On wara wîikes hara awya so, Kayaritomo tak nas amn̂e, kir̂wan̂he ciino rin̂e ro. Antomano rin̂e komo marha naxe kir̂wan̂he ciino rin̂e ro kom ha.

2 Ero yimaw Noro rma nasî kwacan me, kecen̂an me nasî kar̂pe ocowo exitaw. Tooto rma Mîk. Kîmîn me marha nasî kar̂pe xa kapepemetaw. Tuuna yepu wara marha nasî Noro, turpem pore tîhtosom wara. Cetarisom komo yawarpaman̂e me nasî toopu, porin xa. Ekar̂kaxapu komo yawarpaman̂e me nas ha. Ero wa xa marha nasî Noro, kawarpaman̂e wara hara.

3 Ero yimaw xîrpe exihra tak nasî cewkem komo yewru. Kîmtapotarî ponarono me xa tak naxe tpanakem kom hara.

4 Ero yimaw on wara naxe wara mak cesehtînosomînhîrî komo, yuhnari entan̂e me tak naxe. Kir̂wan̂he marha tak nîmtapowaxe kor̂ope tîmtapotaxmunhîrî komo, centaxmu me tak nîmtapowaxe hara okre.

5 Ero yimaw tak, Kwakren̂e xa mîkro, kahra naxe akpîn komo poko. Kwakren̂e ro mîkro, kahra marha naxe tamen̂em komo poko hara.

6 On wara naxe akpîn komo, akpîra nîmtapowaxe okwe. Kicicme cehtopo ponaro xa naxe. Kaan yanmen pîn pokono me naxe. Kporin komo poko rma re nîmtapowaxe anarme mak ha tko okwe. Tîroman̂em komo n̂een̂axe rma re, yînahmara so rma okwe. Twokru xatî komo wokru n̂enatkexe okwe.

7 Kicicme nasî kicicitho komo yesehtînotopo. Yîwîrîmano ritopo nîhtînoyas okwe. Cesemetanmesom komo yîwîrîma xe nasî tîcemaron ke. Ow epanko, ketu rma na re cesemetanmesom komo. Yaaro rma ero wa ketu. Noro yipu komo yîwîrîma xe mak naxe okwe kicicitho komo.

8 Kakronomacho komo nîhtînoyaxe kakronoman̂e komo reha. Etwîrîmara rma naxe kakronoman̂e me cexirî ke so okre. Ero wara naxe.

9 Taa, aaci komo awya so wîîkes hara, eserepokan me mak maxe okwe. Awomcoko tak piiri, omtapotarî entacoko. Wara mak cesehtînosom komo amyamro okopuci komo. Wara rma omtapotarî ka entacoko.

10 Eserepokan me ka maxe oroto. Cewn̂e ro mak tko micimn̂ipunwaxe ero warai me. Ero yinhîrî menmayaxe xa hara asak ro mak. Ero yimaw tak meserepokexe okwe. Uupa yatî yepetara tak nasî, eperîrî exihra tak nasî cenmesom.

11 Atatanîmcoko amyamro aaci komo. Eserepokan me ka maxe. Oroto tak eserepokacoko. Epononkacoko, kumixitho mak amrucoko aponon komo me.

12 N̂esewankatapexe tmararînthîrî komo pînîn yaw kir̂wanînhîrî pînîn yaw ha. Okwe okwe, kexe uupa yatî pînîn yaw, ceperporemînhîrî pînîn yaw ha.

13 Oyanan komo rowon pînîn yaw marha nîwracexe. Peen me mak tak nas okwe amn̂e. Cekyekyem mak natîkwasî iito. Tîmîn komo yaw so tahwore ro mak xatken̂e pahxa noro yipu komo pînîn yaw nîwracexe. Cewtonthîrî komo po nahwowatken̂e ro mak okre ero pînîn yaw marha nîwracexe.

14 Yarîhra tak nasî kayaritomo mîntho okwe. Wara hak kachonho n̂esencekn̂e iito, esentara tak nas amn̂e. Pohnî me nas okwe amn̂e. Woskara me tak nas amn̂e sowtatu mîntho yewtîtho, waapa yekatîmn̂e mîntho yewtîtho marha. Buhu yeken mexe tak nasî, kahn̂eru yeseresmacho me marha. Ero wa tak nas amn̂e. Miya roro nas ero wara okwe. Ero ke eserepokacoko. Ero wa wîîkes awya so.

15 Amn̂e n̂he tko kpona so Cekatî tak n̂iir̂asî Kporin komo. Kah yawno rma Mîk n̂iir̂asî kpona so wooku yarkan̂e wara rma. Ero yimaw tak axawanhîrî tak nasî naatî yewtî mexan me hara okre. Naatî yewtî tak n̂esenpesî comota wara rma.

16 Axawa imo po tak nasî yaaro ciino ritopo. Naatî yewtî mexan po tak nasî kir̂wan̂he ciino ritopo.

17 Ahwokan me tak naxe iitono komo ero yimaw kir̂wan̂he cexirî ke so. Eserepokan me mak tak naxe, erasîn me marha okre. Ero wara naxe miya roro.

18 Kahwokacho komo ken̂ehra ro mak tak nasî oyanan komo yeken. Kerahtîmtopo exihra ro mak nasî yîmîn komo mîtwo. Ahce wa so na exihra ro mak naxe n̂examro ceken komo po.

19-20 Saraipa rma tko mokyasî okwe. Comota po mokyasî. Mîîmo komo marha nîwîrîmesî ewto pononho. Kaanî nwakrerî me rma tko maxe okre. Anatîrî komo yatho miir̂asî aporî yecihtari so, miyan yecihtari rma. Awoh komo marha men̂emhatakexe wacan yai hara paaka komo, buhu kom ha. Tanmero so mak etaritome ero wa miir̂axe. Ero wara maxe amn̂e.