1-2 On wara tko kesî Kporin komo awya so, Xako yepamtho komo amyamro oyanton komo. Ixaw Yana komo rma amyamro, oyananî ro me onahsîtho kom ha. On wara marha wîîkes awya so, Aporin komo Owî, awakîton̂enhîrî kom ha. Owî rma kakîhcetken̂e so anocwan komo ropotaka so rma. Awakronoman̂e komo rma Ow. Oyantonî ro komo amyamro Xako yepamtho kom ha. Xesurun komo rma amyamro oyananî ro me onahsîtho komo. Ero ke erasîra ehcoko, wîîkes awya so.

3 On wara kakronomexe so, tuuna wen̂epesî twokru xatî komo pona. Tuuna yepu komo wakîhcesî turpem pono rma. Awepamthîrî komo pona Oyekatî warkesî, xoo kacho wara. Awepamthîrî komo wakresî ro mak xoo kacho wara rma.

4 Awepamthîrî komo naxe cuupu chew atîhtaxapu wara, woskara pono wara okre. Sawkeru yepu wara marha naxe, tuuna yepu yecihtaw tatîhtaxmu wara okre.

5 On wara kes amn̂e awepamthîrî, Kporin komo yanton xa ow ha, kesî. Xako yepamtho ow ha, kesî anarî hara. Tamorî poko rma mewresî anarînhîrî hara. Kporin komo yanan ow ha, kacho mewresî. Ixaw Yana ow ha, kexe marha tpoko so rma.

6 On wara kesî Kporin komo awya so, Ixaw Yana komo kayaritomon Mîk kesî. Ixaw Yana komo town̂enho Mîkî kesî, kantoman̂e ro ha. On wara kesî Noro awya so, Yihcithîrî Ow, okomn̂an marha Ow ha. Ow mak Ow ha Kaan, anarî exihra ro mak nasî.

7 Ero ke onoke xa nai owara xa awehtopo komo yekatîmn̂e me? Noro yipu exitaw na awehtoponhîrî komo ka n̂ekatîmhe, tatkem me xa n̂ekatîmpe. Pahxa oyanan komo wahsîyakn̂e. N̂examro yehtoponho n̂ekatîmpe mehxarononho rma. Ahce wa tak nat amn̂e pahxaro? Ero marha n̂ekatîmpe pahxarono hara. Ero yipu xa n̂ekatîmpe anarî exitaw owarai xa.

8 Erasîra ehcoko, tatamra marha ehcoko. Pahxa rma ero wara awehtopo komo wekatîmyakn̂e awya so. Ero yipu yentan̂enho komo xa amyamro. Ero ke on wara wîîkes awya so, Nai ha ma re awya so anarî owarai xa, ponaro awehtopo ro komo? Pîra, Ow mak Ow ha Kaan. Anarî exihra ro mak nasî. Nai ha ma re toopu hara owarai hara? Pîra ro mak, anarî exihra ro mak nas owya, kesî Kporin komo awya so.

9 On wara marha kesî Noro awya so, Tohnaw cesehtînosom komo mak mîkyam ponaro awehtopo ciin̂e komo. Tîpîn̂e xa n̂een̂axe tîn̂irithîrî komo rma. Ero wara n̂een̂axe takronoman̂e pîn komo rma okwe. Ehn̂atopo komo me mak nasî ero pîntho poko ehtopo komo. Yin̂irithîrî nasî tohnawno me cehtopo rma. Enko xe, ewuhnî me naxe okwe, panahnî me marha. Ero ke akpîntho me mak n̂enpexe okwe tîcin̂e komo.

10 Anarî komo weewe n̂iir̂atu ponaro cehtopo komo me. Anarî komo kuripara nukuyatu hara ero yipu ciitopo xa marha. Ahce kacho takronoman̂e pînî ro mak n̂iir̂atu kopi?

11 Cehn̂axmu me mak naxe kopi noro yipu yakrono komo. Tooto mak mîkyam ponaro ehtopo yakîhton̂e komo. Mohcowpe rma ka oona, piiri nawomcowpe. N̂eraswaxe makî tko okwe amn̂e, etîme re rma naxe cehnaxmu me re.

12 On wara kuripara n̂iir̂axe noro yipu komo, nahsîyaxe carata imo ke. Wehto roron chew nocoronpexe. Ero rma tak nakîhcexe ponaro cehtopo komo me, aama ke n̂etapexe enporitome. Emapona n̂etapexe kar̂pe exirî ke aporî komo. Ero yinhîrî nîromanaxe hara, n̂ekar̂kexe tak. Tuuna yerîhtorî ke so marha n̂ekar̂kexe.

13 On wara naxe anarî kom hara, weewe n̂enpor̂axe hara. Hekwa ke nukuknomexe. Xapopo warai ke marha nukuknomexe. Wohxokacho ke memehserexe marha. Kompasu ke mewrexe weewe poko. Kir̂wan̂he n̂enpor̂axe tooto warai me. Ero wara n̂enpor̂axe tîmîn yawno me ciitome tak.

14 Setru yepu na nametu, siprexte yepu ha na, kahpar̂u ha na anarimaw. Mer̂pora nasî weewe komo comota po. Anarî mak men̂ekexe poko cehtopo ro komo me. Anarimaw piinu na n̂iir̂atu tînatîrî komo me. Ciriche tuuna tak mokyasî atîkrecho.

15 Ero yinhîrî tak twehtorî komo me tak nakn̂iyaxe amn̂e. Ero pona tak n̂eson̂axe okre. Ero pona marha tak tuuru komo naayaxe hara. Yîhkotonhîrî tak n̂iir̂axe ponaro cehtopo komo me hara. Ero yakro nîmtapowaxe, Oporin amoro, kexe kopi. Ero mamaka marha nutupenwaxe cesewnaposo ro kopi.

16 On wara n̂iir̂axe tînamathîrî kotonho komo, twehtorî me so n̂iir̂axe. Wehto yetahsîche ero pona tootî komo nîyexe, anarimaw petîthîrî nupur̂axe tot me so. Tmaxmitaxi ro tak n̂eseresmexe. Twehtorî pona marha n̂eson̂axe. Okre, oyesontopo on okre, kexe.

17 Yîhkotonhîrî rma tak n̂iir̂axe hara ponaro cehtopo komo me kopi. Noro mamaka tak nutupenwaxe. Oporin amoro, kexe ero ya rma kopi. Ero yakro nîmtapowaxe. On wara kexe yîwya, Ponaro oyehtopo ro amoro, Ero ke ow yukurunpeko, kexe kopi. Ero wa kexe noro yipu komo.

18 Camkîno ro mak mîkyam noro yipu komo, takîhso esehtînopîn kom ha okwe. Ahkoromaxapu wara ewru komo n̂iire Kaan ahce na yenîhra ro mak ehtome so okwe. Yîropotarî komo marha nahrui takîhso esehtînopîn me ro mak ehtome so.

19 Ahri ka, takîhso ka kesehtînoyasî, kahra ro mak naxe. Takîhso esehtînopîn me thakwa naxe okwe, yuhnari yîhtînon̂e pîn me ha. Takîhso cesehtînosom me exitaw so ketaw ha re on wara kexe ha re, Ero pîntho mamakan me kutupenwa ham kica. Enko, weewe kotonho wiirî owehtorî me. Ero roron pona tak oyuru waai, oyotî marha wupur̂u. Keseresma tak okre. Ero yîhkotonho tak wenporiw hara kicicitho me ro mak tak kica. Weewetho mamakan me kutupenwa ham kica, kexe ha re. Ero wa kexe ha re takîhso cesehtînosom me cexitaw so ketaw ha re.

20 Wermonho yahn̂e wara mak naxe noro yipu komo okwe. Cesewkukmaxi mak naxe tîropotaw so okwe. Ero wa exirî ke so n̂etowyatken̂e anarmen pona okwe. Tîropotarî komo yakir̂wamara thakwa naxe okwe. On wara kahra thakwa naxe, Cemaro mak on oyamorî yawno, kaari n̂ixan yawno ha, kahra thakwa naxe okwe.

21 Ero ke ero wa omtapotachonho ponaro men ehcoko amyamro Xako pen yepamtho komo. Onakîhtotho amyamro, oyanton komo me kakîhcetken̂e so. Ero ke apoko so yîtwen̂ekarîntara ro mak wasî. Ero wara wasî apoko so Ixaw Yana komo poko.

22 Awya so oyanwetoponho tak wickai. Tuuna yewru n̂ehcamnoyasî anarimaw ero wara wickai. Kicicme awehtoponhîrî komo wickai kaapu smun wara. Ero ke ohyaka amohcoko hara. Kowyatken̂e so owyanî ro me.

23 Ewanomacoko tak amyamro kah yawno komo tahwore awexirî ke so Ixaw Yana komo yakir̂wamacho poko, Kporin komo ya akir̂wamacho poko ha. Emtarakacoko amyamro hara roowo pono komo, kaapu makatawno kom ha. Îîpî komo amyamro marha ewanomacoko, comota komo marha, weewe komo ahnoro. Xako yepamtho komo nowyakn̂e Kporin komo okre. Kir̂wan̂he cehtopo tak n̂enpesî Ixaw Yana komo ke. Ero ke ewanomacoko. Ero wara ehcoko.

24 Awown̂enhîrî komo Mîk Aporin komo, anocwan komo ropotaw awakîton̂enhîrî kom ha. On wara kesî Noro awya so, Aporin kom Ow ha. Miyan komo yakîhton̂enho Ow ha. Ow mak kaapu wehyatkekn̂e. Roowo marha wamtarekn̂e Ow mak ha.

25 Naxe rma re awehtopo yekatîmn̂e komo. Ero wa taxe amn̂e, kexe kica. Yîmtapotarî komo yehn̂anmekn̂e tko Ow. Tîmtawaimamsom wara marha wenpesî, Ero wara taxe amn̂e, kan̂e komo. Ehcamhokaxapu komo yesehtînotopo waknamesî camkî ehtome so tak okwe.

26-27 Oyanton komo mtapotarî yaw roro rma ero wa ciino wiir̂asî. Ero wara taxe amn̂e, kexe onantomatho komo, ero wa kacho yaw roro rma ciino wiir̂asî. On wara wîîkesî Xerusaren poko, mer̂pora tak ehcoko ero pono komo, wîîkesî. Xuta yepamtho yewtonî mko ya wîîkesî, Ecirpocoko tak amn̂e, wîîkesî. Mîîmotho komo ya marha wîîkesî iitono komo pono ya, Ecirpocoko tak hara amn̂e iitono komo mîîmotho, wîîkesî. On wara wîîkesî tuuna imo ya, Apaiko tak ha, wîîkesî. Tuuna yepu marha wapainokesî arowon komo pore tîtosomu mko ha.

28 On wara wîîkesî Siru poko hara, Oyok yenîn̂e mîkro oper̂a yenîn̂e, wîîkesî. Ciino ri xe oyehtopo n̂iitîkesî noro. On wara kesî noro Xerusaren ya amn̂e, Esewtomapoko xa hara, kesî. On wara kesî omîn ya hara, Amapatan tak n̂ecirpope, kesî. Ero wa kes amn̂e Siru, wîîkesî. Aporin komo Ow ero wa wîîkesî.