Okwe ro mak wîîkesî Ariew poko, Tapi pen yewtontho poko. Yicimn̂ipuntaxera mesenmekyaxe iina aweseresmachome so. Ero wa eseresmacoko rma.

2 Wara rma Ariew pono komo tak wahwokamexpesî. Ero ke, Okwe, okwe, kexe ro mak tak iitono komo, ahwora xa naxe okwe. Ero yimaw owehtorî yapon me xa tak nasî iitono ewto.

3 On wara wîîkes awya so iitono komo ya, Owî rma wiir̂asî omîn komo amamhoko so. Kwahkocexe so roowo enmexapu ke. Awacanthîrî komo mohrakacho komo marha wiir̂asî.

4 Roowo pona kar̂mexe so okwe. En̂exa tak mîmtapowaxe roowo poi. Wara mak mîmtapowaxe pukno wa awexitaw so rma. Yaskomo mtapotarî wara tak nasî amtapotarî komo yuhnawno wara. Ehtura mak mîmtapowaxe roowo po awexirî ke so okwe.

5 Mer̂pora ro mak naxe aaxatî pîn komo. Wara rma roowo pupuntho wara tak naxe amn̂e pin̂ipici me cehsom wara. Mer̂pora ro mak naxe eraspetono komo, puruma pîpîtho wara mak naxe kopi ocowo narîrî wara. Yohno ro mak n̂ehcamnoyaxe n̂examro pen okwe.

6 Ero yimaw Kporin komo mokyasî kantoman̂e ro. Tarai kesî ro mak Noro mokyataw, roowo marha n̂esewsîyasî, cewtun̂em marha n̂esencesî, nocowonasî karpe ro mak, wehto marha rerehrere kesî mararî yecakyatawno wara oco. Ero wara nasî Kporin komo mokyataw.

7 On wara tko naxe Ariew pono komo yakro cetar̂maxmu komo, mer̂pora ro mak naxe iitono komo waparî. N̂examro wacantho yawka xe naxe. Ero wara Ariew pono komo yar̂ma xe naxe kopi. Kwosotîmtoponhîrî wara makî tko naxe ero yimaw, kosope kwosoto enxapunhîrî wara ha.

8 Anarimaw nîwînîkya tîroman̂em. Tîwînîkyataw wosowa na. Ceseresmetawno wara n̂esen̂a noro rma twosoto. Tpakache tak nîromanasî rma okwe. Anarimaw twokru xatî na nîwînîkya. Wooku yeer̂atawno wara n̂esen̂a twosoto mak okwe. Tpakache tak twokru xe rma nas okwe, kar̂pera rma. Ero wara xa marha naxe mîk hak rowon pono komo, mer̂pono pîn kom ha, Siaw Yîpîn pono komo waparî kom ha.

9 On wara tko wîîkes hara awya so, eserepokacoko tak. Okyo, okyo, kacoko mak. Esewkacoko amyamro rma. Ewuhra tak ehcoko. Wenaxe kica, kawaxikyem yeetopo yanmera ha tko. Epîrkaporono wara n̂etar̂axe, twenîmtopo yanmera so mak.

10 Awekatî komo nîwînîkrekn̂e Kporin komo. Yuhnari awînîkretken̂e so. Apoko weronomano rin̂e komo yewru nahruyakn̂e, ero wa xa marha n̂iir̂akn̂e pahxarono yenîn̂e kom hara. N̂examro n̂ewoponcetken̂e okwe.

11 On wara xa nas on on̂enîtho, karita wara nasî, ahkoromacho ke ahruxapu wara. Anarimaw on wara na mîîketu, Onî cma re mîmtapotaresî on̂entarî me, mîîketu na. On wara tko aweyukyatu so, Enîhra thakwa wasî, tahkoromaxi thakwa nas okwe ahrunkan me ro mak, nîîke.

12 Anarimaw na karita yenîn̂e pîn ya mîmyat hara. On wara na mîîketu yîwya hara, Onî cma re mîmtapotaresî on̂entarî me, mîîketu na. On wara tak na aweyukyatu so noro yipu hara, Karita yenîn̂e pînî ro mak ow okwe, nîîke okwe.

13 On wara tko kesî Kporin komo apoko so, On wara naxe moxam, oyakro rma re nîmtapowaxe, tîmtarî ke so mak ha tko okwe. Kporin komo ponarono ro ow ha, kexe rma re tîmtarî picho ke so mak okwe. Mooxe rma tko nasî yîropotarî komo. Kporin komo men cewetpore nasî, kexe rma re. Tooto mtapotarî poko makî tko panatanmekno n̂iir̂axe kica.

14 Ero ke karitî me xa tak kesenpes hara moxam ya opoko eserepokachome so. Wîhcamnoyasî tak takîhsom komo mtapotarî. Eyamxapu me tak wiir̂asî yuhnari yîhtînon̂e komo mtapotarî ha.

15 Okwe ro mak, wîîkesî cesehtînotopo komo yeyamn̂e komo poko, yuhnaka eyamn̂e komo poko ha. Ero wa n̂eyamyaxe enîhra ehtome Kporin komo. Awarpanaw mak yîwîrîmano n̂iir̂axe. On wara kexe, Onoke thakwa re keen̂axe so? Onoke thakwa re kîmtapotarî komo n̂ence? kexe.

16 Anarme ro mak mesen̂at ham okwe. Er̂mo warai rma mîk er̂mo kahn̂e, tîtket ha ma re? On wara ma re nîîke tahrem tkahn̂enhîrî ya, Okahn̂enho pîn amoro, nîîke. On wara xa katî nîîke tahrem tîkahn̂enhîrî ya, Camkî mak masî okwe kahrî poko, nîîke ma re awya so? kesî Kporin komo awya so.

17 On wara wîîkes hara, on wara tak nasî Ribanu amn̂e, mararî me xa tak n̂ehtîkesî, naatî yewtî mexan me okre. Comota wara mak nasî naatî pen iitono ha. Pahnoke xa tak nasî ero wa ciitopo.

18 Ero yimaw tak Kaanî mtapotarî n̂encexe panahnînhîrî komo, on karita yawno n̂encexe. Enîn̂e me marha tak nasî ewuhnînhîrî kom hara. Awarpanawnonhîrî tak enîn̂e me naxe okre.

19 On wara marha naxe kyopono mera cesehtînosom komo, Kporin komo poko nahwowaxe xa hara. Cesemetanmesom komo marha nahwowaxe Kir̂wanî ro poko, ponaro Ixaw Yana komo yehtopo poko ha.

20 Ero yimaw eraspetono komo tak n̂ehcamnoyaxe okwe. Ero wara xa marha naxe Kaanî mtapotarî poko cetaporesom kom hara. Ahnoro n̂exponkexe kicicitho ponarono komo.

21 On wara kexe noro yipu komo okwe, Kicicme nai ham noro, kexe camkî yîmtapotachonhîrî yanme mak okwe. Anarimaw so yîtwermano na n̂iir̂a iitono, ewto potaw. Noro yipu mtapotarî naknamexe, Kicicitho mîk ham kica, kachome tak en̂ekano rin̂e komo ya. Anarimaw so takîhsom komo n̂en̂ekapexe en̂ekano rin̂e komo ya tohnaw ro mak kica. Noro yipu pen komo n̂ehcamnoyaxe amn̂e.

22 Ero ke on wara kesî Kporin komo, Abraaw yukurunpen̂enho ha. Xako yepamtho komo poko kesî, Ero yimaw tak yîhyapamra naxe Xako yepamtho komo, ero yimaw tak ewxamantara naxe, kesî.

23 Amn̂e takî cepamthîrî komo n̂een̂axe tîchew so rma, kir̂wan̂he tak n̂een̂axe, oyamorî ke akir̂wamaxapu me n̂een̂axe. Ero ke takî twerî n̂etahcaxe oyosotî. Kir̂wanî ro Mîk Kaan, ponaro Xako yehtopo, kexe. Kaan ponaro xa tak naxe, ponaro Ixaw Yana komo yehtopo ponaro.

24 On wara tak naxe kir̂wan̂he cexi xera cehsomunhîrî komo, yuhnari yîhtînon̂e me tak naxe okre. Kaanî mtapotarî yanwekn̂enho komo tak naxe takîhretopo komo yentan̂e me okre. Ero wara tak naxe amn̂e.