Taa, on wara tî xakn̂e Esekias Habsake mtapotachonho yentache, tpononthîrî takî tî nahxaikekn̂e. Kumixitho tî namruyakn̂e. Kporin komo mîn yaka tî cekn̂e.

2 Ero yinhîrî tmaywen komo tî n̂en̂epekn̂e Isaias Amos yaka hara. Kweronoman̂e tî mîk xakn̂e Isaias. Eriakin tî n̂en̂epekn̂e, kayaritomo mîn yenîn̂e, Sebna marha, karita mewren̂e ro mîkî. Tîmsom pokono komo marha tî n̂en̂epekn̂e poritomo me cehsom komo. Noro yipu komo tî n̂en̂epekn̂e Isaias yaka. Kumixitho yaw tî cetken̂e yîhyaka.

3 On wara tî ketken̂e Isaias ya, Ai apa, on wara tî nîîke Esekias, Kemetanmetopo me n̂enmapu ham okwe oroto, keitopo me, Kporin komo yîwîrîyakacho me marha. Ero warai me n̂enmapu ham okwe oroto. Wooxam wara xa taxe tarkem wara. Takîhso nai rikomo anarimaw, ewrura rma tko nai kar̂pera yîson exirî ke okwe. Ero wara rma taxe kîwyam oroto.

4 Habsake tî n̂en̂epekn̂e Asiriu komo kayaritomon Kaan yîwîrîyakachome, waipînî ro yîwîrîyakachome. Yîmtapotachonhîrî rma na n̂enta Kporin komo, ponaro awehtopo. Ero wa yîmtapotatopo yanme na Asiriu komo kayaritomon panare. Ero ke Kporin komo yakro men amtapotak amoro kakronomacho komo poko, etîmtoxapu komo yakronomacho poko ha, ketken̂e tî yîwya, Isaias ya.

5 Ero wa kaxi tî cetken̂e Esekias maywen komo, Isaias yaka cetken̂e.

6 Yîmtapotarî komo yentache on wara tî kekn̂e noro hara yîwya so, Oyakno komo, on wara kacoko akayaritomon komo ya, On wara kesî Kporin komo awya, Owîrîyakacho me rma re nîmtapotacow Asiriu komo kayaritomon maywen komo. Erasîra rma tko esko yîmtapotachonhîrî komo pona.

7 Anarî tko wiir̂asî yîropotaka ekat ha. Ero yinhîrî waapa yekaci tak n̂ences hara. Ero ke ceken pona tak n̂etîrames hara. Iito tak noro pen waihyasî kacipara imo ke ceken po rma, kes awya. Ero wara kesî Kporin komo awya, kacoko akayaritomon komo ya, kekn̂e Isaias yîwya so. Ero wara tî kekn̂e yîwya so.

8 Ero yinhîrî tî cekn̂e hara Habsake Asiriu komo kayaritomon yaka. Noro yekaci tî n̂encekn̂e, Ribna pona tak toi hara kayaritomo. Iitono komo yakro makîrha tî n̂etar̂me hara, kacho tî n̂encekn̂e. Ero ke iina tî cekn̂e Habsake noro yenso.

9 Ero yinhîrî Eciopia pono komo kayaritomon yekaci takî tî n̂encekn̂e hara, Ciraka tî osotî. Noro men mokyasî awaparî me, kacho tî n̂encekn̂e kopi. Ero ke tîmtapotarî yentamexpon̂e komo tî n̂en̂epekn̂e xa hara Esekias yaka.

10 On wara tî kekn̂e entamexpon̂e komo ya, On wara kacoko Esekias ya, Xuta pono komo kayaritomon ya, Tohnaw mak nîîke Kaan, ponaro awehtopo, Xerusaren pono komo yar̂mapora ro mak wasî Asiriu komo kayaritomon ya, nîîke tohnaw ro mak. Yîmtapotarî entara ro mak esko kica.

11 Enko ka, miyan pono komo rma nar̂metîketken̂e Asiriu komo kayaritomon komo. Awar̂mara so ma re nai amyamro pen hara?

12 Oporin pen komo nar̂metken̂e yaake ewto pono komo, Kosan pononho pen komo, Aran pononho pen komo marha, Hesepe pononho pen komo, Eten pononho pen komo, Terasa po xatken̂e n̂examro pen. N̂examro pen nar̂metîkekn̂e oporin pen komo. N̂examro pen yukurunpera thakwa xatken̂e ponaro ehtopo kom ha.

13 Ahto tak natu Amace pononho komo kayaritomon pen, Ahpace pononho komo kayaritomon pen, Sepahpain pononho komo kayaritomon pen, Ena pononho komo kayaritomon pen, Ipa pononho komo kayaritomon pen? Exihra tak naxe okwe, kacho tî narpekn̂e Esekias yaka mewrexapu. Ero wara kacho tî narpekn̂e.

14 Ero yinhîrî Asiriu komo kayaritomon karitan tî nahsîyakn̂e Esekias, noro maywen komo n̂ekîtho. N̂een̂akn̂e takî tî. Ero yinhîrî Kporin komo mîn yaka takî tî cekn̂e xa hara. Iito takî tî karita namomhokekn̂e Kporin komo yamtakpon mîtwo.

15-16 Ero yinhîrî Kporin komo yakro tî nîmtapowakn̂e. On wara tî kekn̂e yîwya, Apa kah yawno, amna yantoman̂e ro Amoro, ponaro Ixaw Yana komo yehtopo xa Amoro. Kerubin yotawno Amoro. Kaanî ro xa Amoro. Kayaritomo Amoro Apa, mîk hak rowon pono komo kayaritomon, roowo poko hakno komo kayaritomon. Kaapu yakîhton̂enho Amoro, roowo yakîhton̂enho marha.

17 Senakeribe mtapotachonho cma re mencetîkes Apa, noro karitan marha cma re men̂tîkesî. On yîn̂ekpothîrî. Kaan yîwîrîyakacho on noro karitan, waipînî ro yîwîrîhyakacho kica.

18 Yaaro rma re anarmerpan yana komo nar̂metken̂e Asiriu komo kayaritomon komo. Yîrowonthîrî komo marha nîwîrîmetken̂e okwe.

19 Ponaro iitono pen komo yehtoponho komo kr̂a nakn̂iyatken̂e. Kaan pînî ro mak mîkyam xatken̂e okwe, tooto nakîhtotho mak mîkyam xatken̂e, weewetho enporixapu, tooputho enporixapu anarimaw. Ero ke kr̂a nakn̂iyatken̂e.

20 Ero ke on wara xa wîîkes awya Apa. Kaan xa Amoro. Amna cma re mukurunpesî, yîwya amna yar̂mapora. Ero wa amna yukurunpeko Tporin komo me xa tak ahtînotome mîk hak rowon pono komo ya, roowo poko hakno komo ya rma. Noro mak nai ham Kporin komo me, kan̂e me tak ehtome so. Ero wa ehtome so amna cma re mukurunpesî Apa, kekn̂e tî. Ero wa tî kekn̂e Esekias Kporin komo ya.

21 Ero yinhîrî tîmtapotarî takî tî n̂entamexpekn̂e Isaias Esekias ya, on wara kacho ha, On wara kesî Kporin komo awya, ponaro Ixaw Yana komo yehtopo, Oyakro mîmtapota akurunpetopo komo poko, Senakeribe ya ar̂mapora awehtopo poko ha. Ero wa amtapotarî wenta, kes awya.

22 Ero ke on wara takî tî nîîke Kporin komo Noro poko, Asiriu komo kayaritomon ya xa kesî, On wara nasî Siaw yemsîrî, emasî warai, apoko, awîrîyakesî. Apoko mak n̂ewresî. Awemaciyataw n̂epanamesî mak Xerusaren yemsîrî awece, awîrîyakacho me n̂epanamesî.

23 Onoke xa mîwîrîyake? Onok poko xa mîmtapowa kar̂pe kica? Onoke yopono wara xa mesen̂a ha ke? Ow xa mîwîrîyakesî Kîr̂wanî ro, ponaro Ixaw Yana komo yehtopo ha.

24 Amaywen komo ke Aporin komo mîwîrîyakesî kica. On wara mîîkesî, Mer̂pora ro mak exirî ke otararan îîpî komo wawnukye meretkoso. Ribanu rowon wokpan yaka roro kîwtoi. Ero pono xa wawnukye. Kaw rma re nasî setru iitono. Kir̂wan̂he nasî siprexte yepu iitono, ceperke. Ero yipu rma tko wamaye. Ribanu mapitaka roro kîwtoi. Iitono wamaye comota, kir̂wanînhîrî mîîkesî.

25 Otunarî wahtoi anarî yana komo yeken po. Iitono tak weere. Ohtarî ke rma aporî komo wuturpamnoi waapa wahkotoponhîrî ha, mîîkesî kica. Ero wa mîîkesî kica.

26 Pahxa rma entara mîxakn̂e ham oyehtoponho. Awehtopo wukuknomekn̂e Ow pahxa rma. Oroto tak owya yîhtînotoponho yaw roro kiir̂asî. Owî rma ewto komo yakuhr̂apon̂e me kiir̂akn̂e twacayemînhîrî rma. Yukpurukpuruntho me ciin̂e me kiir̂akn̂e Owî ha.

27 Ero ke ewto pononho pen komo xatken̂e kar̂pera. Ero ke nahwoketken̂e, n̂ehn̂etken̂e marha okwe. Cuupu wara mak xatken̂e woskara pono wara. Peen wara xatken̂e taakem wara. Cuupu wara mak xatken̂e mîîmo poci me ciixapu wara, wahra exitaw rma naawaiyasî. Ero warai me xatken̂e ewto pononho pen komo anar̂mathîrî pen kom ha.

28 Awekenî rma tko wa ween̂as Ow. Ahna na awtotopo marha ween̂asî, amohtopo hara ween̂asî. Opoko arwonîmtopo marha wencesî.

29 Wara ro mak mîmtapowasî opoko rîîwo me ro mak. Ero wa amtapotarî wencesî. Ero ke okiwin wiir̂asî awewnarî yaka. Kawaru yewkor̂macho warai marha wiir̂asî amtaka. Ero yipu ke tak kewyaknamesî. Awesamathîrî yaw xa marha ken̂epes hara, kesî Kporin komo awya, kacho n̂entamexpekn̂e Isaias Esekias ya hara.

30 Ero yinhîrî on wara tî kekn̂e hara Isaias Esekias ya centamexposom, Taa, on warai wenpes awya Esekias, awakro so oyehtopo kuknon me, on cimn̂ipu po tanme ro atîhtaxapu yeperîrî mahyaxe amyamro. Ponan po tak ero yipu xa marha mahyaxe tanme ro atîhtaxapu yeperîrî. Mîk ha mehxan po cimn̂ipu po tak anatîrî komo tak ciicoko. Ero yeperîrî marha enmecoko. Uupa yepu ciicoko. Ero yeperîrî marha ahcoko hara.

31 Asakî mak tak amyamro Xerusaren pono komo, etîmtoxapu amyamro. Wara rma yuhnaka cimicintaxmu wara tak maxe hara amn̂e. Cepetaxmu wara marha maxe hara.

32 Xerusaren poi tak cexe amn̂e etîmtoxapu komo. Waipîra ehxapu komo cexe Siaw Yîpîn poi. Ero wa Kporin komo awir̂axe so, kantoman̂e ro ha. Aaxe so ro makî cexirî ke ero wa awir̂axe so, kes awya Kporin komo.

33 Taa, on wara kesî Kporin komo Asiriu komo kayaritomon poko xa hara, On ewto pona epatakara ro mak nasî. Waiwî marha ar̂mara nasî on wece. On panaka mokuhra ro mak nasî cecen̂an ke cemyarke. Roowo yahtora marha nasî on mamhokono cecen̂an komo me so.

34 Esama yaw mokyakn̂e, ero yaw xa marha n̂etîrames hara. On ewto pona epatakara nasî, kesî Kporin komo awya.

35 On ewto wukurunpesî yixkara ro mak ehtome on pono mîîmo komo, waaca macakara marha ehtome so. Oyewton me exirî ke wukurunpesî, Tapi yewtontho me exirî ke marha. Oyanton me xakn̂e noro, ero ke noro yewtontho wukurunpesî, kes awya, kekn̂e tî. Ero wa kacho tî n̂entamexpekn̂e Isaias Esekias ya.

36 Ero yinhîrî takî kosope takî tî Kporin komo yancun cekn̂e Asiriu komo sowtatun komo chere. Asiriu pen komo tî waihkekn̂e mer̂pono pînî ro mak, 185.000. Enmapuche tak waipîn komo cik pakache so okoputhîrî pen makî tî n̂een̂atken̂e ha re.

37 Ero ke ceken pona takî tî n̂etîramekn̂e hara Senakeribe, Asiriu komo kayaritomon. Iito mak takî tî xakn̂e N̂in̂epe po cekenke.

38 Ero yinhîrî on wara takî tî xakn̂e noro, Senakeribe, ponaro cehtopo mîn yaka tî cekn̂e noro poko ahwotaxi. N̂isiroke tî xakn̂e ponaro ehtopo yosotî. Iito exitaw yumumuru komo takî tî mokyatken̂e asakî. Atîramereke tî xakn̂e anarî yosotî, Sarese tî xakn̂e anarî yosot hara. Tîîmînhîrî pen tî paraxketken̂e kacipara imo ke. Noro pen waihkache n̂emahciyatken̂e miya Araraci pona hara roowo pona. Ero yinhîrî anarî yumumuthîrî takî tî xakn̂e kayaritomo me noro pen yemtaka hara, Esa-Aton tî xakn̂e noro yosotî. Ero wa tî xakn̂e.