Taa, oyanton yehtopo tan wekatîmyas hara awya so. Oyantonî ro Moso, on̂ecehtorî xa, encoko xe ka, wîîkesî. Oyanton me Noro wiire on̂enîrî mexan me exirî ke. Noro ropotaka oyekatî wiir̂asî. Takîhso tak Xenciu komo n̂en̂ekesî.

2 Emtarakan me nasî Noro, kar̂pe xa yîmtapotara nasî. Ahce wa na kahra marha nasî ewto roron po.

3 Waiwî wara naxe anarî komo etatukmaxapu wara. Noro yipu komo yaxikwotîkan̂e pîn me nasî oyanton. Anarî komo naxe ramha yetahsîtopo wara hara. Wehto ke etahsîn wara naxe, yîsînatawno wara mak. Noro yipu komo yeihkatîkan̂e pîn me marha nasî Noro. Takîhso xa en̂ekano rin̂e me xa nasî. Emetanmexapu komo n̂epanîyasî.

4 Ehn̂an me nasî Noro, ahwokara marha nasî takîhsom me roowo pono komo ciitîkacho poko. Noro mtapotarî ponaro tak naxe ciwya pono komo, tpanatanmetopo komo ponaro ha. Ero wara naxe.

5 On wara marha kesî Kporin komo awya so, Kaanî rma Mîk kesî. Kaapu yakîhton̂enho Ow, amtaren̂enhîrî marha. Roowo yamtaren̂enho marha Ow, ero po tatîhtaxmu komo yakpan̂enho marha Ow. Roowo pono komo yesesîtopo ciin̂e roro marha Ow. Waipîra so wiir̂asî roowo pore cetarisom komo.

6 Aporin komo Ow ha. Oyanton me kan̂ikyakn̂e so kir̂wan me awitome so. Awamorî poko kahsîyasî awecetotome so owya. On wara tak anarî yana komo kexe awenîrî ke so, Yaarono mîn ham Kaanî mtapotarî, Kakronomexe so amn̂e, kacho yîwya, kexe. Ero wa kamexpon̂e me kirmexpesî. Xenciu komo weyuru me marha kiir̂asî.

7 Ewuhnî komo yewtanîren̂e me kiir̂asî, kahrutopo yawnonho komo yahrunkan̂e me marha. Anarî komo naxe awarpanawno me xa. Noro yipu komo mekyasî katpanaka kahrutopo yawnonho rma.

8 Aporin komo Ow ha. Oyosotî xa mîn ha. Ponaro kehtopo xa mîn ham okre, kamexpora ro mak wasî tooto komo ya anarî poko. Mîk hak warai me ciixaputho komo poko ahwotacoko kir̂wan̂he exirî ke so, kahra marha wasî.

9 Pahxa rma wekatîmyakn̂e awya so awehtopo komo, Ero wa maxe amn̂e, wîîkekn̂e. Ero ke ero wara rma tak maxe omtapotachonho yaw roro xa. Pahxarono marha wekatîmyas awehtopo kom ha. Ero wara maxe amn̂e, wîîkesî ero warahra ro makî ka awexitaw so. Ero wara awehtopo komo rma wekatîmyas awya so, kesî Kporin komo awya so.

10 Ero ke on wara wîîkes hara, ewanomacoko Kporin komo n̂entarî me. Yaxan aacoko waano. Roowo mapitawno komo, awya so wîîkes hara, kir̂wan̂he Noro yehtopo poko ewanomacoko. Ero wara ewanomacoko amyamro hara tuuna imo kwaw tîtosom komo, tuuna imo kwawno komo marha. Ciwya pono kom hara, amyamro marha Noro yehtopo poko ewanomacoko, kir̂wanî ro me ehtopo poko ha.

11 Noro poko cewanomaxmu wara n̂expe axawa imo hara, iitono komo marha n̂ewanomacowpe ewto pono kom ha, Keta pono komo marha ewtoci pono kom ha. Sera pono komo marha n̂ewanomacowpe tahwore exirî ke so. N̂emtarakacowpe marha îîpî meretîn̂i rma.

12 Kporin komo poko nahwotacowpe. Kir̂wanî ro me Noro yehtopo n̂ekatîmcowpe ciwya pono komo ya.

13 Sowtatu me cesî Kporin komo karitî me xa. Ar̂mano riso men kîwcesî, kesî sowtatu wara rma. Ero yinhîrî yahya kesî waapa me tîcetaw xa tak. Tîîxatî pîn komo tak nar̂mesî.

14 On wara kesî Noro, Kporin kom ha, Tîtken̂e ka wîxakn̂e pahkî. Ahce wa na kahra ro mak wîxakn̂e. Ahri ka n̂ehcowpe kyam mak, wîîkekn̂e ha ka. Oroto tak kemtarakesî wooxam wara, cewrusom wara. Okwe, okwe, wîîkesî, kerekayakayanasî mak ha.

15 Iiponomra tak wiir̂asî îîpî komo, matîwîn komo marha. Ero po atîhtaxapu komo waihyasî tuuna mokuhtorî ke. Tuuna yepunhîrî tak wiir̂asî yarinho me. N̂ikithonhîrî marha wapainokes okwe.

16 Ewuhnî komo waar̂asî esama yaw yîn̂enîhtorî komo yaw. Esamarî ro pîn yaw so waar̂asî. Aar̂ataw so n̂examro katparesî awarpanawnonhîrî. Wow kachonho komo pexunkesî tak. Capape tak wiir̂asî esamarî komo. Ero wa n̂examro wakronomesî. Ahsîpînkara so ro mak wasî.

17 On wara tko naxe anarî komo, mîk hak warai me ciixaputho ponaro rma naxe okwe. Ero yipu ya rma kexe on wara, Amoro xa, ponaro oyehtopo ro, kexe kica. Ero wa kan̂e komo tporohsom me wiir̂asî, cehn̂axmu me marha tak wiir̂asî. Ero wara ciino wiir̂as okwe.

18-19 Omtapotarî ka entacoko amyamro panahnî komo. Oyehtopo ka encoko amyamro ewuhnî kom hara. Onoke xa nai ewuhra? Oyantonî rma ero wa nasî. Onoke xa nai panahra? Omtapotarî yekatîmn̂e me on̂en̂epetho noro xa nasî panahra okwe. Onoke xa nai ewuhra? Kir̂wanî ro ero wara nasî. Onoke xa nai ewuhnî me? Kporin komo yanton xa ero wa nasî.

20 Mer̂pora ro mak nasî an̂enîrî kom ha re. Ponarora ro makî tko maxe okwe. Tpanake rma re maxe, ahce na yentan̂e pîn me rma tko maxe okwe, kesî Kporin komo awya so.

21 Kir̂wanî ro Mîk Kporin komo. Ero ke kir̂wanî ro me enpo xe nai kpanatanmetopo, takîhso kiin̂e me enpo xe nai.

22 On wara tko kesî Noro apoko so, emyawnonkaxapu mîkyam okwe, waapa nahsîtho mak mîkyam okwe. Epatakan me so mak naxe anarî komo ewtarî yaw so. Kahrutopo yaw so naxe anarî kom hara, ehcamnoxapu wara mak okwe. Yukurunpen̂e komo exihra ro mak nas okwe, N̂examro yemyawnonho tîmcoko hara, kan̂e exihra nas okwe.

23 Onoke xa omtapotarî n̂ence? Onoke xa omtapotachonho ponaro nai amn̂e pahxaro?

24 Onoke xa Xako yepamtho komo nahsîpekn̂e aan̂e komo ya? Onoke xa Ixaw Yana komo nahsîpekn̂e cen̂epan̂em komo ya? Kporin komo pîn katî Mîk nahsîpekn̂e noro yipu komo ya? Kporin komo rma Mîk ero wa n̂irpekn̂e kicicme exirî ke so tpoko. Noro yehtopo yaw roro exihra ro mak xatken̂e okwe. Yîmtapotarî yewetîra xatken̂e okwe tpanatanmetopo kom ha.

25 Ero ke nîrwonakn̂e ro mak poko so okwe. Pona so ocorono yukmamyatawno wara xakn̂e. Cetar̂macho komo chewno me tak n̂iir̂akn̂e oko, wehto chewno wara rma oco. Wara rma yîmtapotarî yentara rma xatken̂e. N̂examro pen waihketken̂e okwe waapa komo. Wara rma yîmtapotarî ponarora rma xatken̂e okwe, Kporin komo mtapotarî ponarora. Ero wa xatken̂e okwe.