On wara marha kesî Kporin komo awya so, Okwe ro mak, wîîkes apoko so Exitu pona awtorî ke so akurunpen̂e komo yan̂ihso. Kawaru pona mak meen̂axe okwe, tarara pona marha meen̂axe mer̂pora exirî ke. Kar̂pe naxe kawaru mkaw tîtosom komo. Ero ke n̂examro pona marha meen̂axe okwe. Kir̂wanî ro pona enîhra rma tko maxe okwe, ponaro Ixaw Yana komo yehtopo pona. Apa kah yawno, amna cma re mukurunpesî, kahra ro mak maxe okwe.

2 Takîhso enîno rin̂e rma tko Mîkî. Ero ke tîwîrîmaxmu me rma awir̂axe so. Tîmtapotachonhîrî towîhra nasî. Kicicitho komo yîwîrîmachome nawomyasî, iyanan komo yîwîrîmachome marha. Kicicitho komo yakronoman̂e komo marha nîwîrîmesî.

3 Tooto mak mîkyam Exitu pono komo, Kaan pîn thakwa mîkyam. Tuhn̂em makî re kyam mîk iyoh komo kawaru, ekatî pîn mîk. On wara nasî Kporin komo amn̂e, taporî n̂ehyatkesî n̂examro yar̂machome hara. Ero yimaw tak akronomano rin̂e komo n̂ehrokexe. Yînakronomathîrî komo marha n̂epîrkexe. Asakno roro rma waihyaxe okwe. Ero wara naxe amn̂e okwe.

4 On wara kesî Kporin komo owya, On wara nasî reaw, yîîm me cehsom, kar̂pamxan me cehsom anarimaw, totke cexitaw mayanasî ro mak tootî yewyomachome. Ero yimaw kahn̂eru yosom komo n̂etan̂ikyaxe merpono pîn noro yen̂epen̂e komo. Noro yipu komo mtapotarî pona erasîra rma nasî. Exe exe, ketaw rma yîwya so, kar̂pe ketaw eserepokara nasî. Ero wara rma nasî Kporin komo. Siaw Yîpîn pona nîhcesî ar̂mano ciitome.

5 Xerusaren pono komo nukurunpesî Kporin komo, kantoman̂e ro. Ewto yepore cesî tarin̂em komo, ero wara rma Xerusaren yepore tîtosom wara nasî Kporin kom hara yukurunpetome.

6 Kporin komo yaka amohcoko hara amyamro Ixaw Yana komo. Noro manwetîketken̂e ro mak okwe. Wara rma amohcoko hara.

7 Ero yimaw tak on wara maxe amyamro ahnoro, ponaro awehtoponhîrî komo mar̂mexe kr̂a an̂irithîrî mko. Prata ciixapu mar̂mexe, ooru ciixapu marha. Kicicme awehtopo komo mîn ciixaputho mko. An̂irithîrî komo rma mîn awamorî ke so rma kica. Ero yipu tak mar̂mexe kr̂a.

8 Ero yimaw tak Asiriu komo waihyaxe kacipara imo ke rma ha re tooto kaciparan pîn ke ha tko. Kacipara imo ke tamaxmu me rma naxe oko, tooto kaciparan pîn namarî me ha tko. Kacipara yai n̂emahciyaxe. Yumumuru komo tak napickexe anarî yana komo epethîmnî me ro mak. Ero wa kar̂pamxan komo napickexe.

9 N̂emahciyaxe tak Asiriu komo cerahtîke so okwe. Twacan komo yaka cesî. Waapa banteiran yenîche n̂erahtîmtîkexe ro mak sowtatu yantoman̂e kom ha. Ero wara naxe amn̂e Asiriu komo, kesî Kporin komo. Twehtokem Mîk Kporin komo. Siaw po nasî Noro wehtorî, Xerusaren po nasî Noro wehtorî yen. Ero wa nasî.