Taa, on wara tak xatken̂e Xuta pono komo, Asiriu komo kayaritomon tak mokyakn̂e waparî komo me okwe, Senakeribe ha. Xuta pono komo yewton nahsîyakn̂e ahnoro okwe, twacayem komo rma. 14 cimn̂ipu xakn̂e kayaritomo me Esekias yehtoponho, ero yimaw mokyakn̂e okwe.

2 Ero yinhîrî Habsake takî tî n̂en̂epekn̂e Senakeribe Xerusaren pona. Esekias yaka tî n̂en̂epekn̂e. Sowtatu komo marha tî n̂en̂epekn̂e mer̂pono pîn Habsake yakro. Rakis pononho tî mokyatken̂e. Mokuche so tarara yesamarî yaw takî tî n̂ecececekn̂e, poono korokan̂e mararîn yesamarî yaw ha. Iito xakn̂e tuuna yîhtotopo, n̂ikitho kwawnonho yîhtotopo. Îh pono mîn n̂ikitho. Ero kwawnonho mohtopo mîtwo n̂ecececetken̂e Habsake komo.

3 Ero ke noro mtapotarî yentaxi takî cekn̂e Eriakin, Iwkias mumuru, Sebna marha, karita mewren̂e ro, Xoa marha, Asape mumuru. Kayaritomo yehtoponho mewren̂e ro mîk xakn̂e Asape. Ero wicakî cetken̂e Habsake mtapotarî yentaxi.

4 Ero yinhîrî nîmtapowakn̂e takî tî Habsake komo n̂examro yakro. On wara tî kekn̂e yîwya so, Ai, Xuta yepamtho komo, On wara kacoko Esekiasî ya, On wara kesî kayaritomo, anarî komo yopono ro, awya, Onoke pona meen̂a ha re awya?

5 On wara tî mîîke ha re, Takîhsom amna waapa yen̂epetopo poko, karitî komo marha amna, mîîke ha tî re. Tohnaw makî tko ero wara mîîkesî kica. Onoke pona meen̂a ha re awya? Noro pona enîrî ke awya oyanwekn̂e me masî kica.

6 On wara na mai, Exitu pono komo pona na meen̂a. Tuuwa warai makî tko mîkyam Exitu pono komo, etatukmaxapu warai. Kamoyin wara n̂examro yîhtînoyataw kîwya so kamoparaxkexe so mak oko. Ero wa nasî Paraw, Exitu pono komo kayaritomon, tpona enîn̂e komo poko.

7 Anarimaw on wara na mîîketu owya, Kporin komo pona xa amna n̂een̂asî ponaro cehtopo pona, mîîket ha na. Okyo, wîîkesî, Noro poko awahwotachonhîrî komo tî n̂ixkekn̂e Esekias. Îh pononho tî n̂ixkekn̂e. Noro ya tîmsom yakn̂itoponho marha tî n̂ixkekn̂e. On wara tî kekn̂e noro Xuta yepamtho komo ya, Xerusaren pono komo ya ha, On mak nasî Kporin komo ya tîmsom yakn̂itopo. On mîtkoso mak ahwotatamcoko Noro poko, kekn̂e tî awya so kopi.

8 Ero ke on wara wîîkes awya so, Amtapotarî komo tak entamexpocoko oporin ya Asiriu komo kayaritomon ya ha, Awewehcasî tak amna, kacoko yîwya, yaaro kacoko. Ero wa kache 2.000 kawaru wekpesî oona awan̂e komo. Ero wicakî yakenon xawyaka makî katî matu yîmkaw so tîtosom komo?

9 Ahce wa thakwa re oporin sowtatun yantoman̂e men̂epet okyo. Nasî anarî komo noro pîntho n̂he sowtatu yantoman̂e komo, asak makno yantoman̂e kom ha. Noro yipu rma en̂epera thakwa maxe. Exitu pono komo pona mak meen̂atu kopi tarara yekpon̂e me, sowtatu komo yekpon̂e me marha, kawaru mkaw tîtosom komo marha.

10 Kporin komo yanmera katî kmokye oona aweken komo pona awar̂matîkaxi so awya so? Noro xa matko kekn̂e owya, Iitono komo yar̂maxi etoko, kekn̂e owya, kekn̂e tî. Ero wa tî kekn̂e Habsake yîwya so kica.

11 Ero yinhîrî on wara tî ketken̂e Eriakin komo, Sebna komo, Xoa kom ha, Ai, Siriu komo mtapotarî rma amna n̂encesi. Ero yaro cma re mîmtapowasî amna yakro. Xutaiku yaro cma re yîmtapotara masî. Amna poyino n̂entarî mera cma re mîmtapowasî waaca meretwono komo n̂entarî mera ha, ketken̂e tî yîwya.

12 On wara tko tî n̂eyukyakn̂e Habsake, Onoke yaka oyen̂epekn̂e oporin on wara omtapotachome? Awakro omtapotachome makî katî oyen̂epekn̂e, waaca meretwono komo n̂entarî mera ha? N̂examro n̂entarî me rma omtapotachome oyen̂epekn̂e. N̂examro rma tak nahyaxe twetîthîrî amn̂e, tuxkuthîrî marha n̂eer̂axe. Awakro so rma ero yipu poko naxe.

13 Ero yinhîrî tak nîmtapowakn̂e xa hara Habsake kar̂pe xa tak. Xutaiku yaro rma ti nîmtapowakn̂e. On wara tî kekn̂e, Ai, Xerusaren pono komo, kayaritomo mtapotarî entacoko ka kyopono ro mtapotarî ha. Asiriu komo kayaritomon me nasî noro mtapotarî entacoko.

14 On wara kesî noro, tohnaw men nîmtapowasî Esekias awakro so. Akurunpera so mexe nasî noro okwe.

15 Tohnaw awahworexe so Aporin komo pona entopo poko. Kporin komo rma kukurunpexe so, nîîke tî awya so. On ahsîra ro mak nasî Asiriu komo kayaritomon kewton komo, nîîke marha tî awya so.

16 Kee ro kyam mak noro kica. Esekiasî mtapotarî ponarora ro mak ehcoko. On wara tko kesî Asiriu komo kayaritomon, Opurantan tîmcoko owya otawakeretopo. Ohyaka marha amohcoko. Awewetîn̂e me nas amna, kacoko owya. Ero yinhîrî iito rma ka ehcoko awewton komo po rma. Anatîrî komo yeperîrî rma ka ahcoko uupa yeperîrî, piiku yeperîrî marha. Atunarî yen yawnonho marha eecoko tuuna.

17 Amn̂e tak kmokyas awece so anarî pona awatome so. Kir̂wan pona kaar̂axe so arowonthîrî komo warai pona rma. Puruma yewtî mîn ha, uupa yewtî marha. Turke so maxe iito okre, twokye so marha okre.

18 Yaarono wara entara men ehcoko Esekiasî mtapotarî, Kporin komo xa kukurunpexe so, ketaw awya so. Yîmtapotarî ponarora ro mak ehcoko. Ahce wa xatken̂e ponaro anarî yana komo yehtopo? Cewetîn̂enhîrî pen komo ma re nukurunpetken̂e, Asiriu komo kayaritomon ya ar̂mapora xakn̂e awya so?

19 Ahto nai ha re awya so ponaro Amace pono komo yehtoponho, ponaro Ahpace pono komo yehtoponho marha? Ahto nat ha re ponaro Sepahpain pono komo yehtoponho kom hara? Ahce wa xatken̂e ponaro Samaria pono komo yehtoponho hara, cewetîn̂e komo ma re nukurunpetken̂e owya etar̂mapora ehtome so awya so?

20 Yaake ro ar̂mano wiir̂akn̂e anarmerpan yana pen komo. Cewetîn̂e pen komo yukurunpera ro mak xatken̂e ponaro ehtopo komo okwe. Ero ke ahce wa thakwa re Xerusaren pono komo nukurunpe Aporin kom hara awya so? Owya ma re awar̂mapora nai awya so? kekn̂e tî yîwya so. Ero wa tî kekn̂e Habsake Xerusaren pono komo ya.

21 Ero wa kacho yentache nîtîtmamyatken̂e makî tî entan̂enhîrî komo, eikura ro makî tî xatken̂e. Ero wara rma tî kekn̂e kayaritomo yîwya so, Eikura ro mak men ehcoko, kekn̂e tî.

22 Ero yinhîrî cekn̂e hara Eriakin, Iwkias mumuru, kayaritomo mîn yenîn̂e ha, Sebna marha cekn̂e kayaritomo karitan mewren̂e ro, Xoa marha, kayaritomo yehtoponho mewren̂e ro. Esekias yaka tî cetken̂e hara. Tpononthîrî komo tî nahxaiketken̂e. Yîwya tî n̂ekatîmyatken̂e Habsake mtapotachonho. Ero wara tî n̂ekatîmyatken̂e.