On wara marha kekn̂e Kporin komo, Okwe ro mak wîîkes awya so, ar̂mano rin̂e komo amyamro okwe. Awar̂man̂e pîn komo rma mar̂mexe okwe. Awemîknon̂e pîn komo marha memîknoyaxe rma okwe. Ero ke ar̂mano ciitîkache tak awya so, awar̂mexe so tak okwe awaparî kom hara. Emîknono ciitîkache awya so anarî komo tak awemîknoyaxe so amyamro pen hara okwe, kekn̂e.

2 Apa kah yawno, amna cma re makronomesî. Aponaro mak amna xakn̂e takronomacho. Amna cma re mîkaricesî enmar̂atîxera. Amna yesemetanmekyataw amna akronomatamko.

3 Wara hakî kacho tak n̂esences Apa, kar̂pe ro mak kesî. Ero yentache n̂emahciyaxe tak miyan komo rma. Piiri awawomuche n̂etakpexe tak mîk hak rowon pono komo.

4 Naatî naroketîkesî orko komo, ero wa xa marha naxe amn̂e awaparî komo hara amn̂e. Awemyawnonhîrî pen komo naatîkexe okwe. Makaka warai komo marha nahronaxe, ero wara xa marha awaparî komo nahronaxe awahsîtome so. Ero wa kes amna awya Apa.

5 Kayaritomo me xa tak n̂esenpesî Kporin komo kah yawno me cexirî ke. Siaw tak nawronohketîkesî yaaro ciino ritopo ke, kir̂wan̂he ciino ritopo ke marha.

6 Ero yimaw ehn̂an me tak maxe awemyawno komo poko takîhso awexirî ke so, mîn hak poko ehcamhokaxapu me awexirî ke so marha. Kporin komo poko twerî maxe. Awepethîrî komo rma mîn ero wa awehtopo komo, cepethîkem xa awepethîrî ha. Awya so yînmîthîrî mîn ha.

7 Taa, on warai komo encoko hara, kîrkomo nîwracexe okwe karitî komo rma. Roro po rma nîwracexe. Tawake cehcerî etpoko, kaxi mohxapu komo marha nîwracexe ro mak okwe.

8 Esama tak nasî pohra okwe takwekemu rma. Ero yaw so tîtosom komo exihra tak naxe okwe. Tawake taxe etpoko, kachonho tak nasî towso okwe. Ewto pono komo pînîn yaw exihra xakn̂e waapa okwe. Tooto pînîn yawra ro mak naxe okwe.

9 Tîwrataxmu wara nasî roowo, n̂epoxunkesî ro mak okwe. Tîhyapamso naxe Ribanu pono komo, taawaiso tak nasî iitono weewe komo okwe. Axawa imo wara tak nasî Saron. N̂emaxkunketîkesî tak weewe yeperîrî Basan pono, Kahmeru pono marha. Ero wara nasî.

10 On wara tko kesî Kporin komo, Oroto takî piiri kawomyasî. Oroto tak tooto yopono me kesenpesî, oroto tak karitî me xa tak kesenpesî, kesî Kporin komo.

11 Kîmxîkrî n̂etahsîyasî, ero wa etasîyatawno wara maxe. Puruma pîpîtho makî tko n̂etahsîyas aropotaka so. Amn̂e tak ewruyatawno wara awexitaw so, puruma yeputho mak menpexe hara okwe amxîkrî yenpetawno wara. Wehto wara ro mak nasî awapepen komo, awakn̂in̂e komo me rma nas oco.

12 N̂ecakyaxe tak apoyino komo wemronho me cehso ro mak okwe. Cekyekyem wara n̂ecakyasî ro mak okwe acpoxaputho wara.

13 Ai, meyeno komo on wara wîîkes awya so, owya ciino ritopo wekatîmyasî awya so. Ero ke omtapotarî ka entacoko. Meyeno pîn kom hara, awya so wîîkes hara, Karitî xa Mîkro Kporin komo kopi, kacoko tak opoko.

14 On wara naxe kicicitho pokono komo, Siaw pono kom ha, n̂eraswaxe xa tak kir̂wan wara mak cesenposom komo. Tatanaxe mak Kaan ponarono pîn komo. On wara kexe, Onoke thakwa re n̂enmaya wehto mîtwo rma oco, kakn̂in̂e mîtwo oco? Ero wa ma re nai kakrono komo? Nai ha ma re eseykanî ro mîtwo cenmaxmu oco? kexe.

15 On wara cehsom komo xa n̂enmayaxe iito, takîhso ciino rin̂e komo, takîhso tîmtapotaxmu komo, tooto komo yemyawno town̂e pîn komo. On wara na ketu anarî komo puranta n̂enpetu cemyaw so on wara kacho me, On wîmyas awya oyen̂ekara awehtamci, ketu na. Pîra, ahsîra ro mak wasî, kan̂e komo, waihkano ritopo poko esencetaw so marha cepanayahrusom komo, cesewyahrusom komo kicicitho exitaw yîn̂enîrî komo,

16 noro yipu komo tak naxe îh pono wara, kawno pono wara okre. Noro yipu komo naxe iito cenmaxmu me. Sowtatu wacan nasî etkurunpetopo me îh pono rma. Tuuru komo marha n̂een̂axe roro okre, yutunarî komo marha apaipîra nasî. Ero wara naxe noro yipu komo.

17 Kayaritomo xa n̂een̂axe amn̂e, cenporem xa okre. Roowo marha n̂een̂axe meyeno.

18 Meserepokexe rma pahxa awerahtîmtoponhîrî komo poko. On wara mîîkexe ero yimaw, Ahto nai karita mewren̂e pen? Ahto nai kayaritomo purantan yahsîn̂enho pen hara? Ahto nai sowtatu mîn kuknoman̂e pen hara? mîîkexe.

19 Tîrwon̂em komo xa enîhra tak maxe. Entan me ro mak tîmtapotaxmu komo marha enîhra maxe. Anarî yaro tîmtapotaxmu komo yenîhra maxe.

20 Siaw xa yo encoko kewton komo, yiipo keseresmacho ro komo, yukuknomaxapu po so keseresmacho kom ha. Xerusaren tak meen̂axe tîtken̂e awenmacho kom ha. Roona nas ero po yixkanî ro. Ero mici yecetî nasî emohkan me ro mak. Etawoton me marha nasî yimici.

21 Iito tak nasî Kporin komo rma, kîkayaritomon xa. Tuuna yepu nasî iito yaake, amtapen̂an kom ha. Aporî komo marha nasî. Ero kwaw kanawa mokuhra ro mak nasî, kweikwei po taasom mokuhra. Porin marha mokuhra nasi ero kwaw.

22 Ero yimaw Kporin komo rma tak nasî ken̂ekan̂e komo me, Noro marha nasî kpanatanmetopo yekatîmn̂e me, Noro marha nasî kîkayaritomonî ro me. Noro xa nasî kukurunpen̂e komo me. Awaparî komo mokuhra ro mak tak naxe.

23 Taarore mak nasî akanawarî mici. Ocowo yahsîtopo yecehtora tak nasî. Epîrkaporo nasî. Ocowo yahsîtopo ehyatkara tak naxe okwe. Ero yimaw aaxatî pîn pen komo yemyawnonho tak nas awemyawno komo me okre. Cekamso tak nasî iitono komo nahsîrî ro me. Yîhrepun komo meero nahsîyaxe.

24 Ero yimaw on wara kahra tak naxe Siaw pono komo, Kamotoyas okwe, kahra. Iitono komo yehtoponho tak nasî tîhcamnoso okre, kicicme ehtoponhîrî komo. Ero wara naxe Siaw pono komo amn̂e.