Ai, on wara wîîkes awya, Babiron̂a pono yemsîrî amoro, iin̂omnî ro ha. Ahtoko ka xiya. Roowo pona mak tak eremakî. Roowo pupun pona mak eremakî kayaritomo yapon ponahra. Kawtew komo yemsîrî amoro. Tupunporem, kacho mera ro mak tak mas okwe, yupun cukmano, kacho mera marha masî.

2 Etapickakî tak puruma yaposokacho poko. Toh ke aposokakî. Awewoponthîrî tak mohkakî. Asayanthîrî marha mohkakî. Pononmra tak n̂expe apetî. Tuuna yepu tak watoko.

3 Sayamra ro mak tak masî. Akicicin tak n̂esenpesî kopi. Ero wa kesepanîyas apoko. Ahyawno komo wîwîrîmesî ahnoro watohnî me ro mak. Ero wa kesî Kporin komo.

4 Kir̂wanî ro Mîk kown̂e ro, ponaro Ixaw Yana komo yehtopo. Kporin komo Mîkî, kantoman̂e ro. Ero wa nai Noro yosotî.

5 On wara marha wîîkes awya, Kawtew komo yemsîrî ya, kes hara Noro, tîtken̂e mak eremakî, awarpanaka etoko. Kayaritomo pici mîk ham, mer̂pono pici, kacho mera tak masî.

6 Owî rma re kîrwonakn̂e oyanan komo poko. Ero ke n̂examro wîwîrîmekn̂e oyanan komo rma. Awemyaka wîmyakn̂e. Yîpînîn yaw sora ro makî tko mîxakn̂e okwe. Poritomo komo meero mapickekn̂e iyopo so ro mak okwe.

7 On wara mîîkekn̂e, Kayaritomo pici me wasî eroromero, mîîkekn̂e. Ero ke oyanan komo yahwokatîkacho poko eserepokara mîxakn̂e kica. Opoko men n̂esepanîya amn̂e ponaro n̂examro yehtopo, kahra ro mak mîxakn̂e okwe.

8 Ero ke omtapotarî ka entakî. On wara masî, awesewakoma xe mak mas okwe. Erasîn me mak menmayasî. On wara kan̂e amoro, Ow mak ow ha kayaritomo pici, anarî exihra ro mak nasî owarai, mîîkesî. Iin̂owaixapu me exihra ro mak wasî, tîmxîkwaisom mera marha wasî, mîîkesî marha kica.

9 Ero ke ero wara rma mas amn̂e okwe. Iin̂owaixapu me masî, yîmxîkwaixapu me marha masî. Ero wa masî ero re po rma kaamo po. Ero wa mehtîkesi ro mak okwe. Erem komo poko masî mer̂pono pîn poko. N̂ukwa yosom me marha mas okwe. Ero ke ero wara tak mas okwe.

10 Kicicme awehtopo mak mîhtînoyakn̂e akurun me. On wara mîîkekn̂e, On poko oyexitaw oyenîn̂e exihra ro mak nasî, mîîkekn̂e kica. Takîhso rma re masî, cehcamhokaxi marha re masî. Ero wara awehtopo rma tko awir̂asî anarme cesehtînosom me okwe. Ero ke on wara mîîkesî, Kayaritomo pici ow ha. Anarî exihra ro mak nasî kayaritomo pici me cehsom, mîîkesî kica.

11 Metwîrîmetîkesî men amn̂e okwe. Onoke yanme na ketwîrîmetîke, yîhtînopîra wasî, mîîkesî. Mesemetanmekyasî ro mak amn̂e. Yukurumra ro mak mas okwe. Ponan̂e rma metwîrîmetîkesî twen̂ekarî awexitaw rma okwe.

12 N̂ukwa poko roro mîxakn̂e, eremkano rin̂e me marha mîxakn̂e emapona roro. Ero yipu ponarononho amoro mehxa ro amrenai ro rma. Yukukmakî rma ka. Ehn̂an me ma re awir̂a ero poko awehtopo? Kar̂pe ma re awir̂a awaparî komo yopono me?

13 Anarmerpan komo mîhtînoyasî awakîretopo me. Ero yipu poko awehtopo pokekn̂e tak awya. Taa, akurunpen̂e me tak nawomcowpe xir̂ko yenîn̂e komo rma, xir̂ko yanme awehtopo yekatîmn̂e komo marha. Nuun̂i yepatakacho yimaw roro awehtopo yekatîmn̂e komo marha nawomcowpe. Noro yipu komo tak akurunpepe etwîrîmara awehtome.

14 Puruma yeputho wara rma tak naxe noro yipu komo amn̂e. Wehto ywaw n̂ecakyaxe okwe. Cecahsom mera rma kecir̂asî, ket ha na. Pîra rma thakwa, n̂ecakyaxe rma. Porin mîn wehto oco, wehto roron mak pîn mîn, awesontopo komo mak pîn mîn oco.

15 Ero wa mak naxe yaskomo komo. Noro yipu komo yakro metapickekn̂e. Amrenai ro rma n̂examro yakro mîwarawanwakn̂e. Awakronoman̂e pîn me ro mak naxe. Miya so mak n̂etar̂axe awarawanînhîrî komo cemyawno ro poko. Akurunpera rma naxe okwe noro yipu komo. Ero wara naxe okwe.