Taa, on wara kesî Kaan, ponaro awehtopo komo, Oyanan komo ahworecoko. Yaaro tan wîîkesî, n̂examro men ahworecoko, wîîkesî.

2 Xerusaren pono komo ahworecoko. On wara kacoko yîwya so, N̂eexi tak awetar̂matoponhîrî komo. Tîhcamnoso tak nasî kicicme awehtoponhîrî komo. Kicicme awehtoponhîrî komo yepetho rma Kporin komo nîmyakn̂e awya so. Asakro rma ero yepetho nîmyakn̂e awya so. Ero wicakî awepethirî komo mahsîyatken̂e, kacoko oyanan komo ya.

3 Taa, pohnîntaw cenmaxmu nai amn̂e tooto. Noro mtapotarî tak n̂esences amn̂e. On wara kesî, Kporin komo yesamarî ka aiwacoko axawa imo pore. Pataw xa ciicoko Kaan yesamarî, ponaro kehtopo komo yesamarî.

4 Ero yimaw tak akawanînhîrî komo nasî capape ahnoro okre. Ero wa xa marha nasî ahnoro îîpînhîrî hara, matîwînînhîrî komo marha, capape marha nas okre. N̂epexunkesî tak cekumxemînhîrî. Tuturuyemînhîrî tak nasî capape okre.

5 Kir̂wanî ro me Kporin komo yehtopo tak n̂esenpesî. Ero wa Noro yehtopo tak n̂een̂axe tooto komo ahnoro ehcemaw re. Kporin komo mtapotari rma tan, ero ke ero wa men nas amn̂e, kesî. Ero wa kacho n̂esences ha.

6 Ero yinhîrî on wara kekn̂e hara tîmtapotaxmu owya, Amtapotakî tak kar̂pe, kekn̂e. Ahce wa wîîke, kekn̂e anarî hara yîwya? On wara kasko, kekn̂e, cuuputho mak amyamro tooto komo. Kir̂wan̂he rma re mesenpexe epemrutun wara mak okwe.

7 On wara nasî cuupu, yohno naawaiyasî, epemrutunthîrî marha xamanwasî. Ero wa nasî puu karî ke Kporin komo ya ero yipu pore. Taa, cuupu warai me mak naxe tooto komo ahnoro.

8 Naawaiyasî tak okwe cuupu, xamanwasî marha epemrutunthîrî okwe. Iito rma tko nasî ponaro kehtopo komo mtapotarî etowîn me ro mak, kasko, kekn̂e.

9 On wara marha kekn̂e, Ai, Siaw pono komo, kahwotacho yekatîmn̂e komo amyamro, On wara wîîkes awya so, îîpî awnucoko kawno. Ai, Xerusaren pono komo, kahwotacho yekatîmn̂e marha amyamro, on wara wîîkes awya so, amtapotacoko tak kar̂pe ro mak. Kar̂pe men kacoko, erasîra ro mak ehcoko. On wara kacoko Xuta pono komo ya, ewto pono komo ya, Moso ha Kaan, ponaro awehtopo kom ha, kacoko yîwya so.

10 Encoko xe, Kporin komo men mokyasî Kaan, karitî. Taporî ke rma tooto komo n̂iir̂asî cewetîn̂e me. Tîyanan komo yepemacho nasî yîhyaw, ahce wa na ehtoponhîrî komo yepetho ha.

11 Toh komo n̂een̂asî kahn̂eru yosom wara rma. Kahn̂eru xîkrî komo cik naar̂asî cenaw. Nosomcesî ro mak okre. Yamoro mak tarkem komo marha naar̂asî. Ero wara nasî tîyanan komo poko.

12 On wara marha wîîkes awya so, onoke xa tuuna nukuknomekn̂e tamoyeretaw mak awya so? Onoke kaapu yakwerî nukuknomekn̂e tamorî ke awya so? Onoke xa yukuknomacho ro ke roowo pupuntho nukuknomekn̂e awya so? Onoke xa îîpî komo yawsîn nukuknomekn̂e kawsîn yukuknomacho ke awya so? Onoke marha matîwîn komo nukuknomekn̂e hara ero yipu ke xa marha awya so?

13 Onoke ma re xakn̂e Kporin komo yakîhren̂e me? Onoke ma re xakn̂e Noro panatanmekn̂e me awya so?

14 Onoke yakro n̂esencekn̂e ha re Noro, Taa, ero wara ham, kachome tak yîwya? Onoke xa Noro nakîhrekn̂e ha re awya so yaaro en̂ekano ritohme yîwya? Onoke xa re Noro nîhcamhokekn̂e ha mîn hak poko awya? so? Onoke xa re yuhnari esehtînotopo n̂entamexpekn̂e Noro ya awya so?

15 On wara Kporin komo n̂een̂asî mîk hak rowon pono komo ahnoro, wahra ro mak n̂een̂asî. On wara na nai tahrem anarimaw, turpe na nai. Mapitaw rma tko na nai tuuna ciki cewn̂e mak cipi kacho ciki. Ero wara so ciki Kporin komo n̂een̂asî mîk hak rowon pono komo. Anarimaw roowo pupuntho ciki na nai kawsîn yukuknomacho yaw panahno ro mak, sororono mak. Ero wa kyam naxe mîk hak rowon pono komo Kaan ya. Ahnoro ciwya komo nanîmyasî wahrai wara rma okyo.

16 Weewe nasî Ribanu po mer̂pora ro mak. Iitono ahnoro exitaw wehto me Kaan ya tîmsom yakn̂itopo yecenarîra ro mak nas okwe. Kaan ya tîmî xe kexitaw etîmton me takn̂isom, yupumra rma nasî okno komo, Ribanu pono komo ahnoro.

17 Exihnîtho me ro mak tooto komo n̂een̂asî Kporin komo, mîk hak rowon pono komo ahnoro rma. Exihnîtho xawyaka rma naxe yîwya. Noro pîntho me ro mak n̂een̂asî.

18 Ero ke onoke thakwa re nai on wara kacho me awya so, Noro warai xa Mîkî Kaan, kacho me awya so? Ahce ma re makîhcetu, Kaan kuknon on ha, kacho awya so?

19 On wara nasî kuripara pokono ro, ponaro cehtopo n̂iir̂asî. Ero tak nîmkarinomesî ooru pokono ro hara. Ooro ke xa nîmkarinomesî. Kanawa mici warai cik marha nakîhtopesî prata pokono me hara.

20 Anarî komo tko natu emyawnomnî me ha re. Ero ke ero yipu cir̂pora thakwa naxe ponaro cehtopo komo me. Ero ke weewe mak men̂ekesî kir̂wan, atpîn. Ero tak naar̂asî weewe pokono ro yaka hara. Yîwya tak n̂ir̂pesî ponaro cehtopo me. Kir̂wanî cma re miir̂asî emacakanî ro, kesî yîwya.

21 On wara wîîkes awya so, Kaan yehtopo ponarora ma mat ke? Noro yehtopo yentara matu ke? Mehxa ro rma ero yekatîmra xatken̂e awya so ekatîmn̂e komo? Roowo yakîhtotoponho n̂ixa ro cehtopo n̂enpesî Noro. Entan̂e pîn me rma mat ke okwe?

22 Roowo yepoyino me nasî Noro yapon tamnon̂em yepoyino me. Ero po ceremaxi nasî. Wahrai ro mak kîwyam roowo pono komo reha, makaka wara cik mak taxe. Kaapu n̂ehyatkesî Noro, poono cehyatkesî ero wara. Mîîmo wara rma n̂ehyatkesî.

23 Noro pîntho me tak antomano rin̂enho komo n̂iir̂asî. Cehn̂axmu me marha en̂ekano rin̂e komo n̂iir̂as hara, roowo pono kom ha.

24 Noro yipu komo naxe naatî wara, On wara nasî naatî, roowo cheka n̂ecir̂asî, n̂epahyasî mak anarimaw naatî yatho. Ero wa ciriche so n̂imicinwasî roowo cheka. Yohno rma tko puu kesî Kporin komo iipo kar̂pe. Ero yanme rma naawaiyas hara. Ocowo rma tak naar̂as okwe cetapomrisom. Puruma yeputho naar̂asî. Ero wara rma antomano rin̂e pen komo nîhcamnoyasî Kaan, en̂ekano rin̂e pen komo marha. Puu kan̂e wara rma nasî n̂examro pen poko yîhcamnotome so.

25 Ero ke onoke warai me Ow mîhtînoyat ha re? Onok ma re mîhtînoyatu oyecenarîno me? kesî Noro, Kir̂wanî ro ha.

26 Kahsî tak encoko, kah yawno komo pen encoko. Onoke Mîk ero yakîhton̂enho awya so? Xir̂ko komo n̂en̂emhatakesî Noro tukuknomaxi. Mer̂pono pînî ro mak n̂en̂emhatakes okyo. Osotî komo poko n̂etahcasî ahnoro. Cewn̂e rma ehcamnopîra nasî xir̂ko komo. Ero wa nasî Kporin komo yanme kar̂pe ro mak exirî ke.

27 On wara tko wîîkes awya so Xako yepamtho komo ya. Ixaw Yana komo rma amyamro. Ahce kacho on wara mîîketu, Oyehtopo yenîhra ro mak nai ham okwe Kporin komo, oyepantopo ponarora ro mak nai ham okwe Noro, ponaro oyehtopo ha, mîîketu. Ahce kacho ero wa mîîket ha okwe?

28 Kaan yehtopo yîhtînopîra ma matu ke? Kaan yehtopo yentara ma matu ke? Kaan xa Mîk Kporin komo. Eroromerono Mîk ha. Roowo yakîhtotîkan̂enho Mîk. Ekar̂kanî ro Mîk, pokahnî ro ha. Yuhnari entan̂e Mîk, kyopono ro yentan̂e ha.

29 Ekar̂kaxapu komo karihton̂e Mîk, kar̂pen komo karihton̂e marha Mîk ha.

30 Kar̂pamxan komo meero n̂ekar̂kexe, n̂ekar̂kexe ro mak okwe.

31 On wara tko naxe Kporin komo pona entîkan̂e komo, pahkî entîkan̂e komo, n̂ekaricexe hara. Tapokem wara ro mak nawomyaxe yaimo wara. Kar̂pe ro mak cexe ekar̂kan me. Yamoro n̂he marha cexe ekar̂kan me ro mak okre. Ero wara naxe Noro pona entîkan̂e komo.