Taa, mîk hak rowon pono komo yakro tak kîmtapowas hara. Ero ke oona amohcoko amyamro noro yipu kom ha. Omtapotarî ka entacoko aweroro so amyamro anarî yana komo. Omtapotarî ka entacoko roowo pono komo ahnoro yuhnawnonhîrî komo meero.

2 Nîrwonasî Kporin komo mîk hak rowon pono komo poko. Mîk hak sowtatun komo poko marha nîrwonasî. N̂examro pen waihketîkesî ro mak okwe. Twaihkatîkaxmu me n̂iir̂as okwe.

3 Peen cheka mak nar̂mexe okoputhîrî komo. Kowasî xa okoputhîrî komo. Îîpî komo tak nasî tîhso kamxukuthîrî komo ke.

4 Ero yimaw kah yawno komo tak n̂ehcamnoyas ahnoro. Kaapu n̂etamomiyasî karita wara, tamomisom wara. Xir̂ko marha n̂etowtîkes okwe. Uupa yarî n̂emarakesî waihîrî ke, pikera yeperîrî marha n̂emarakesî, ero wara xa marha n̂epîrkesî xir̂ko komo.

5 Taa, okaciparan korokexe kah yawno komo. Eton pono komo yamacho me tak nas okwe, enko xe. Tîwîrîmatîkaxmu mîkyam, wîîkai n̂examro poko. N̂examro yaman̂e me tak nasî okaciparan okwe.

6 Kamxuku ken̂e xa nasî Kporin komo kaciparan, katîthîrî ken̂e marha nasî. Kahn̂eru xîkîtho kamxukutho ken̂e nasî, boce kamxukutho ken̂e marha. Kahn̂eru katîtho ken̂e nasî par̂kakan pokononho ken̂e. Bosîra pononho pen komo tak waihkesî Kporin komo, okno pen waihkesî tîwya tîmsom me rma. Mer̂pono pînî ro mak waihkesî Eton pononho pen komo okwe.

7 Paaka marha n̂epîrkesî okno pîn pen. Paaka xîkrî waihkesî kar̂pamxan me cehsom. Bui waihkesî karitî pen komo okwe. Roowo tak nasî tîhso noro yipu komo kamxukutho ke, iitononho pen komo rowontho. Katîthîrî ken̂e marha nasî. Ero wa nas amn̂e.

8 Ero yimaw tak nasî Siaw pono pen komo yepantopo me hara, Kporin komo ya epantopo komo me ha. Ero po ero wa nasî cimn̂ipu po.

9 On wara nasî tuuna yarinho komo Eton pono komo ero yimaw, maan̂i warai tak nîhcesî ero yaw so tuuna pîn tak. Roowo pupun tak nasî enxopre me wehto ke etahsîxapu me oco. Maan̂i warai tak n̂etahsîyasî iitono po roowo po oco.

10 Eseikanî ro mak mîn wehto, kosope eseikara nasî, katpanaw marha. Kahsî nawomyasî yîsîn yîtîtmamra ro mak, pîra ro xa makî. Pohnî me ro mak n̂een̂axe miya roro ehretawnomaxapu komo okwe. Ero pore tohra ro mak nasî esama yaw tîtosom komo.

11 Wayakuku yeken me mak nasî, pupuri komo yeken me marha. Iina takowerî n̂iir̂asî wayakuku warai, maxweren̂e warai marha. Eton pono komo yehtoponho nukuknomesî Kporin komo. Ehyatkawnon yukuknomacho ke nukuknomesî, patawnon yukuknomacho ke marha. Ero ke tamnukem me tak n̂iir̂asî iitono roowotho okwe, pohnî me ro mak n̂iir̂asî.

12 Iitono pen komo nan̂ikyaxe cma re, antomano rin̂e kom ha. Exihra ro makî tak nas okwe. N̂ehcamnoyaxe tak iitono komo, antomano rin̂enho pen kom ha.

13 Cekyekyem yatî tak natîkwasî sowtatu pen mîntho pore. Ero yipu chew ro nak tak nasî sowtatu komo mîntho okwe. Xakaw yeken me tak nasî iitononhîrî pen komo rowontho, pupuri yeken me marha.

14 Axawa imo pono komo naxe iito okno pîn kom ha. Noro yipu komo n̂esepor̂axe xakaw komo yakro iito. Saciru komo n̂eseseyukyaxe cexihyem komo yakro. Kosope cetarisom tak n̂esekenmexe iito, iina n̂epor̂axe cepokaretopo komo.

15 Iina takowerî n̂iir̂asî pupuri cetuhmekachome tak. Iito rma tuhme nahkamexpesî. Tîmxîkrî nukurunpesî taporî mamaka rma. Wikoko komo marha n̂esenmekyaxe iina cihye so rma.

16 Kporin komo karitan xe ka encoko, Tîmtapotachonhîrî yaw roro xa nasî pohcira ro mak. Tîmtarî ke rma kekn̂e Kporin komo. Ero wara so men n̂expe, kekn̂e thakwa. Ero ke Noro yekatî tak n̂enmekyasî ero yaw roro ciino ritopo mko.

17 N̂examro rowontho yukuknomacho nar̂mai men̂ekacho yînahsîrî ro komo men̂ekachome. Noro yipu komo yekenî ro nukuknomai ehyatkawnon ke yukuknomacho ke. Tamorî yawno ke rma kekn̂e. N̂examro yekenî ro me nasî eroromero. Miya roro ehretawnomaxapu komo yeken me nasî. Ero wa nasî.