On wara marha wîîkes awya so, okwe ro mak wîîkesî Eprain yepamtho komo yarokorî poko. N̂examro yarokorî wara nasî ehcoyoponkacho komo kica. Twenîmsom makî tko mîkyam kica. Iito nasî ewton komo cenporemînhîrî. Woskara potaw so nasî, naatî yewtî mexan potaw so ha. Ero poko n̂ehcoyoponkexe iitono komo ewto poko. Epemrutun warai tko mîn ewto, xahwontaxapu warai mak okwe. Iitono komo yar̂man̂e me nasî wokru komo rma okwe.

2 Nas ha tko Kporin komo yanton karitî xa, kyopono ro. Noro tak ewto pen nar̂mesî roowo pona, kar̂pe ro mak nar̂mes oko tamorî ke rma. Anarimaw so saraipa mokyasî, nocowonasî marha kar̂pe. Ero yipu ke ar̂maxapu wara nasî. Tuuna marha mokyas anarimaw, mer̂pora ro mak, roowo yukmanîren̂e. Ero yipu ke ar̂maxapu wara nasî ewto pen okwe. Ero wa Kporin komo nar̂mesî Eprain yepamtho komo yewton pen.

3 Ero yimaw tak n̂examro yarokorî nasî waapa komo napikrî me mak okwe. Ero wara nasî Eprain komo yehcoyoponkachonho. Ero wara naxe twenîmsom pen komo okwe.

4 On wara tak nasi ewto cenporemînhîrî, epemrutun warai. Îîpî yamrinawno potwononho mîn, ewtî mexan potwononho ha. Xahwontaxapu wara mak nas okwe epemrutun wara. Knatîrî yepetache, yihcirî xa ka ceen̂a, yohno rma tîtpocasî ahtome ero yimaw rma. Yohno mak nasî kemyaw. Ero wara n̂ehcamnoyasî n̂examro yewtontho okwe.

5 Ero yimaw tko Kporin komo rma nasî tîyanan komo yarokorî warai me, cenporem warai me xa. Asakî mak tak naxe Noro yanan komo ero yimaw, etîmtoxapu komo mak natu. Wara rma n̂examro yarokorî warai me nasî.

6 Noro marha nasî en̂ekano rin̂e komo ropotaw ekatî me mak. Ero yimaw n̂examro tak naxe yaaro en̂ekano rin̂e me so mak. Sowtatu komo ropotawno me marha nasî. Noro yipu komo karihcesî Kporin komo waapa komo yen̂epetome ewto potaka mohxapunhîrî komo rma.

7 Kir̂wan̂he cehtopo pohcin̂e wara naxe oyanan komo okwe. Kawaxiyem yerîrî ke so mak ero wa naxe kica. Kaanî mtapotarî yaw roro exihra naxe. Yaarono poko camkî naxe Kaan mîn yenîn̂e komo twenîmtopo komo yanme kica. Ero wara xa marha naxe n̂examro weronoman̂e kom hara. Kawaxiyemu rma nasî ar̂man̂e komo me okwe. Kaanî mtapotarî yaw roro exihra naxe okwe ero yanme kica. Ahce na Kaan n̂enpotho poko camkî n̂een̂axe okwe, wara kyam mak en̂ekano n̂iir̂axe okwe.

8 Yînahrî komo yapon ahnoro nasî wenarîthîrî komo ken̂e ro mak kica. Tusmuye ro mak nasî kica. Yusmumnî exihra ro mak nasî aapo okwe.

9 On wara kexe owya, Onoke xa panatanmekî xe nai Isaias? Onok ya xa Kaanî mtapotarî n̂entamexpe ha? Rikomo komo katî panatanmekya oroto ka moomo yerîhkan̂e komo katî, tîson manatîrî yahsîpînkan̂enho komo rma katî?

10 On wara kesî Isaias kîwya so, Ero poko ehcoko, ero poko ehcoko. Ero yinhîrî kesî xa hara, Ero poko ehcoko, ero poko ehcoko. Kpanatanmetopo n̂ekatîmyasî, poi cik mak ha. Ero yinhîrî n̂ekatîmyasî xa hara ero wa xa marha. Wahra so mak, wahra so mak, ero wara kpanatanmekyaxe so noro kica, kexe owya okwe.

11 Ero ke anarî yana komo tak n̂en̂epesî Kporin komo moxam panatanmekn̂e me. Tîmtapotarî yaro tko nîmtapowaxe, entan me n̂he mak okwe. Noro yipu komo n̂en̂epesî Kaan tîyanan komo yaka tîmtapotarî yentamexpon̂e me.

12 On wara cma re kekn̂e Kaan tîyanan komo ya, Awesemetanmetopo pokai awya so. On ha awepokaretopo komo. Apokache so epokarecoko tan. On xa awerepotacho komo, kekn̂e ha re yîwya so. Yîmtapotarî yentara tko xatken̂e okwe.

13 Ero ke ero wara rma kesî Kporin komo yîwya so. Ero poko ehcoko, ero poko ehcoko, ero poko ehcoko, ero poko ehcoko. Kpanatanmetopo poyino ciki, kpanatanmetopo poyino ciki xa hara, yohno so mak, yohno so mak. Ero wara kesî Kporin komo yîwya so yîhyai totohme so tak, tîmkai so epîrkachome so oko. Ero wara n̂epîrkexe ceper̂antaxi ro oko, n̂emciyaxe marha, waapa nahsîrî me mak naxe okwe. Ero wara naxe okwe.

14 Ero ke on wara wîîkes awya so kîwîrîyakan̂e komo ya, Xerusaren pono komo yantoman̂e komo amyamro. Kaanî mtapotarî cma re wen̂tamexpes awya so. Ero ke omtapotarî ka entacoko.

15 On wara kan̂e amyamro, Kwaihtopo komo yakro amna n̂esentai amna waihkara ro mak cehtopo poko. Ero wara xa marha amna n̂esentai ewtarî imo yakro hara. Ero ke ahsîno riyataw eper̂a ya kahsîra ro mak nasî. Cemaro rma amna n̂iir̂asî twacan me, tukurun me ha. Cemaro cheka rma amna n̂eseyamyasî, mîîkexe kica.

16 Ero ke on wara kesî Kporin komo awya so, Enko xe amn̂e, Mîîmo tak wiir̂asî Siaw po. Ero yapon me toopu wiir̂asî. Kir̂wan mîn toopu, onkukmatho rma. Emacakara ro mak ehtome mîîmo wiir̂asî. Ero rma wiir̂asî mîîmo peyecepu me hara. Takîhso mak nîhtînoyaxe cemyawno ciitopo cerekan̂e cirihra ha.

17 Yaaro en̂ekano ritopo tak wiir̂asî awehtopo komo kuknomachome. Kir̂wan̂he kehtopo wiir̂asî pataw awehtopo komo kuknomacho me. Saraipa tak men mokyasî awetkurunpetopo komo yar̂machome kr̂a cemaro pen ha. Aweseyamtoponhîrî komo tak nowyasî tuuna, yukmano rirî ke.

18 Awaitopo komo yakro rma na mesentace waipîra awehtopo komo poko. Ero wa amtapotachonhîrî komo tko nasî towso. Ewtarî imo yakro awesentachonhîrî komo marha nasî towso. Ero ke ahsîno riyataw eper̂a, awahsîyaxe so amyamro meero. Kicicitho ro mak mîn awahsîyaxe so. Awapikn̂e komo wara rma nas okwe.

19 Emapona roro awahsîyaxe so eper̂a. Enmar̂atîxera ahsîno n̂iir̂as okwe. Katpanaw ahsîno n̂iir̂asî, kosope marha. Awirihtîkexe so okwe, awar̂axe so okwe. Meraswaxe ro mak, Eper̂a xa hara kopi, kacho yencetaw.

20 Ehyatkawra nas okwe awetîrapotopo komo, esehyatkara rma maxe okwe ero po. Akwera marha nasî awam komo awewomtorî yarohra okwe.

21 Amn̂e tak nawomyasî Kporin komo, pahxa nawomyakn̂e Perasin Yîpîn po ero wara xa marha nawomyasî. Pahxa nîrwonakn̂e îîpî yamrinawno po, Xibeon mîtwono po, ero wara xa marha nîrwonas hara okwe. Nîrwonasî karitî me cesenpotome tak. Okwe ro mak okwe, kamexpotopo poko n̂ekaricesî. Anarmenî ro mak mîn ero poko ekaritotopo.

22 Ero ke Kaanî mtapotarî poko etaporera ro mak tak men ehcoko. Ero poko awetaporeche so etawotonî ro ke men amiyaxe so okwe. On wara wencekn̂e Kporin komo mtapotarî rma kantoman̂e ro mtapotarî. Roowo poko hakno komo men waihkesî, kacho wencekn̂e okwe.

23-24 Kîmtapowasî rma ka awakro so. Ero ke omtapotarî men ka entacoko. Ahce wa kyam nai mararî pomon̂e awya so, Roowo pomorî poko kyam makî katî nai yîtîtmamnî me ro mak? Miya roro pomorî poko mak nai awya so ciitopo pokohra?

25 Pomotîkache naatî yatho cirihra ma nai awya so? Kumasa, komin̂u, puruma, sepata, senteu, ero yipu xa matko cicir̂asî takpaxi ewtî ro pona so.

26 Kaanî rma mararî yosom komo nakîhresî naatî ciitopo poko takîhso ciitome.

27 Kumasa yeperîrî yîpîpîtîkara tasî cihxisom ke, kupruru kacho ke marha apikmora tasî. Komin̂u yatho yîpîpîtikara tasî tarara tarî ke, epore tîtosom ke. Ero warai ke epotura nasî eperîrî. Weewe ke xa cetapesî komin̂u, amoi wicakno ke. Ero wa tîtpocasî.

28 Puruma yatho yîpîpîtîkache takihyasî kuuru me ciitome. Ero ke miya roro yîpîpîtîkara tasî. Tarara taar̂asî rma re yîhkotoxapu pore. Kawaru ke yîpîpîtîkara ro mak nasî.

29 Ero wa kakîhrexe so Kporin komo, kantoman̂e ro ha. Kir̂wan̂he kakîhren̂e xa Mîk okre. Keserepokacho me ro mak nasî Noro ya kakîhretopo komo. Kyopono ro komo xa Mîk yuhnari yîhtînon̂e ha, Noro yipu xa Mîk ha Kporin komo.