On wara tko kesî Kporin komo oroto awya so, Xako yepamtho amyamro, Ixaw Yana kom ha. Awakîton̂enhîrî komo Ow, apun komo yakîhton̂enho rma. Erasîra ehcoko, awown̂enhîrî komo Ow. Awosotî komo poko ketahcatken̂e so, oyanan komo me kiir̂atken̂e so.

2 On wara kakronomexe so, kahxi chere awcetaw so iito wasî awakro so. Tuuna yepu kwari awcetaw so enorira maxe. Wehto chere meero na mîîcetu anarimaw hara. Ero wa awexitaw so ecakîra rma maxe. Apoko so etahsîra nasî wehto.

3 Aporin komo Kaan Ow, Ponaro xa mak Ixaw Yana komo yehtopo komo Ow ha. Awown̂enhîrî komo marha Ow ha. Exitu pono komo wîmyakn̂e awepethîrî komo me. Eciopia pono komo marha wîmyakn̂e awepethîrî komo me, Seba pono komo marha.

4 Yîpînîmîkno xa amyamro owya, takihsom me marha keen̂axe so, aaxe so wasî. Ero ke tooto komo rma wîmyasî awepethîrî komo me, anarî yana komo wîmyasî waipîra awehtopo komo yepetho me.

5 Erasîra ehcoko, awakro so wasî. Awepamthîrî komo wekyasî mehxa resce n̂ixan komo. Oesce n̂ixan komo marha wekyasî.

6 On wara wîîkesî nohce yaw rorono komo ya hara, N̂examro ahsîpînkacoko, wîîkesî. On wara wîîkesî suu yaw rorono komo ya hara, N̂examro porohkara ehcoko, wîîkesî. Omumuru komo ehcoko meyenonhîrî komo. Oyemsîrî komo marha ehcoko roowo mapitawnonho komo, wîîkesî marha.

7 Ahnoro ehcoko oyosoken komo. N̂examro wakîhcekn̂e kir̂wanî ro me oyehtopo yenpon̂e me. Ero ke n̂examro ehcoko ahnoro.

8 Cewke so rma re naxe. Ewuhra rma tko naxe okwe. Tpanake so rma re naxe. Panahra rma tko naxe okwe. Noro yipu komo ehcoko xiya.

9 N̂esenmecowpe tak mîk hak rowon pono komo. Anarî yana komo mohcowpe. On wara kacoko yîwya so, Ahto natu apoyino komo, on yekatîmn̂e komo? Ahto natu pahxan komo yehtopo yekatîmn̂e kom hara? Ero wara ekatîmn̂enhîrî exitaw mohcowpe, yîmtapotarî yentan̂enho komo marha mohcowpe, Yaaro, ero wara rma ketken̂e, kan̂e kom ha. Ero wara kan̂e komo yentache, Ai ha, yaaro ekatîmn̂e komo mîkyam ham, kexe tak.

10 Amyamro xa matko maxe oyehtopo yekatîmn̂e me, kesî Kporin komo. Oyanton me kiice so, oyehtopo yentan̂e me awehtome so, opona enîn̂e me marha awehtome so. Noro xa Mîk Kaan ham, kan̂e me awehtome so marha ero wa kiice so. Cehsom ro xa Ow ha. On wara na mîîketu opoko, pahxa Noro yexihnaw ka anarî xakn̂e akîhtoxapu, mîîketu na. Pîra ro mak, exihra xakn̂e ero yipu. On wara na mîîketu anarimaw hara, Amn̂e Noro exihra exitaw tak anarî nai hara akîhtoxapu, mîîketu na. Pîra xa marha, exihra nasî.

11 Ow mak Ow ha Aporin komo, Ow mak ha. Anarî exihra ro mak nasî akurunpen̂e komo.

12 Oyehtopo wenpekn̂e awya so, kowyatken̂e so marha. Oyehtopo wekatîmyakn̂e marha awya so. Ow mak ero wa wîxakn̂e. Ponaro anarî yana komo yehtopo exihra xakn̂e achew so ero yimaw. Ero ke amyamro xa maxe oyehtopo yekatîmn̂e me, Noro mak Mîk Kaan ha, kan̂e me ha, kesî Kporin komo.

13 Noro Ow ha, pahxanî ro mak. Onahsîtho komo town̂e komo exihra ro mak nasî. Ahce wa na ciino riche owya onoke thakwa re anarme n̂iir̂a hara? Pîra ro xa mak, kesî Kporin komo awya so.

14 Awown̂e komo xa Mîk Kporin komo. Kir̂wanî ro Mîk Noro, ponaro Ixaw Yana komo yehtopo. On wara kesî Noro awya so, Aaxe so oyexirî ke waapa komo wen̂epesî Babiron̂a pono komo wece hara. Iitono komo war̂mapesî on̂en̂epetho komo ya ahnoro. Emahcixapunhîrî komo rma mîkyam wekyas oona. Kawtew komo mîkyam tîkanawarî komo poko cehcoyoponkaxmu kom ha. Ero wara Babiron̂a pono pen komo wiir̂as amn̂e.

15 Aporin komo Ow ha, Kir̂wanî ro, ponaro awehtopo komo. Ixaw Yana komo yakîhton̂enho Ow, akayaritomon kom ha, kesî Kporin komo.

16-17 On wara ciino n̂iir̂akn̂e Noro, esama n̂iir̂akn̂e tuuna imo rakatari rma. Karitî xa mîn tuuna imo. Ero yipu yotari rma esama n̂iir̂akn̂e. Tarara yekpon̂e Mîkî, kawaru komo yekpon̂e marha. Sowtatu komo yekpon̂e marha Mîkî, sowtatu yakronoman̂e komo marha. Iito tak xatken̂e tîrapo so. Piiri awomun me ro mak tak xatken̂e. Wehto wara xatken̂e eyihkaxpu wara. Ramha yetahsîtopo wara xatken̂e eihkaxapu wara mak okwe. Ero wara ciino rin̂enho xa Mîk Kaan.

18 On wara marha kesî Noro awya so, Pahxa awehtoponhîrî komo yîhcamnocoko. Erotho ponarora ro mak ehcoko.

19 Oroto tak an̂enîthîrî pîn komo wenpes awya so, oroto tak n̂esenpesî. Enîhra katî matu? Esama tak wînankesî axawa imo pore. Pohnîntari tak wiir̂asî tuuna yepu okre.

20 Ero ke takîhsom me oyehtopo yenîn̂e me naxe iitono komo tooto pîn komo meero, xakaw komo, apesuturusu komo marha. Tuuna wenpesî pohnîntaw rma, tuuna yepu wiir̂asî axawa imo po rma. Ero wa wiir̂asî oyanan komo wokru me, oyananî ro me onahsîtho komo wokru me ha. Ero wa wiir̂asî pohnîntaw rma. Ero ke oyehtopo yekatîmn̂e me naxe iitono komo.

21 Oyanan komo ro me onakîhtotho komo naxe kir̂wan̂he oyehtopo yekatîmn̂e me.

22 On wara tko mîxatken̂e amyamro Xako yepamtho komo, Amna cma re makronomesî, kahra rma mîxatken̂e. Opoko awehtopo komo pokai ham okwe. Ero wara mîxatken̂e amyamro Ixaw Yana komo.

23 Oper̂a yekîhra maxe owya tîmsom me, takn̂itîkaxmu. Owya tîmsom yekîhra ro mak maxe okwe, ayopono komo me oyenpotopo. Awapickara so wîxakn̂e puruma tîmtopo poko. Ayopo so awantomara so wîxakn̂e kotoporem yakn̂itopo poko. Wara rma tko tîmîhra rma maxe okwe.

24 Paranci ahsîra maxe epethîrî pona owya tîmsom me. Awokuthîrî komo katîtho tîmîhra marha maxe owya, anîmrî komo katîtho ha. Owî xa matko mahwokexe kicicme awehtoponhîrî komo ke kica. Oyanwekrî ke awya so kpoketîkes mak okwe.

25 On wara tko was apoko so, awya so oyanwetoponho tak wickes amn̂e kir̂wan̂he xa oyehtopo yenpotome. Kicicme awehtoponhîrî komo poko tak twen̂ekarî wasî eroromero. Noro rma Ow ero wa awin̂e komo.

26 Pahxa awehtoponhîrî komo ekatîmcoko owya ero ponaro oyehtome. Kicicme exihnî katî amyamro. Ero poko ka ceseseyucerî, ekatîmcoko ika owya, Kicicme exihnî moxam ham, kachome owya.

27 Pahxa kicicme xakn̂e aporin pen yihcithîrî. Oyehtopo yekatîmn̂e komo marha tak xatken̂e omtapotarî yanwekn̂e me hara okwe.

28 Ero ke Kaan mîn yenîn̂e komo wîhyapamnoyas Ow hara. Ero ke marha Xako yepamtho pen komo wiir̂asî tîwîrîmaxmu me kr̂a. Ixaw Yana pen komo wiir̂asî tîwîrîyakaxmu me. Ero wa tak n̂examro pen wiir̂asî.