On wara marha kesî Kporin komo awya so, Ai, ciwya pono komo amyamro, awya so wîîkesî, tîtken̂e tak ehcoko oyepatai awexirî ke so. Kar̂pe tak n̂ehcowpe kar̂pera ehxapunhîrî komo. Meyehra mohcowpe. Oyakro tak nîmtapotacowpe. Ahce warai me so na ehtopo komo yîhtînotome kîwya so cesenmecerî.

2 On warai poko cesentacerî, onoke xa resce n̂ixan n̂iir̂akn̂e kayaritomo me awya so? Onoke xa kir̂wan nan̂ikyakn̂e tmaywen me? Onoke xa mîk hak rowon pono komo nar̂mape yîwya awya so? Onoke noro n̂iir̂akn̂e kayaritomo komo kayaritomon me? Kayaritomo pen komo nakihyasî ro mak noro sororope cehso ro. Tîkaciparan ke rma nakihyasî. Puruma yeputho wara kayaritomo pen komo n̂iir̂asî tîkrapan ke, ocowo npahrî wara n̂iir̂asî. Onoke xa ero warai me noro n̂iir̂akn̂e?

3 Kayaritomo komo weken̂emekyasî noro. Ero yinhîrî ces hara waipîra rma. Cesamathîrî pîn yaw cesî kayaritomo pen komo yar̂maxi.

4 Onoke xa ero wara noro n̂iir̂akn̂e awya so? Onoke ke noro nakronomekn̂e tîmtapotachonhîrî yaw roro ehtîkachome? Onoke pahxa ehretawnomaxapu komo nan̂ikyakn̂e, oroto ehretawnomaxapu komo meero, onoke Mîk ero wa xakn̂e? Ow ha Noro, Aporin kom ha. Owî rma ero wa ciino wiir̂akn̂e. Yihcirî me ehxapu Ow, okomn̂i cehsom marha Ow ha.

5 Ero wa owya ciino ritoponho n̂een̂atken̂e ciwya pono komo. Ero ke n̂eraswaxe tak opona. Roowo mapitawno komo rma tatanatken̂e opona cerahtîmrî ke so. Ohyaka tak mokyatken̂e.

6 On wara naxe n̂examro, n̂etakronomexe tîmîtwono komo yakro rma ahnoro. Kar̂pe ehcoko, kexe takno komo ya.

7 Ooru pokono ro wakpamnoyasî weewe yenporin̂e. Kuripara yetapan̂e ro wakpamnoyasî ooru memehseren̂e ro hara, aama ke etapan̂e ro ha. Kir̂wan̂he mahkorome ham okre, kesî yîwya. Ero yinhîrî tak tînakîtothîrî wesî potupoture ke emacakara ehtome.

8-9 On wara tko wîîkes awya so Ixaw Yana komo, oyanton komo reha amyamro. Xako yepamtho komo, awya so wîîkesî. Oyakrono ro yepamtho komo amyamro Abraaw yepamtho kom ha. Roowo mapitai rma kekyatken̂e so. Meyenonhîrî komo amyamro onan̂ikîtho komo, oyanton kom ha, wîîkekn̂e awya so. Awahsîpînkara so ro mak wîxakn̂e.

10 Ero ke erasîra ro mak tak ehcoko. Awakro so rma wa was ha. Ahwokara ehcoko. Kaan xa Ow, ponaro awehtopo komo. Kîkaricexe so, kakronomexe so marha. Kecehcexe so oyamorî ke kaari n̂ixan ke. Kîr̂wanî ro Ow ha. Noro yipu Ow kecehcexe so.

11 On wara tak naxe amn̂e apoko tîrwon̂emînhîrî komo, nîhyapamyaxe tak, cehn̂axmu me tak naxe okwe. Noro pîntho me tak n̂esenpexe awar̂ma xatînhîrî komo. Waihyaxe mak okwe.

12 Awein̂enhîrî pen komo yepor̂ataw na awya so enîhra rma maxe. Noro pîntho me ro mak tak naxe awakro so etar̂maxapunhîrî pen komo, exihnî wara tak naxe.

13 Aporin komo Ow, Kaan, ponaro awehtopo kom ha. Awamorî komo poko kaan̂e Ow kaari n̂ixan poko. On wara wîîkes awya so, Erasîra ehcoko. Kakronomexe so rma wa ha, wîîkes awya so.

14 Ai, Xako yepamtho komo, awya so wîîkesî, erasîra ehcoko. Kar̂watho cik mak amyamro Ixaw Yana kom ha. On wara wîîkes awya so, Owî rma kakronomexe so, wîîkesî. Ero wa wîîkes Ow Aporin komo. Awown̂enhîrî kom Ow ha. Kir̂wanî ro Ow, ponaro Ixaw Yana komo yehtopo ha.

15 Amn̂e tak puruma yîpîpîtîkacho warai me kiir̂axe so, yaxan warai me, enko xe amn̂e. Tîyokem warai me kiir̂axe so. Îîpî mko yaposokan̂e wara tak maxe. Maposokexe ro mak pin̂ipici me cehso ro.

16 Kahsî puruma yatho mar̂mexe aposokache yîpîpîthîrî pahtome ocowo ya. Anarimaw kar̂pe kesî ocowo, cetapomriso kesî. Ero wa îîpî me cehsom komo miir̂axe amyamro, ocowo narîrî wara miir̂axe. Aporin komo poko rma mahwowaxe amyamro reha. Kir̂wanî ro poko mahwowaxe, ponaro Ixaw Yana komo yehtopo poko ha.

17 Anarimaw on wara na natu cesemetanmesom komo, yupurantamnî kom ha, twokru komo xe na natu tuuna xe. Exihra ro mak na nai wokru komo okwe. Turpe ro mak na nai yun̂uru komo. Ero yimaw yîmtapotarî komo wencesî Ow, Aporin komo. N̂examro yahsîpînkara wasî. Ponaro Ixaw Yana komo yehtopo Ow ha.

18 Tuuna yepu tak wiir̂asî îh po so rma ahce na yewtî pîn po so rma. Îîpî yamrinawno yaw so marha tuuna pîtho wiir̂asî. Axawa imo tak wiir̂asî n̂ikitho me. Turpemînhîrî tak wiir̂asî tuuna pîtho me. Ero wa wiir̂asî roowo.

19 Weewe komo marha wiir̂asî axawa imo po naatî me. Setru yepu, akaxa yepu, muhta yepu, oripa yepu, ero warai wiir̂asî iina so. Ahce na yewtî mexan pîn pona wiir̂asî paaya yepu, pin̂eiru yepu, aramo yepu, ero wara wiir̂asî.

20 Ero wa wiir̂asî oyanan komo n̂enîrî me. Ero yipu yenîche yîwya so n̂eserepokexe tak, yuhnari tak n̂encexe. Kporin komo n̂iritho tan ham okre, kexe tak. Kir̂wanî ro n̂iritho on ham, ponaro Ixaw Yana komo yehtopo n̂iritho, kexe. Ero wara kexe.

21 Taa, on wara marha kes awya so Aporin komo, Ponaro awehtopo komo yehtopo tak ekatîmcoko hara, akîhtoxaputho yehtopo. Ero wa exirî ke noro ponaro tak wasî, kacoko, kesî Xako yepamtho komo kayaritomon.

22 Ponaro awehtopo komo ehcoko xiya anakîtothîrî kom ha. N̂examro tak n̂ekatîmcowpe awehtopo komo pahxarono. Ero wara maxe amn̂e, kacowpe kîwya so. Pahxan komo yehtoponho marha n̂ekatîmcowpe kîwya so ero poko keserepokachome so. Ero wara tak naxe amn̂e awepamthîri komo, kacowpe marha kn̂entarî me so.

23 Pahxaro awehtopo komo marha n̂ekatîmcowpe. Ero wara maxe amn̂e, kacowpe. Ero wa awehtopo komo yekatîmche, Taa, kaan warai rma amyamro ham, kesî tak amna yîwya so. On wara marha amna kesî yîwya so, Akronomano ika ciicoko, yîwîrîmano na miir̂atu anarimaw. Ero wa ciino riyataw na yîwya amna tak n̂eserepokesî awakro so rma.

24 On wara xa matko kes amna yîwya so, Noro pîntho mak amyamro okwe. Ero pîntho me marha nasî ahce wa so na ciino ritopo awya so. Kicicitho me ro mak naxe aponarono komo. Ero wa amna kes okwe.

25 Taa, meyeno tak wan̂ikye nohce n̂ixan ha. Nohce n̂ixa rma noro mokyasî. Oyosotî ponarono me nasî. Antomano rin̂e pen komo yar̂maxi mokyasî, kawau yapikmetawno wara kr̂a n̂examro pen n̂iir̂asî. Er̂mo napikmesî tahrem kahn̂e, ero wa noro yipu komo n̂iir̂asî.

26 Onoke xa pahxan pen komo yehtoponho yekatîmn̂e me nai? Yihcitoponho n̂ixa rono yekatîmn̂e exitaw, Yaaro kekn̂e ham, tîtkexe tak noro yipu poko. Kir̂wan mîkro, tîtkexe noro yipu poko. Exihra tko nasî pahxan pen komo yehtoponho yenpon̂e. Exihra ro mak nasî ekatîmn̂e. Oroto awehtopo yekatîmn̂e exihra nasî. Amtapotarî komo yentan̂e exihra marha nas okwe.

27 Ow xa Siaw pono komo yahwotacho yekatîmn̂e me wîxakn̂e. N̂examro xa ha awahworen̂e komo, wîîkekn̂e. On wara wîîkekn̂e Xerusaren pono komo ya, Awahwotacho komo yekatîmn̂e tak wîmyas okre, wîîkekn̂e.

28 Wepor̂akn̂e rma re ekatîmn̂e, exihra ro makî tko xakn̂e okwe. N̂examro poyino exihra ro mak xakn̂e akîhreno rin̂e komo. Ahce wa tak mat amn̂e ha? wîîkesî rma re yîwya so. Oyeyukn̂e exihra ro mak xakn̂e okwe.

29 Okwe, kakronoman̂e pînî ro mak mîkyam. Mîn hak pokono me naxe ha re, ero pîntho ro poko mak naxe okwe. Ocowo warai mak mîn yin̂irithîrî komo, ponaro ehtopo komo. Kewkukman̂e me mak nas okwe. Ero wa nasî yin̂irithîrî komo okwe.