Taa, ero yinhîrî takî tî Esekias ya tîmsom tak narpekn̂e Babiron̂a pono komo kayaritomon. Merotake Baratan tî xakn̂e noro yosotî. Baratan pen mumutho tî mîk xakn̂e. Karita marha narpekn̂e yîhyaka. Esekias yamototoponho tî n̂encekn̂e Merotake, ekaritotoponhîrî marha. Ero ke ero yipu narpekn̂e yîhyaka.

2 Tawake tî xakn̂e Esekias Merotake maywen komo poko. Ero ke cemyawno n̂enpekn̂e yîwya so cepethîkem yîmtotopo yawno ha. Ero yaw tî xakn̂e prata ciixapu komo, ooru ciixapu komo, katî cepethîkem, sowtatu kurun mer̂pono pîn, Ahnoro tî n̂enpetîkekn̂e yîwya so cemyawno pen cepethîkem ha. Cemyawno yeyamra ro makî tî xakn̂e tîmîn yawno, n̂enpetîkekn̂e ro mak. Ahnoro makî tî n̂enpetîkekn̂e yîwya so miya rorono tîrowon poko hakno.

3 Ero yinhîrî tak Esekias yaka cekn̂e Isaias, kweronoman̂e ha. On wara kekn̂e noro, Ai, Apa, on wara wîîkes awya, Ahce wa ketken̂e n̂examro awya? Ahn̂i xa mohxapu mîkyam xatken̂e? kekn̂e yîwya. On wara n̂eyukyakn̂e Esekias, Meyeno komo tî mîkyam Babiron̂a pono kom ha, kekn̂e yîwya.

4 Ahce n̂een̂atken̂e amîn yawno komo? kekn̂e hara Isaias yîwya. On wara Esekias n̂eyukyakn̂e, Ahnoro n̂een̂atken̂e omîn yawno komo. Oyemyawno wenpetîkekn̂e yîwya so cepethîkem komo, kekn̂e yîwya.

5-6 Ero ke on wara kekn̂e Isaias yîwya, Taa, Kporin komo mtapotarî ka wentamexpes awya, pahxaro tak amîn yawno pen tak nasî taatîkaxî iina Babiron̂a pona. Ahnoro amîn yawno komo naatîkexe, aporin pen komo yemyawnonho marha pahxanînhîrî rma ahsîxapu. Ahce na tînomra ro mak naxe tan, nîîke tî Kporin komo awya.

7 Awepamthîrî komo poyino marha naar̂axe iina kîrkomo. Ewnuku me tak naxe Babiron̂a pono komo kayaritomon mîn yaw, kekn̂e yîwya. Ero wa kekn̂e Isaias Esekias ya.

8 Ero wara entache on wara kekn̂e Esekias Isaias ya hara, Taa, kir̂wan̂he wencesî Kporin komo mtapotarî, mekatmo owya ero, kekn̂e. On wara yîhtînorî ke ero wa n̂eyukyakn̂e, Waapa mokuhra ka nai ham waipîra ka oyexitaw, Kaanî mtapotari rma ka n̂encexe omaywen komo, kekn̂e tî. Ero wa kekn̂e Esekias.