂e apîmîrî komo micin. Bronse me marha xakn̂e aperî komo.

5 Pahxa rma awehtopo komo wekatîmyakn̂e awya so. Ero wara maxe amn̂e, wîîkekn̂e awya so ero wa exihra rma ka awexitaw so. Ero wa wekatîmyakn̂e awya so on wara kahra ro mak awehtome so. Nasî weewe ponaro oyehtopo me ciixaputho ohyaw. Nasî marha kuripara ciixaputho ohyaw ponaro oyehtopo kom ha. Noro yipu komo rma ero wara amna n̂iir̂e, kahra awehtome so wekatîmyakn̂e awya so.

6 Ero wara awitoponhîrî komo mencetken̂e rma ha re. Yaaro, tîmtapotachonhîrî yaw roro rma kiice ham okwe, kahra kat mat ha? Oroto tak an̂entarî pîn komo wekatîmyas hara awya so, pahxarono tak ha. Ekatîmnînhîrî komo on wekatîmyasî awya so.

7 Oroto tak ahce na komo wakîhcesî, pahxa akîhtonînhîrî kom ha. Ero ke ero yipu yentara ka maxe. Oroto mak tak mencexe. Ero ke on wara kahra maxe, Nhnk, ero yipu wencesî rma, kahra maxe.

8 Ero yipu yentara ro mak ka mîxatken̂e. Ai ha, ero wara ma amna n̂iir̂a Noro, kahra ro makî ka mîxatken̂e. Pahxanînhîrî rma tpanayahruso mîxatken̂e okwe. Ween̂asî rma wa awehtopo komo, emîknono rin̂e me awehtopo komo kica. Awewrutoponhîrî komo n̂ixa ro rma, Kanwekn̂e, kacho me maxe kica.

9 Wara rma oyosotî yanme rma yamoro n̂he kîrwonasî apoko so. Awaikatîkara rma wasî opoko awahwotachome so rma.

10 Kusmunkace so rma tko, enko xe awexirî komo. Prata nusmunkexe ero warahra tko kusmunkace so. Awemetanmecho komo ke rma kukukmace so.

11 Kir̂wanî ro me oyesenpotopo ponaro xa wasî. Kir̂wanî ro me oyesenpotopo ponaro oyexirî ke xa ero wara kiice so. Warai makno wara oyesenpo xera ro mak wasî. Taa, kir̂wanî ro mîk hara ponaro oyehtopo, kacoko anarî ya, yiixe awexitaw so, kahra ro mak wa wasî.

12 Omtapotarî men entacoko amyamro, Xako yepamtho komo. Ixaw Yana komo amyamro, onan̂ikîtho komo. Kaan Ow ha, yihcithîrî xa Ow, mapitawno marha Ow ha.

13 Oyamorî ke rma roowo mapatan wiir̂akn̂e. Oyamorî ke marha kaapu komo wehyatkekn̂e, kaari n̂ixan ke. Kah yawno komo yan̂ikyataw owya oyewehcaxe. Iito re nawomyaxe.

14 Amohcoko xiya amyamro ahnoro. Omtapotarî ka entacoko. Nai ha re akîhtoxaputho ahyaw so. Onok warai ma re on wara ciino ritopo n̂ekatîmyakn̂e awya so, Babiron̂a pono pen komo yar̂macho ha? Yiixe xa Kaan yehtopo mîk n̂examro pen yar̂man̂e. Kaan nîhtînorî yaw roro rma Kawtew Yana komo nar̂mesî taporî ke rma.

15 Owî rma ero warai me noro wiir̂akn̂e. Noro wan̂ikyakn̂e xiya mohtome. Ehn̂an me ro mak noro wiir̂asî n̂examro pen yar̂macho poko.

16 On wara marha wîîkes awya so, Meyehra n̂he amohcoko omîtkoso, omtapotarî ka entacoko. Yihcirî me ka awehtopo komo yekatîmyataw owya en̂epa me yîmtapotara rma wîxakn̂e. Omtapotacho yaw roro rma tak mîxatken̂e. Ero yimaw iito rma wehxe Ow. Taa, ahyaka so tak oyen̂epei Kporin komo, Kaan ha. Cekatî ke rma oyen̂epei. Ero wara oyen̂epei, kesî. Ero wa kesî Kporin komo.

17 On wara marha kesî Noro, Kporin komo, awown̂e kom ha. Kir̂wanî ro Mîk, ponaro Ixaw Yana komo yehtopo Mîk kesî, Aporin komo Ow ha, ponaro awehtopo kom ha. Kir̂wan̂he awin̂e komo Ow ha, kesî. Owenari amohcoko kir̂wan̂he awehtome so, kesî marha. Ero wa kesî Noro awya so.

18 Ahce kacho apanatanmetopo komo ponarora mîxatken̂e okwe? Ero ponaro awexitaw so ketaw ha re ahwokan me roro mehcerî ha re okre. Tuuna yepu wara rma n̂exirî ha re ahwokan me awehtopo komo. Tuuna imo wara marha n̂exirî ha re kir̂wan me awehtopo kom hara, yamarataka ken̂arî wara.

19 Mer̂pora ro mak n̂ehcerî awepamthîrî komo axawa wicakî rma okre. Yukuknomarî yopo ro mak nasî axawa pupuntho ciki, ero wicakî yakenonî rma n̂ehcerî ha re amxîkrî kom ha. N̂examro yosotî yîhcamnopîra ro mak wehxirî ha re. N̂examro yir̂ponkara marha wexirî ha re, kes awya so ha.

20 On wara marha wîîkes awya so, Babiron̂a poi etocoko. Kawtew komo yai ro mak tak emahcicoko. Awowtoponhîrî komo tak ekatîmcoko miyan komo ya rma. Waano me rma ekatîmcoko. Emtarakacoko ro mak tahwore awexirî ke so. Roowo yenatîtopo tono komo n̂entarî me meero emtarakacoko. On wara kacoko, Tanton komo tak nowye Kporin komo, Xako yepamtho kom ha, kacoko.

21 Turpem pore xa n̂examro naar̂akn̂e, tuuna exihnî pore. Wokumnî me xa exihra rma tko tî xatken̂e. Tuuna tî n̂en̂emhatakekn̂e Noro toopu yatumnai rma. Toopu nîmtakekn̂e, ero yinhîrî xoo kekn̂e ro mak tak tuuna mer̂pono pîn.

22 Cereporem me exihra ro makî tko naxe kicicitho komo, kesî Kporin komo. Ero wara kesî.