Ero yinhîrî namotoyakn̂e takî tî Esekias okwe. Waiporo takî tî xakn̂e okwe. Ero ke yîhyaka tî cekn̂e Isaias Amos. Kweronoman̂e tî mîk xakn̂e Isaias. On wara tî kekn̂e yîwya, Ai, Esekias, on wara kesî Kporin komo awya, Anarî komo tak antomakî awemyawnonhîrî poko. Mîwaiyasî tak amn̂e. Waipîn me exihra thakwa mas okwe, kekn̂e Isaias yîwya.

2 Ero wa kacho entache mîîmo wacan wece takî tî n̂esewkor̂mekn̂e Esekias. Kporin komo yakro tî nîmtapowakn̂e.

3 On wara tî kekn̂e yîwya, Apa kah yawno, oyehtoponho ponaro cma re masî. Awewetîn̂e me roro wîxakn̂e etowîn me ro mak. Kir̂wan̂he roro wîxakn̂e kir̂wan̂he oyentome awya, kekn̂e tî. Nîwracekn̂e ro makî tî Esekias pen.

4-5 Ero ke Isaias yakro tak nîmtapowakn̂e xa hara Kporin komo. On wara kekn̂e yîwya, Ai, Isaias, Esekias yaka etoko xa hara. On wara kasko yîwya, On wara nîîke Kporin komo awya, ponaro xakn̂e aporin pen Tapi Noro kes awya, Amtapotarî wenta, awewyokuthîrî marha wenwo. Ero ke pahkî n̂he tak wukuknomesî waipîra awehtopo. 15 cimn̂ipu ke wîhremesî waipîra awehtopo.

6 Kukurunpesî rma, amaywen komo marha wukurunpesî on ewto pono komo. On ewto pono komo kurun me wasî. Asiriu komo ya ar̂mapora wasî.

7-8 Awehcemacho kuknon marha tî n̂enpe Kporin komo awya, Tîmtapotachonhîrî yaw roro rma akarices hara, kacho kuknon ha. Mînto nasî kaamo kuknomacho Akas pen nakîhtotho. Ero yekantopo yekatî nasî kmackape xa oroto kokon̂i exirî ke. Ero tko wîramanîyas hara pahxaxarono wece hara. 10 kraw wicakî wîramanîyas hara. Ero wara wiir̂asî yaaro xa omtapotachonho kuknon me, kes awya, kekn̂e tî. Ero wa tî kekn̂e Isaias Esekias ya. Ero ke kaamo kuknon yekantopo yekatî n̂etîramekn̂e yaw xa marha hara, 10 kraw wicakî n̂etîramekn̂e okyo. Ero wa tî xakn̂e.

9-10 Taa, tîmtapotarî takî tî mewrekn̂e Esekias amotoxapunhîrî, kar̂pe cexiche hara. On wara tî mewrekn̂e, On wara ka wîîkai okwe, poritomo mera rma ka oyexitaw ewtarî imo potaka kîwce ham okwe. Tan roowo po oyehtopo yirihtîkara rma wai ham okwe. N̂ehkotoi tak okwe cimn̂ipu yakwenho, waipîra oyehtopo yakwenho.

11 On wara marha wîîkekn̂e, Tan roowo po Kporin komo yenîhra thakwa was okwe, Xewpa yenîhra was okwe owaiyataw. Waipîn komo yeken po oyexitaw Noro yenîhra. Tooto yenîhra marha was okwe roowo pono komo chewra oyexirî ke thakwa.

12 Waipîra oyehtopo tak n̂enat okwe. Anarimaw kahn̂eru yenîn̂e mîn naar̂asî ocowo ero wara xa marha waipîra oyehtopo nasî taaso okwe. Poono mapirî nawocesî kahn̂enhîrî kahtîkache, kahtopo pokononho nawocesî, ero wa xa marha kar̂pe oyehtopo nîhkocesî Kporin komo. Oroto rma oyehtopo nîhkoces okwe.

13 Pahxaxa na okarice hara, wîîkekn̂e ha ka. Cenmakaxi ro ero wara wîîkekn̂e. Pîra, oyocho pen naxikwotîkai reaw ya keskacho wara rma oko. Kokmamra exitaw rma oyehtopo mîhkoces okwe.

14 Cor̂or̂wa nîyohyatatanasî, porin marha tarin̂em hara, ero wa kîyohyatatanakn̂e okwe. Kemkutunakn̂e potkuku wara. Kewxîrîyakn̂e mak okwe kahsî roro enîrî ke owya okwe. Ahwora ro mak was Apa okwe. Owî cma re makronomesî, wîîkekn̂e Kaan ya.

15 Ahce wa na wîîke hara yîwya? Kîkarices hara, nîîka owya. Ero wara rma tak oriw ham okre. Ero ke twerî tak kenmayasî miya roro owaitopo pona roro. Ahwora ro mak oyehtoponho ponaro wasî miya roro.

16 Apa, ero wara amna karihtorî ke mak awya amna n̂enmayasî roro tan roowo po. Waipîn me rma ka nas amna. Oyekatî yenpakacho me marha nasî ero wara okaritotopo. Ow mîkarito hara, waipîn me tak ow miir̂î haram okre.

17 Oyakir̂wamacho me rma xakn̂e ham oyahwokachonho. Wara rma ooxe awexirî ke oyen̂epera mîxakn̂e ewtarî imo yaka. Amkai tak kicicme oyehtoponho kr̂a mar̂mai ahnoro.

18 Ewtarî imo yaw amna exitaw kir̂wan̂he awehtopo yekatîmra thakwa nas amna. Amna waipuche apoko ewanomara marha thakwa nas amna okwe. On wara thakwa kexe ewtarî imo yaka toxapu komo, Kakronomara tak nai ham okwe Kporin komo. Kakronomexe so, kan̂enho kwakrera rma thakwa nai ham tan kexirî ke so, kexe okwe.

19 Waipîn komo, waipîn komo xa yo nîmtapowaxe kir̂wan̂he awehtopo poko. Enko xe, oroto kir̂wan̂he awehtopo wekatîmyasî. Ero rma n̂ekatîmyaxe yîîm komo tîmxîkrî komo ya. Tîmtapotachonhîrî yaw roro rma wa kakronomexe so Kporin komo, kexe yîwya so.

20 Kporin komo tak okarito, twaihsomînhîrî rma. Ero ke amna n̂ewanomesî enmar̂atîxera miya roro amna waihtopo pona roro. Kporin komo mîn yaw amna n̂ewanomesî. Raatî yakro amna n̂ewanomesî tawyockem yakro, kekn̂e tî. Ero wa tî kekn̂e Esekias.

21 On wara tî kekn̂e Isaias noro yehci poko, Piiku yeperîrî ehcoko amnonoxapu. Ero tak cirko nonku pona. Ero wara ciriche kar̂pe tak nas hara Esekias, kekn̂e tî.

22 On wara tî ka kekn̂e Esekias hara, Ahce n̂enpe Kporin komo owya, yîmîn yaka kîwce hara mî, kachome owya? kekn̂e tî. Ero wa tî kekn̂e Esekias.