1-2 Taa, ero yimaw tak tawakem wara nasî pohnînhîrî roowo. Tahwotaxmu wara tak nasî axawa imo. Iitono tak n̂epemrutunwasî ro mak naatî, hosa wara rma n̂epemrutunwasî okre. Mer̂pora ro mak n̂epemrutunwasî. Tahwotatîkaxmu wara nasî, tahwore naxe iitono komo, n̂ewanomexe marha. Kir̂wanî ro me iitono n̂iir̂asî Kporin komo, Ribanu wara n̂iir̂as okre. Cenporem me n̂iir̂asî Kahmeru wara, Saron wara marha. Kir̂wanî ro me Kporin komo yehtopo tak n̂een̂axe iitono komo, takîhsom me Kaan yehtopo, ponaro kehtopo komo yehtopo ha.

3-4 Ero ke amokar̂pen komo karihtocoko. Osokmukar̂pen komo ecehtocoko. On wara kacoko cerahsom komo ya, Kar̂pe ehcoko, erasîra. Mokyasî rma wa Kaan, ponaro awehtopo komo. Kepanîn̂e me mokyasî. Kaan ya kepantopo ke rma wa awepanîyaxe so, akurunpexe so marha, kacoko yîwya so.

5 Ero yimaw tak ewuhnînhîrî komo tak n̂eewaxe okre. Panahnînhîrî komo panawaxe hara okre.

6 Ero yimaw marha yîhrepunînhîrî komo tak nahronaxe kooso wara okre. Yîmtapotanînhîrî komo marha tak n̂ewanomexe okre. Tuuna tak n̂epatakesî axawa imo po rma. Axawa imo pore tak nîhcesî tuuna yepu komo okre.

7 Ero yimaw n̂ikitho me tak nasî axawa imo ocorononhîrî. Tuuna pîtho me marha nasî turpemînhîrî roowo. Xakaw yekenho tak nasî cuupu yewtî me. Tuuwa warai yewtî me marha nasî, wanturu warai yewtî me marha.

8 Iito tak nasî tarara yesamarî, kîhtarî po ketarîtopo marha. Akir̂wamaxpu Komo Yesamarî Ro, kacho me tak nasî ero yosotî. Ero yaw tohra ro mak naxe tusmuyem komo, ero warai pîn komo mak cexe ero yaw. Ero yaw tîcetaw so tacihra ro mak naxe camkîno komo rma.

9 Iito exihra ro mak nasî reaw. Ero yaw tohra ro mak nasî onok na, keskan̂e kom ha. Noro yipu komo eseporîra ro mak nasî ero yaw. Kporin komo nahsîtho komo mak reha cexe ero yaw, epethîr pona yînahsîthîrî kom ha.

10 Kporin komo n̂epematho komo tak mokyaxe hara. Siaw pona mokyaxe hara cewanomaro. Tahwotaro xa mokyaxe. Enatîn me ro mak nasî ahwotacho komo. Arokorî komo wara rma nasî ahwotacho komo. N̂examro tak Kaan n̂iir̂asî tahwotaxmu me xa, tawakem me xa ha. Yîhyai so tîtosom wara ro mak nasî ahwora ehtoponhîrî komo, Okwe, okwe, kachonhîrî komo ha. Ero wara naxe okre Kporin komo n̂epematho komo.