On wara marha kesî Kporin komo awya so, Bew encoko, N̂ebu kom ha. Ponaro awehtopo komo mîkyam kica. Tutupentaxmu wara ero yipu komo exirî encoko. Epîrkaporo naxe okwe. Noro yipu komo warai me ciixapu naar̂asî paaka, tawsîn̂em okwe. N̂ekar̂kekn̂e thakwa awoh komo ero yipu yaar̂ataw.

2 N̂eremexe mak paaka. Anakîtothîrî komo yecehtora thakwa naxe, arîhra naxe. Awaparî komo xa matko naare okwe. Ero wa xakn̂e ponaro awehtopo komo okwe.

3 Ai, Xako yepamtho komo awya so wîîkesî, Ixaw Yana poyinonho etîmtoxapu rma amyamro, omtapotarî ka entacoko. Awewrutoponhîrî komo n̂ixa ro rma aweceton̂e komo Owî reha. Anocwan komo ropotainonho rma awan̂e komo marha Ow.

4 Ero wara rma was apoko so amn̂e poritomo me awehtopo komo pona roro. Kaar̂axe so rma tumutwe ahpoci komo yehtopo pona roro. Kakîhcetken̂e so, ero ke kaar̂axe so eroromero, kukurunpexe so marha.

5 Onoke warai me xa Ow mîhtînoyatu? Etîme re mak naxe n̂examro, Kporin komo, anarî komo yakro, mîîket ha ma re awya so?

6 On wara naxe anarî komo, ooru merurkexe kumixi yawnonho mer̂pora. Prata marha nukuknomexe kawsîn yukuknomacho ke. Ooru pokono ro tak nantomexe ponaro cehtopo komo yakîhtorî poko. Akîhtoche n̂esewnapexe tak ero mamaka. Oporin xa amoro okre, kexe ero yipu ya kica.

7 Anarimaw so akîhtoxaputho nanîmyaxe tmotaka so. Anana naar̂axe ekenî ro pona. Iina tak n̂iir̂axe piiri. Iito thakwa mak nasî, anana tohnî me ro mak. Ero n̂entarî me rma tak nîmtapowaxe kar̂pe, Ow yukurunpeko, kexe. Eikura ro so mak nas okwe. Esemetanmexapu komo yakronomara marha thakwa nas okwe.

8-9 Omtapotarî ponaro men ehcoko. Tooto me mak awehtopo marha enpoko. Omtapotarî yîhcamnopîra ehcoko. Ero wa xa nîîkai Kaan kîwya so, kacoko roro amyamro oyanwekn̂e kom ha. Pahxa awehtoponhîrî komo ponaro marha ehcoko. Kaan Ow ha, anarî exihra ro mak nasî. Kaan Ow ha, owarai exihra ro mak nas anarî hara.

10 Yihcirî me kakîhcetken̂e so ero yimaw rma miya roro awehtopo komo wekatîmyakn̂e awya so. Pahxa ro mak wekatîmyakn̂e awya so, Ero wara men maxe miya roro awaitopo komo pona roro, wîîkekn̂e ero wa exihra rma ka awexitaw so. On wara kan̂e ro Owî, Omtapotachonho yaw roro rma kiir̂axe so. Ahce wa na ciino ciri xe oyexitaw ero wara rma ciino wiir̂asî ciitîkaxi ro.

11 On wara marha ciino wiir̂asi, wikoko warai wan̂ikyasî mehxa resce n̂ixa ro. Meyeno mîk wan̂ikyasî owya yîhtînotopo yaw roro ciino rin̂e ha. Ero wara ciino wiir̂asî, wîîkekn̂e. Ero ke ero yaw roro rma ciino wiir̂asî. Owya yîhtînotopo yaw roro rma wa ciino wiir̂as ha.

12-13 Kanwekn̂e ro komo amyamro, kir̂wan me exporono pînî komo ro mak amyamro. Omtapotarî men ka entacoko. On wara wîîkes awya so, kir̂wanî ro me oyehtopo wekyas amn̂e meyehra xa. Mooxe exihra tak nasî. Akurunpetopo komo poko ecmamra wasî. Kukurunpexe so tak amyamro Siaw pono komo. Kir̂wanî ro me oyehtopo wiir̂asî Ixaw Yana komo pona. Ero wa n̂examro wiir̂asî.