On wara marha kekn̂e Kporin komo owya, Siru yakro kîmtapowasî rma. Kayaritomo me onîhkapetho mîkî, noro yamorî yahsîn̂e marha Ow kaari n̂ixan. Mîk hak rowon pono pen komo war̂mapesî yîwya. N̂examro kayaritomon pen ponontho tak mohkapesî yîwya kuripara ha. Noro cetaw metata komo wahrunkesî ero yaro so totohme tak. Ahrun me ro mak wiir̂asî metata komo noro totopo me.

2 On wara wîîkesî yîwya, Aywapu kîwces Ow. Cekumxe exitaw awesamarî pexunkesî tak. Awahkoton̂e komo na natu metata wara so, bronse ciixapu wara. Ero yipu komo yahkan̂e wara ro mak wasî. Pehu me exitaw metata yecetî wîhkocesî kr̂a. Ero wa wiir̂asî awahkoton̂enhîrî pen komo.

3 Kir̂wan komo marha wîmyasî awya awarpanawno. Cepethîkem xa wîmyas awya, eyamxapunhîrî ha. Ero warai wîmyas awya on wara kachome tak awya opoko, Kporin komo Mîk oyakronome ham. Oyetacasî Noro, ponaro Ixaw Yana komo yehtopo Noro oyakronome ham, kachome awya opoko.

4 Oyehtopo yentan̂e pînî rma amoro. Wara rma ketahcasî. Awosohton̂enhîrî rma Ow. Ero wara kiir̂e Xako yepamtho komo yanme, oyanton komo yanme ha. Oyananî ro me onîhtînoputho komo mîkyam Ixaw Yana komo.

5 Aporin komo Ow ha. Anarî exihra ro mak nasî Aporin komo xa. Ow mak Ow ha Kaan. Anarî exihra ro mak nasî. Oyehtopo yentan̂e pîn Amoro. Wara rma kîkaricesî.

6 Ero wara wasî apoko oyehtopo yentome tak tooto komo ya ahnoro, resce n̂ixan komo, oesce n̂ixan komo meero. On wara kan̂e me exi xe so wasî, Noro mak Mîk Kporin kom ham, anarî exihra ro mak nai ham, ka xe wasî yîwya so.

7 Katpan ciin̂e Ow, awarpan ciin̂e marha Ow. Ahwokan me ciino rin̂e Ow. Emetanmekno rin̂e marha Ow. Aporin xa Ow ero wara ciino rin̂e ha.

8 Kir̂wanî ro me oyehtopo yenpo xe wasî. Ero ke tuuna mokyatawno wara n̂expe kah yai tmohsom. Akir̂wamano ritopo owya tak roowo yai cepatakaxmu wara marha n̂expe hara. Ero yakro rma tatîhtaxmu wara n̂expe kir̂wan̂he kehtopo hara. Aporin komo Ow ero yipu ciin̂e.

9 Okwe ro mak wîîkesî takîhton̂enhîrî yakro ceseseyusom poko. Wakanan̂etho mak amyamro, wakanan̂etho komo chewno mak ha. Ahce wa nîîke er̂mo tîkahn̂e ya, Ahce me ow miir̂a kopi? nîîke ha? Ahce wa nîîke ankaputhîrî komo apoko so, Amohnî ro mak mîkro kica okahn̂enho, nîîke ha? Ero wa kahra ro mak nasî.

10 Okwe ro mak wîîkesî on wara kan̂e ya hara, tîîm ya kan̂e ya, Ahce warai me ow miir̂e kica, kan̂e komo ya. Tînocwan ya na nîîke on wara, Onoke warai me mewrui kica? nîîke. Okwe ro mak wîîkesî ero wa kan̂e komo ya. Ero wa kesî Kporin komo.

11 On warai Mîk Kporin komo, Kir̂wanî ro Mîk, ponaro Ixaw Yana komo yehtopo, n̂examro yakîhton̂enho ha. Noro yipu on wara wîîkes awya so, Ahce kacho mîîketu, Cesentacerî kîw amxîkrî komo yehtopo poko, pahxarono poko ha, mîîketu? Ahce na ciir̂ataw owya On wara cirko ha ke? mîîketu ma re owya? kesî Kporin komo.

12 Roowo yakîhton̂enho Ow. Ero pono me tak tooto wakîhcekn̂e hara. Oyamorî ke rma kaapu komo wehyatkekn̂e. Ahnoro rma xir̂ko komo yantoman̂e Ow ha.

13 Siru tak wiir̂as kayaritomo me kir̂wan̂he oyexirî ke. Noro yesamarî komo pexunkesî kir̂wan̂he totohme. Oyewton pona tak mîîmo komo n̂irpesî noro. Oyanan komo tak n̂en̂epesî tanme ro so totohme. Ero wa n̂iir̂asî waapa nahsîtho komo. Epethîrî ponahra rma ero wara n̂iir̂asî oyanan komo, kesî Kporin komo, kantoman̂e ro.

14 On wara marha kesî Kporin komo awya so, Amn̂e tak Exitu pono komo n̂iritho tak mahsîyaxe awemyawno komo me, Eciopia pono komo n̂iritho marha, Sabeu komo n̂iritho marha. Kawno komo xa mîkyam. N̂examro tak mokyaxe ahyaka so. Awanton komo me tak naxe. Awenari so mokyaxe tapomiso so rma kanawa mici warai ke. Amamakan me nutupenwaxe. On wara kexe awya so, Amna pînîn yaw ehcoko. Kaan xa nasî awakronoman̂e komo me ham. Noro mak Mîk Kaan, anarî exihra ro mak nai ham, kexe awya so. Ero wara naxe n̂examro amn̂e, kesî Kporin komo awya so.

15 Yaaro wîîkes on wara Apoko Apa, Ceseyamsom Mîk Noro Kaan, wîîkesî. Ponaro Ixaw Yana komo yehtopo Mîk Kaan, amna yakir̂waman̂e ha, wîîkes apoko Apa.

16 On wara naxe mîk hak warai ciin̂e komo amn̂e, cehn̂axmu me mak naxe ahnoro mak. Iito re n̂epîrkexe, camkîno me tak n̂esenpexe.

17 Ixaw Yana komo reha nakir̂wamesî Kporin komo eroromerono me. Ehn̂an me reha maxe amyamro Ixaw Yana komo, camkîno me esenpora marha maxe okre. Ero wara maxe miya roro eroromero mak ha.

18 Awakro so nîmtapowas hara Kporin komo. Kaapu yakîhton̂enho Mîk Kporin komo, Kaan xa Mîk, roowo yakîhton̂enho. Cekenke roowo n̂iir̂akn̂e anana tohnî me. Pohnî me mak akîhtora xakn̂e, tooto yeken me xa matko nakîhcekn̂e. Ero yipu yakîhton̂enho Mîk Kporin komo. On wara kesî Noro tpoko rma, Aporin kom Ow ha. Anarî exihra ro mak nasî Aporinî ro komo.

19 En̂epa me mak yîmtapotara wîxakn̂e. Awarpanawno po yîmtapotara wîxakn̂e. On wara kahra wîxakn̂e Xako yepamtho komo ya, Oyakro mîmtapowaxe ha re tohnaw ro mak okwe, awentara so wasî, kahra wîxakn̂e yîwya so. Aporin komo xa Ow ha. Kir̂wan poko tîmtapotaxmu Ow. Kir̂wanî ro me awehtopo komo yekatîmn̂e Ow ha.

20 On wara wîîkes awya so, Xiya amohcoko. Mîk hak rowon pono komo chei emahcixapu komo amyamro esenmecoko ohyaka. On wara naxe anarî komo, onoke na warai me ciixapu n̂ewyar̂axe ponaro cehtopo komo me, weewe makî. Kaan warai me cehsom yakro tî re nîmtapowaxe tukurunpen̂e pîn yakro rma kica. Camkîno komo mak ero wara naxe okwe.

21 Esentacoko amyamro awehtopo komo poko. Ero yinhîrî owya ekatîmcoko, Onoke xa awya so n̂ekatîmyakn̂e pahxa awehtoponhîrî komo? Ow mak wekatîmye ha. Ow mak Ow ha Kaan. Anarî exihra ro mak nasî Takîhso ciino rin̂e Ow Kaan ha. Awakir̂waman̂e Ow. Anarî exihra ro mak nasî awakir̂waman̂e kom ha.

22 Opona tak encoko amyamro ahnoro tooto komo, roowo mapitawno komo meero. Kaan Ow ha, anarî exihra ro mak nasî.

23 On wara wîîkekn̂e awya so, Yaaro xa tan wîîkesî cemaro pîn me ro mak, oyehtopo rma wetahcakn̂e ehn̂an me ehtome omtapotarî. On wara wîîkekn̂e, Ahnoro tooto komo tak omamakan me n̂eremexe amn̂e tosokmuru po so. On wara kexe, Yaaro xa amna kesî cemaro pîn me ro mak, Noro yakrono xa amna ha, kexe tak opoko.

24 On wara marha kexe opoko, Kporin komo ponarono me oyexirî ke mak kir̂wan̂he wasî, ero wa oyexirî ke marha kar̂pe wasî, kexe, wîîkekn̂e. Ero ke ero wa naxe omtapotachonho yaw roro, kesî Kporin komo. On wara tak naxe tooto komo ero yimaw, Kporin komo yaka tak mokyaxe, nîhyapamyaxe tak Noro poko yîrwonîmxapunhîrî komo ahnoro. Ero wa naxe okwe.

25 On wara tak naxe Ixaw Yana komo ero yimaw, Kporin komo ponarono me tak naxe. Ero wa cexirî ke so kir̂wan me ciiso naxe. Noro poko tahwotaxmu me marha naxe. Ero wara naxe Ixaw Yana komo amn̂e.