On wara marha kesî Kporin komo, Okwe ro mak wîîkesî omxîkrî komo poko oyanwekn̂e me exirî ke so kica, kesî. Ero poko cma re taxe, kacho poko n̂esencexe. Omtapotarî tko entara ro mak naxe takîhrecho komo pokono. Cetkurunpetopo komo poko nîmtapowaxe anarî yana komo yakro oyekatî yanmera ro mak kica. Ero wa karî ke kicicme ehxapunhirî komo tak kicicme naxe xa hara okwe.

2 Exitu pona cexe okwe. Ahce wa katî amna nai Apa? kahra ro mak naxe owya. On wara mak kexe, Kar̂pe xa nasî Paraw. Noro xa kukurunpexe so. Exitu pono komo pona amna n̂een̂asî kawarpamacho me exirî ke, kexe mak okwe.

3 Ero ke kar̂pe Paraw yehtopo tak nas amn̂e ahyapamnotopo me mak kopi. Exitu pono komo pona meen̂axe awawarpamacho me. Awehn̂anmekn̂e komo me xa matko awir̂axe so kopi.

4 Soan po rma re naxe Paraw maywen yantoman̂e komo. An̂es pona marha re mokyatken̂e hara Paraw maywen komo.

5 Cehn̂axmu me makî tko mesenpetken̂e n̂examro yakro amtapowataw so. Takronoman̂e komo mera awen̂atken̂e so mak, tkariton̂e komo mera marha. Nîhyapamyatken̂e mak apona so, kesî. Ero wara kesî Kporin komo awya so.

6 Taa, on wara wencekn̂e hara Kporin komo mtapotarî, okno komo pokono tak mîn wencekn̂e suu n̂ixan pokono ha. On wara kekn̂e, Miya cexe n̂examro kopi. N̂esemetanmekyaxe ro mak esama yaw, nahwokexe marha. Keskan̂e chere cexe kopi. Iito nasî reaw kîîrî, woosî marha. Iito marha nasî okoyi komo oko, anarî hara okoyi, wehto kenarî, kaikokoro tîtosom ha. Noro yipu komo chere cemyawno komo naar̂axe buhu mkaw so. Cepethîkem naar̂axe kameru mkaw so marha. Miya naar̂axe takronoman̂e pîn komo ya tîmsom ha okwe.

7 Tohnaw ro mak Exitu pono komo pona n̂een̂axe takronomachome so. Ero ke on wara Exitu pono komo wetahcasî, Haabe Emyarînî Ro, kacho me wetahcasî. Ero wara kacho ween̂akn̂e.

8 Taa, etoko tak, omtapotarî mewreta karita poko, tamomisom yaka. Ero wa mewreko yîn̂enîrî komo me ehtome amn̂e, miya roro yîn̂enîrî me ehtome ehcamnopîn me ro mak ha.

9 On wara kacho mewreko, Kanwekn̂e komo moxam kica. Omxîkrî komo rma re moxam, cemarontaxmu komo makî tko kica. Tporin komo ya tpanatanmetopo komo yenta xera ro mak naxe okwe.

10 On wara kexe moxam Kaan n̂enpotho yenîn̂e komo ya, Ero yipu enîhra ehcoko kica, kexe. On wara kexe Kaanî mtapotarî yekatîmn̂e komo ya hara, Takîhso kehtopo pokono ekatîmra ehcoko. Centaporem mak ekatîmcoko amna ya, tohnawno marha ekatîmcoko.

11 Anarî yawno wara ehcoko esama yawno wara. Kaan yesamarî yawhra tak ehcoko. Kir̂wanî ro ponaro ehcoko, ponaro Ixaw Yana komo yehtopo ponaro, kahra tak ehcoko amna ya, kexe mak okwe.

12 Ero ke on wara kesî Kir̂wanî ro, ponaro Ixaw Yana komo yehtopo, Poxumra ro mak mencet ham omtapotarî Isaias n̂entamexpesî awya so ero. Emetanmekno ritopo ponaro mak mat ham, anwekno ritopo ponaro marha. Kir̂wan̂he kiin̂e mîn ham okre, mîîketu ero yipu poko rma kica.

13 Ero ke on wara nas ero wara awehtopo komo, kicicme awehtopo kom ha, waaca wara nasî kawno wara, emacakaporono wara, etîmtakaxapu wara. Ero wara exitaw waaca wîî nîîke tak na. Ero yinhîrî n̂emacakesî ro mak ponan̂e rma. Ero wa nasî kicicme awehtopo komo marha okwe.

14 Ero wara awehtoponhîrî komo tak nakuhr̂apesî ro mak Kporin komo tahrem yakuhr̂apon̂e wara. Cor̂or̂omesî ro mak okwe. Ahce na yîmtora ro mak nasî. Wahra so tak nas ahkaxapu. Wakanan̂etho exihra ro mak nasî ahkaxapu chew, porinî n̂he ciki exihra nasî wehto yaatopo wicakno ciki, tuuna yanîmtopo wicakno cik marha exihra ro mak nasî. Nahketîkesî ro mak okwe, kesî Kporin komo awya so.

15 On wara tko kes hara Kporin komo Kaan. Kir̂wanî ro Mîk kesî, ponaro Ixaw Yana komo yehtopo, Ohyaka amohcoko hara awepokaretome so. Ero wa awexitaw so kakir̂wamexe so okre. Tîtken̂e mak tak ehcoko, opona enîn̂e me marha kar̂pe tak awehtome so okre, kes awya so. Owî tko manwekyatken̂e mak okwe.

16 On wara mîîketken̂e, Pîra, kawaru mkaw xa amna n̂emahciyasî, mîîketken̂e. Ero ke memahciyaxe rma. Karitî mkaw amna n̂emahciyasî, mîîketken̂e. Ero ke men awahsîn̂e komo marha cexe kar̂pe awahsîso so hara.

17 On wara memahciyaxe, 1.000 yakenon na matu iito re. Ero wicakî rma memahciyaxe ahnoro cewn̂e mak awaparî komo mokuche. Anarimaw 5 mak mokuche so awaparî komo memahciyaxe ahnoro rma. Ero wara memahciyaxe exihra cehso ro ha re. Asakî cik na naxe rma apoyino komo mîîmo yîretîrî yecepu wara, îîpî meretwono wara ha. Banteira wara matu etîmtoxapu, matîwîn pono wara.

18 Ero ke pahkî ka nasî Kporin komo awakronomara so cokorî. Ero wara nasî apînîn yawno me so xa tak cesenpotome amn̂e. Kir̂wan me cehtopo rma ka n̂enpesî pahkî n̂he apînîn komo yawno me xa tak cesenpotome hara amn̂e. Yaaro ken̂ekan̂e Mîk Kporin komo Kaan. Tawake xa naxe Noro momokn̂e komo ahnoro.

19 On wara wîîkes awya so Siaw pono komo ya, Xerusaren pono komo ya ha, pahxaro tak yîwratara ro mak maxe okre. Apînîn yawno me xa tak n̂esenpesî Kporin komo amtapotarî komo yentache, Amna cma re makronomesî, kacho yentache. N̂encesî rma wa amtapotarî komo, Ero ke aweyukyaxe so tak okre.

20 Cesemetanmesom komo wokru wicakî mak awokpexe so Kporin komo, yîwîrîmaxapu komo yuru ke cik mak awurmexe so hara. Wara rma ceyamso exihra tak naxe apanatanmekn̂e komo. N̂examro tak meen̂axe awewru ke so rma.

21 Anarimaw so na metaknametu kar̂me. Anarimaw so na metakanametu poowa me hara. Ero wara awexitaw so on wara kacho tak mencexe amkaino komo mtapotarî, Ero ha awesamarî, ero yaw tak etoko, kacho rma mencexe.

22 On wara maxe ero yimaw, mîk hak warai me wakîknoxaputho mko tak mîwîrîmexe, yukuixapunhîrî ciixaputho marha. Prata ke yîmkarinomaxapu mko mîn mîwîrîmexe, ooru ke yîmkarinomaxapu marha anarî mko hara. Mar̂mexe kr̂a poonotho wara, tusmuyemtho wara. On wara tak mîîkexe ero yipu komo ya, Etocoko kr̂a, mîîkexe.

23 Ero yimaw tak tuuna n̂ekmexpesî Kporin komo anatîrî komo tîhn̂e, an̂irithîrî komo tîhn̂e. Anahmexe so amararîn komo pono ke rma, tpoxwem ke mer̂pono pîn ke. Ero yimaw marha cuupu nahyasî awoh komo paaka woskara po, porin po.

24 On wara marha nasî awoh komo paaka, buhu komo, anapickarî komo mîk roowo pomorî poko, puruma yatho xa nahyasî kir̂wan. Caarapa ke pahxapu mîn nahyasî, parata warai ke pahxapu marha.

25 On wara tak nasî waihkano ritopo po hara kaamo po, mîîmo komo n̂emacakesî kawno pen. Ero po marha tko tuuna yepu n̂epatakesî îh po kawno po, matîwîn po so marha. En̂exa nîhcesî.

26 Ero yimaw marha kweipon̂e me xa nasî nuun̂i kaamo wara rma. Miya xe xa tak kweipon̂e me nasî kaamo hara. 7 kaamo wicakno wara rma kweipexe so okyo. 7 kaamo po kweipesî oroto ero wicakî rma kweipesî ero kaamo po rma okyo. Ero wara nas amn̂e tîyanan komo yeper̂an yimiyataw ehcemacho ke. N̂examro yetapacho n̂ecihnoyasî kir̂wanhe cehso ro. Ero wa tîyanan komo n̂iir̂asî Kporin komo.

27 On warai komo marha mokyaxe amn̂e, Kporin komo yosotî yetacin̂e komo mokyaxe meyeno komo rma. Kporin komo men mokyasî, kexe. On wara mokyasî Noro, tîrwon̂e xa men mokyasî kopi wehto wara ro mak, yîsîn chew marha mokyasî. Yîrwon yekatîmn̂e me mak nasî yîmtarî. Wehto wara ro mak nasî yun̂uru oco.

28 Noro yapepen nasî kahxi wara. Kahxi chew kexitaw enor̂poro na tatu, kîpîmtari na nai tuuna, ero wara nasî Noro yapepen kpoko so. Mîk hak rowon pono komo nîmyapesî mak manari yari. Waihkacho pokono rma mîn manari kacho. Yîmtaka so kawaru yewkor̂macho ciir̂atawno wara nasî, tîwîrîmacho komo wece ewkor̂macho rma. Ero wara mîk hak rowon pono komo n̂iir̂asî Kporin komo.

29 Ero yimaw tak mewanomexe amyamro reha. Opoko awahwotachome so meseresmexe anarimaw so. Ero yimaw so mewanomexe kosope, ero wara rma mewanomexe pahxaro tak. Tahwore xa maxe okre. Raatî yecerî me mîîcetu îh pona, Kporin komo yeken pona. Toopu warai me cehsom Mîk, Ixaw Yana komo yececetotopo me cehsom xa, Noro yeken pona mîîcexe tahwore xa. Ero wara rma mahwowaxe pahxaro.

30 Ero yimaw roowo pono komo n̂entarî me tak nîmtapowasî Kporin komo. Kayaritomo me ro mak nîmtapowasî. Taporî marha n̂enpesî yîwya so. Apockantaxapunhîrî n̂enpesî etapano ritopo ha. Tîrwon̂e xa waihkano n̂iir̂asî. Wehto ke rma waihkano n̂iir̂asî, mararî yecakyatawno warai ke oco. Ocowo ke marha waihkano n̂iir̂asî, tarai ke marha, saraipa ke marha. Ero warai ke waihkano n̂iir̂as okwe.

31 Tîmtarî ke rma kr̂a Asiriu komo nakuhr̂apesî. Tamoyin ke rma n̂examro nar̂mes okwe.

32 N̂examro pen n̂etapesî tamoyin ke oko. Ero ke etaparî komo yakro ro rma cerekcerek kan̂e n̂etapexe akrono komo, ahpa marha nîyorkexe. Ero wa taporî ke rma n̂etapes oko.

33 Pahxa rma wehto imo n̂iriyakn̂e Kaan. N̂examro kayaritomon pen yeken me rma n̂iriyakn̂e oco. Iito nasî ewtarî porin, wehto yen. Amtapen̂e nasî tahtoso, yuhnaka marha nasî. Wehto pen nasî iito mer̂pono pîn, kamerî marha nasî mer̂pora xa marha. Tapepen ke rma Kporin komo wehto nahsîmexpesî oco. Enxopre warai me rma nasî Noro yapepen. Wehto ke ahsîmexpoxapu xa mîn oco. Ero wa wehto imo n̂iriyasî Kporin komo.